“Mekem Iufala No Foldaon Long Temptation”
“Gohed for luk aot and prea evritaem, mekem iufala no foldaon long temptation.”—MATTHEW 26:41.
HEVI wea hem kasem hem big tumas—winim eni hevi wea hem kasem bifor. Jesus Christ, Son bilong God, klosap for kasem end long laef bilong hem long earth. Jesus luksavve olketa klosap for arrestim hem, judgem hem for dae, and nilam hem long torture stake. Hem savve evri disison and wanem hem duim bae affectim nem bilong Dadi bilong hem. Jesus savve tu hao samting wea hem duim bae affectim future bilong olketa man. Taem hem kasem evri hevi hia, wanem nao hem duim?
2 Jesus go long garden bilong Gethsemane witim olketa disaepol. Jesus savve laek for go long datfala ples. Taem hem kasem there, hem muv go lelebet from olketa disaepol. Taem hem stap seleva, hem prea strong and askem Dadi bilong hem long heven for givim hem strong. Hem talemaot evri tingting and feeling bilong hem—no wanfala taem nomoa bat thrifala taem. Nomata hem perfect, Jesus luksavve hem needim help for deal witim disfala hevi.—Matthew 26:36-44.
3 Distaem, iumi tu kasem hevi. Insaed disfala brochure, iumi storyim finis olketa pruv wea showimaot iumi stap insaed long olketa lalas day bilong disfala wicked world. Olketa temptation and hevi wea kamap from world bilong Satan hem big tumas. Samting wea each wan long iumi wea sei hem servem tru God hem disaedem and duim, hem affectim nem bilong God, and tu, savve barava affectim hope for laef long niu world bilong God. Iumi lovem Jehovah. Iumi laek for ‘stand strong go kasem end’—end long laef bilong iumi or end long disfala world, eniwan wea kam firstaem. (Matthew 24:13) Bat hao nao iumi savve keepim feeling for hariap and gohed for luk aot?
4 Jesus savve olketa disaepol bilong hem—long first century and distaem—bae kasem hevi, so hem encouragem olketa: “Gohed for luk aot and prea evritaem, mekem iufala no foldaon long temptation.” (Matthew 26:41) Wanem nao toktok hia minim for iumi distaem? Wanem temptation nao iu feisim? And hao nao iu savve “gohed for luk aot”?
Temptation for Duim Wanem?
5 Evriday iumi evriwan kasem temptation for foldaon long “trap bilong Devil.” (2 Timothy 2:26) Bible warnim iumi hao main wan wea Satan targetim nao pipol wea worshipim Jehovah. (1 Peter 5:8; Revelation 12:12, 17) Why nao hem duim datwan? Main goal hem no for killim iumi dae. Satan bae no win sapos iumi stap faithful long God go kasem taem iumi dae. Satan savve hao long taem wea Jehovah markem, hem bae mekem pipol laef bak thru long resurrection.—Luke 20:37, 38.
6 Satan laek for distroem samting wea garem hae price winim laef bilong iumi—faithful fasin bilong iumi long God. Satan laek tumas for pruvim hao hem savve mekem iumi stop for worshipim Jehovah. Dastawe, sapos hem savve stopem iumi for faithful—stopem iumi for preachim gud nius or followim olketa Christian standard—Satan win nao! (Ephesians 6:11-13) So datfala “Man for Testim” iumi mekem kamap olketa temptation.—Matthew 4:3.
7 Satan iusim olketa “kleva trik.” (Ephesians 6:11, Jewish New Testament) Hem maet testim man saed long material samting, wei for fraet, garem daot, or aftarem hapitaem. Bat wanfala wei wea win evritaem hem wei for mekem man feel wikdaon. From hem savve hao for spoelem narawan, hem savve hao wei for feel nogud savve mekem iumi wikdaon long spiritual wei, wea bae mekem hem isi for iumi foldaon long temptation. (Proverbs 24:10) So taem feeling bilong iumi barava wikdaon, hem trae for mekem iumi givap.—Psalm 38:8.
8 Taem iumi gogo klosap for end bilong olketa last day, hem luk olsem olketa samting wea savve mekem man feel wikdaon hem kamap staka, and hem savve kasem iumi evriwan. (Lukim box “Samfala Samting wea Kosim Wei for Feel Wikdaon.”) Nomata wanem nao kosim, wei for feel wikdaon savve aotem strong bilong iumi. For “baem bak taem wea iu iusim for duim nara samting” for olketa spiritual samting—olsem wei for studyim Bible, attendim olketa Christian meeting, and for tekpart long ministry—hem wanfala challenge sapos iu taed long body, mind, and feeling. (Ephesians 5:15, 16) No forget hao Satan laekem iu for givap. Bat distaem hem no taem for isisi or for lusim feeling for hariap! (Luke 21:34-36) Wanem nao iu savve duim for againstim temptation and gohed for luk aot? Tingim fofala idea hia wea savve help.
“Prea Evritaem”
9 Depend long Jehovah thru long prea. Tingim example bilong Jesus long garden bilong Gethsemane. Taem hem kasem barava bigfala hevi, wanem nao hem duim? Hem prea long Jehovah for help, and barava prea strong gogo “swet bilong hem kamap olsem blood and foldaon long graon.” (Luke 22:44) Tingim. Jesus savve gud long Satan. Jesus bin lukim kam from heven evri temptation wea Satan iusim for trae mekem olketa servant bilong God foldaon. Bat, Jesus no ting hem isi nomoa for hem winim eni temptation bilong Satan. Sapos Son bilong God wea perfect need for prea long God for helpem and strongim hem, iumi mas barava olsem tu!—1 Peter 2:21.
10 No forget hao bihaen hem encouragem olketa disaepol for “prea evritaem,” Jesus sei: “Hem tru, spirit hem willing bat body hem wik.” (Matthew 26:41) Jesus story abaotem body bilong hu? No bilong hem, no eniting hem wik long body bilong hem wea perfect. (1 Peter 2:22) Bat for olketa disaepol hem difren. From olketa born long wei for no perfect and feeling for laek duim sin, olketa bae barava needim help for againstim temptation. (Romans 7:21-24) Dastawe hem encouragem olketa—and evri tru Christian tu—for prea for kasem help for winim temptation. (Matthew 6:13) Jehovah ansarem olketa prea olsem. (Psalm 65:2) Long wanem wei? Long tufala wei.
11 First samting, God helpem iumi for luksavve long olketa temptation. Olketa temptation bilong Satan olsem olketa trap wea leidaon olobaot long wanfala road wea dark. Sapos iu no lukim, iu bae foldaon insaed trap. Thru long Bible and olketa Bible pablikeson, Jehovah shaenim laet long olketa trap bilong Satan mekem iumi savve lukim and stap klia long wei for foldaon insaed temptation. Insaed staka year wea go pas finis, olketa buk, convention and assembly program evritaem mekem iumi luksavve long olketa danger, olsem wei for fraet long man, dirty fasin, aftarem material samting and olketa nara temptation bilong Satan. (Proverbs 29:25; 1 Corinthians 10:8-11; 1 Timothy 6:9, 10) Waswe, iu garem feeling for thankiu long God from hem helpem iumi for luksavve long olketa difren kaen temptation bilong Satan? (2 Corinthians 2:11) Evrikaen warning olsem hem ansa long olketa prea bilong iu for helpem iu againstim temptation.
12 Mek-tu samting, Jehovah ansarem prea bilong iumi taem hem givim iumi strong for winim temptation. Word bilong hem sei: “God . . . bae no letem eni temptation kasem iufala wea iufala no fit for winim, bat witim datfala temptation hem bae mekem wei for iufala savve stand strong.” (1 Corinthians 10:13) Sapos iumi gohed for depend long God bae hem no letem temptation kamap big tumas gogo iumi no garem strong long spiritual wei for againstim. Hao nao hem ‘mekem wei for iumi stand strong’? Hem ‘givim holy spirit long olketa wea askem hem.’ (Luke 11:13) Holy spirit savve helpem iumi for rememberim olketa Bible principle wea savve strongim iumi for duim stret samting and helpem iumi for disaed long wisefala wei. (John 14:26; James 1:5, 6) Hem savve helpem iumi for showimaot olketa fasin wea iumi needim for winim olketa rong feeling. (Galatians 5:22, 23) Spirit bilong God maet savve muvim olketa Christian brata for ‘strongim iumi.’ (Colossians 4:11) Waswe, iu thankiu long Jehovah from olketa loving wei wea hem ansarem olketa prea bilong iu for help?
No Expectim Tumas Samting
13 For gohed luk aot, iumi mas no expectim tumas samting. From olketa hevi bilong laef, samfala taem iumi bae taed. Bat iumi mas no forget hao God no sei laef bilong iumi long disfala world bae free from problem. Nomata long taem bilong Bible, olketa servant bilong God kasem olketa problem, olsem persecution, poor living, wei for feel sorre, and sik.—Acts 8:1; 2 Corinthians 8:1, 2; 1 Thessalonians 5:14; 1 Timothy 5:23.
14 Distaem tu iumi garem olketa problem. Iumi maet kasem persecution, wari abaotem selen, trae for deal witim feeling for sorre, sik, and safa long olketa nara wei. Sapos Jehovah protectim iumi long mirakol wei for no kasem eni nogud samting, diswan bae mekem Satan fit for tok spoelem Jehovah. (Proverbs 27:11) Jehovah letem olketa servant for kasem temptation and test, and from diswan samfala taem olketa dae from wei wea pipol againstim olketa.—John 16:2.
15 So, wanem nao Jehovah promisim? Olsem iumi storyim finis, hem promis for helpem iumi for againstim eni temptation wea iumi kasem, bat iumi mas trustim hem evribit. (Proverbs 3:5, 6) Thru long Word, spirit, and organization bilong hem, hem protectim iumi long spiritual wei wea bae helpem iumi for keepim gudfala wei for fren witim hem. Sapos iumi keepim gud diswan, nomata iumi dae, iumi win. No eniting—nomata dae tu—savve stopem God for givim reward long servant bilong hem wea faithful. (Hebrews 11:6) And long niu world, wea klosap tumas nao, Jehovah bae fulfillim evri nara nambawan promis bilong blessing for pipol wea lovem hem.—Psalm 145:16.
Rememberim Olketa Kwestin
16 For stand strong go kasem end, iumi mas no forgetim olketa important kwestin wea join witim wei wea God letem wicked fasin gohed. Sapos samfala taem olketa problem bilong iumiseleva hem feel olsem hem big tumas and iumi laek for givap, hem gud for rememberim hao Satan challengem sapos sovereign rul bilong Jehovah hem stret or nomoa. Satan kwestinim tu love and faithful fasin bilong pipol wea worshipim Jehovah. (Job 1:8-11; 2:3, 4) Olketa kwestin hia and wei wea Jehovah chus for stretem olketa hem barava important winim laef bilong iumiseleva. Hao nao olsem?
17 Wei wea God letem hardfala samting gohed for lelebet taem givim chance for nara pipol acceptim truth. Tingim diswan: Jesus safa mekem iumi savve garem laef. (John 3:16) Iumi barava hapi long diswan. Bat waswe, iumi willing for gohed strong for feisim olketa problem for lelebet taem moa mekem nara pipol savve kasem laef? For stand strong kasem end, iumi mas luksavve hao wisdom bilong Jehovah hem winim bilong iumi. (Isaiah 55:9) Hem bae finisim wicked fasin long taem wea barava fitim for hem stretem for olowe olketa kwestin hia and for iumi kasem gud samting for olowe. No eni nara wei wea moabeta stap for stretem olketa kwestin hia. God showimaot justice evritaem!—Romans 9:14-24.
“Kam Klos Long God”
18 For keepim feeling for hariap, iumi need for stap klos long Jehovah. Evritaem no forget hao Satan barava gohed for trae spoelem gudfala wei wea iumi fren witim Jehovah. Satan laekem iumi for tingse end bae no savve kam and hem iusles nomoa for preachim gud nius or followim olketa standard bilong Bible. Bat hem “man for tok laea and dadi bilong laea fasin.” (John 8:44) Iumi mas disaed strong for “againstim Devil.” Iumi shud no ting long wei wea iumi fren witim God olsem hem samting wea no important tumas. Long loving wei Bible encouragem iumi for: ‘Kam klos long God, and hem bae kam klos long iu.’ (James 4:7, 8) Wanem nao iu savve duim for kam klos long Jehovah?
19 Hem important for ting raonem samting witim wei for prea. Taem olketa hevi bilong laef big tumas, talem evriting wea stap insaed heart bilong iu long Jehovah. Sapos iu talem stret wanem nao iu needim, bae hem moa isi for iu luksavve long ansa bilong hem. Ansa maet no evritaem followim wanem iu bin tingim, bat sapos iu laek for honorim hem and keepim faithful fasin, hem bae provaedem help wea iu needim mekem iu savve win for stand strong. (1 John 5:14) Taem iu lukim wei wea hem leadim laef bilong iu, iu bae feel moa klos long hem. Hem barava important tu for read abaotem and ting raonem gud olketa fasin and wei bilong Jehovah wea stap insaed long Bible. Wei for ting raonem samting olsem savve helpem iu for savve gud go moa long hem, hem muvim heart and mekem love bilong iu for hem kamap moa deep. (Psalm 19:14) Winim evri samting, love bae helpem iu for againstim temptation and for gohed luk aot.—1 John 5:3.
20 For keepim wei for feel klos long Jehovah, hem important tu for stap klos long olketa Christian brata. Iumi bae storyim diswan long last sekson bilong disfala brochure.
OLKETA STUDY KWESTIN
• Wanem nao Jesus duim taem hem kasem barava bigfala hevi klosap long end long laef bilong hem long earth, and wanem nao hem encouragem olketa disaepol for duim? (Par. 1-4)
• Why nao Satan targetim pipol wea worshipim Jehovah, and long olketa wanem wei nao hem testim iumi? (Par. 5-8)
• For againstim temptation, why nao iumi mas prea evritaem (Par. 9-12), no expectim tumas samting (Par. 13-15), rememberim olketa kwestin wea kamap (Par. 16-17), and “kam klos long God” (Par. 18-20)?
[Box long page 25]
Samfala Samting wea Kosim Wei for Feel Wikdaon
Health/age. Sapos iumi safa from sik wea no savve finis or wei for olo wea maet mekem iumi no fit for duim samfala samting, iumi maet feel sorre bikos iumi no savve duim moa samting for servem Jehovah.—Hebrews 6:10.
Feel wikdaon. Iumi maet feel wikdaon sapos iumi lukim staka pipol no interest nomata iumi waka hard for preachim Word bilong God.—Proverbs 13:12.
Feel olsem iumi no fit. From pipol maet deal witim samwan long nogud wei for planti year, hem maet feel olsem no eniwan lovem hem, nomata Jehovah tu.—1 John 3:19, 20.
Feel nogud. Sapos samwan feel nogud from nara brata spoelem hem, hem maet feel nogud tumas gogo hem stop for attendim olketa Christian meeting or for tekpart long field ministry.—Luke 17:1.
Persecution. Nara pipol wea no garem sem lotu olsem iu maet againstim, persecutim, or tok spoelem iu.—2 Timothy 3:12; 2 Peter 3:3, 4.
[Piksa long page 26]
Jesus encouragem iumi for “prea evritaem” for God helpem iumi for faet againstim temptation