‘O God, Sendem Aot Laet Bilong Iu’

“Sendem aot laet and truth bilong iu. Letem olketa hia leadim mi.”—PSALM 43:3.

1. Hao nao Jehovah showimaot olketa purpose bilong hem?

JEHOVAH hem kaen tumas long wei wea hem talemaot olketa purpose bilong hem long olketa servant bilong hem. Hem no showimaot evri truth long wantaem, bat hem isisi givim iumi spiritual laet. Gogo bilong iumi long laef hem olsem wakabaot bilong wanfala man wea go for farawe ples. Hem start wakabaot long early morning taem hem dark yet. Taem sun isisi kamap long skae, man hia savve lukim tu-thri samting raonem hem. Olketa nara samting no mas klia yet. Bat taem sun gogo ap hae, hem savve lukim samting farawe. Diswan semsem tu witim spiritual laet wea God givimaot. Hem letem iumi isisi lanem tu-thri samting long wanfala taem. Son bilong God, Jesus Christ, givim spiritual savve long sem wei tu. Iumi bae lukluk long wei wea Jehovah givim spiritual savve long pipol bilong hem bifor and hao hem duim datwan distaem.

2. Hao nao Jehovah givim spiritual savve bifor taem bilong olketa Christian?

² Maet olketa son bilong Korah nao raetem mek-43 chapter bilong Psalm. From olketa hia Levite, olketa garem privilege for teachim Law bilong God long pipol. (Malachi 2:7) Hem tru, Jehovah nao Barava Nambawan Teacher bilong olketa, and olketa luk long hem olsem Source bilong evri wisdom. (Isaiah 30:20) Man hia wea raetem psalm prea olsem: “O God, . . . sendem aot laet and truth bilong iu. Letem olketa hia leadim mi.” (Psalm 43:1, 3) Taem olketa Israelite faithful long hem, Jehovah teachim olketa abaotem wei bilong hem. Planti handred year bihaen, Jehovah givim olketa laet and truth wea barava spesol. God duim datwan taem hem sendem Son bilong hem long earth.

3. Long wanem wei nao olketa Jew kasem test long saed bilong olketa teaching bilong Jesus?

³ Olsem man Jesus Christ, Son bilong God nao hem barava “laet bilong world.” (John 8:12) Hem teachim pipol “planti samting witim olketa tokpiksa”—olketa niu samting. (Mark 4:2) Hem talem Pontius Pilate: “Kingdom bilong mi hem no part bilong disfala world.” (John 18:36) Datwan hem niu samting for man bilong Rome and tu for olketa Jew wea mekhae long nation bilong olketa, bikos olketa tingse Messiah bae daonem Rul Bilong Rome and mekem Israel kasem bak glory bilong hem moa. Jesus showimaot laet from Jehovah, bat toktok bilong hem no mekem olketa Jew ruler hapi, wea “lovem tumas glory bilong olketa man winim glory bilong God.” (John 12:42, 43) Planti long olketa pipol hia chus for hol strong long kastom bilong olketa and no acceptim spiritual laet and truth from God.—Psalm 43:3; Matthew 13:15.

4. Hao nao iumi savve olketa disaepol bilong Jesus bae go ahed for grow long savve?

⁴ Bat, samfala man and woman wea garem honest heart hapi for acceptim truth wea Jesus teachim. Olketa muv ahed gud long savve bilong olketa abaotem olketa purpose bilong God. Bat, taem laef bilong Teacher bilong olketa klosap for finis long earth, olketa need for lanem planti samting yet. Jesus talem olketa: “Mi garem planti samting yet for talem long iufala, bat iufala no fit for herem distaem.” (John 16:12) Tru nao, olketa disaepol bae go ahed for grow long savve abaotem truth bilong God.

Laet Go Ahed for Shaen

5. Wanem kwestin nao kamap long first century, and hu nao garem responsibility for stretem datwan?

⁵ Bihaen dae and resurrection bilong Jesus, laet from God shaen moa braet winim bifor. Peter kasem wanfala vision wea Jehovah showim hao olketa Gentile wea no circumcise bae kamap pipol wea followim Christ. (Acts 10:9-17) Hem barava niufala samting! Nomata olsem, wanfala kwestin kamap bihaen: Waswe, Jehovah askem olketa Gentile olsem for circumcise bihaen olketa kamap Christian? Datfala kwestin no kasem ansa insaed datfala vision, and datfala point kamap samting wea samfala Christian raoa abaotem. Olketa mas stretem, sapos nomoa bae olketa lusim wan mind wea important tumas. So, long Jerusalem, “olketa aposol and older man hipap tugeta for story abaotem disfala samting.”—Acts 15:1, 2, 6.

6. Wanem wei nao olketa aposol and older man followim taem olketa ting raonem kwestin bilong wei for circumcise?

⁶ Hao nao olketa wea stap long datfala meeting luksavve long will bilong God for olketa Gentile wea biliv? Jehovah no sendem wanfala angel for lukaftarem datfala meeting, and hem no givim vision long eniwan wea stap long there tu. Nomata olsem, olketa disaepol and olketa older man garem samting for leadim olketa. Olketa ting raonem witness bilong samfala Jew Christian wea lukim hao nao God start for deal witim pipol bilong olketa nation, taem holy spirit bilong hem kasem olketa Gentile wea no circumcise. Olketa lukluk long olketa Scripture tu for gaedem olketa. From olketa samting hia, disaepol James givim advaes wea garem faondeson long wanfala scripture wea kamap klia. Taem olketa ting raonem pruv wea stap, will bilong God kamap klia. Pipol bilong olketa nation no need for circumcise for mekem Jehovah hapi long olketa. Olketa aposol and older man kwiktaem raetem daon datfala disison mekem datwan savve gaedem olketa nara Christian.—Acts 15:12-29; 16:4.

7. Long wanem wei nao olketa Christian long first century muv ahed?

⁷ No olsem olketa bigman bilong Jew religion wea hol strong long kastom bilong olketa laen dadi bilong olketa, planti Jew Christian hapi taem olketa kasem disfala niu mining long purpose bilong God abaotem pipol bilong olketa nation, nomata hem minim olketa mas changem tingting bilong olketa abaotem Gentile pipol. Jehovah blessim hambol spirit bilong olketa, and “olketa kongregeson go ahed for kamap strong long faith and kamap moa big evriday.”—Acts 15:31; 16:5.

8. (a) Hao nao iumi sure moa savve bae kamap bihaen end bilong first century? (b) Wanem nao olketa kwestin iumi bae lukluk long hem?

⁸ Spiritual laet go ahed for shaen long first century. Bat Jehovah no showimaot evri part long olketa purpose bilong hem long olketa first Christian. Aposol Paul talem olketa Christian long first century: “Distaem iumi lukim samting wea no klia tumas insaed long wanfala metal mirror.” (1 Corinthians 13:12) Kaen mirror olsem hem no klia gud. So, firstaem, wei for minim spiritual laet bae hem no big tumas. Bihaen dae bilong olketa aposol, datfala laet hem barava smol for samfala taem, bat insaed olketa year wea just go pas savve bilong Bible hem kamap big. (Daniel 12:4) Hao nao Jehovah givim spiritual laet long pipol bilong hem distaem? And wanem nao iumi mas duim taem hem mekem moa big savve bilong olketa Scripture for iumi?

Laet Go Ahed for Kamap Moa Braet

9. Wanem spesol and gudfala wei for studyim Bible nao olketa first Bible Student duim?

⁹ Long disfala taem trufala laet hem start for showaot moa long last part bilong mek-19 century taem wanfala sekson bilong olketa Christian man and woman start for studyim olketa Scripture. Olketa startim wanfala gudfala wei for studyim Bible. Samwan bae askem wanfala kwestin; then datfala grup bae storyim and ting raonem evri scripture wea join witim datwan. Taem hem luk olsem wanfala Bible verse againstim narawan, olketa honest Christian hia trae for luksavve hao tufala hia really garem wan mind. No olsem olketa bigman bilong religion distaem, olketa Bible Student (wea hem nem bilong Olketa Witness Bilong Jehovah long dat taem) disaed strong for letem olketa Holy Scripture, no kastom or teaching bilong man, for gaedem olketa. Bihaen olketa tingting raonem evri Bible pruv wea stap, olketa raetem wanem olketa faendem. Long wei olsem, savve bilong olketa long planti main Bible teaching hem kamap moa klia.

10. Wanem nao Charles Taze Russell raetem for helpem man studyim Bible?

¹⁰ Wanfala nambawan man midolwan long olketa Bible Student nao hem Charles Taze Russell. Hem raetem sixfala buk for helpem man studyim Bible wea garem title Studies in the Scriptures. Brata Russell plan for raetem mek-seven volume, wea bae explainim tufala Bible buk bilong Ezekiel and Revelation. Hem sei: “Taem mi faendem key, mi bae raetem Mek-Seven Volume.” Bat hem sei tu: “Sapos Lord givim key long narafala man, hem nao bae raetem.”

11. Hao nao taem hem join witim wei wea iumi minim olketa purpose bilong God?

¹¹ Datfala toktok wea C. T. Russell talem showimaot wanfala important samting bilong wei wea iumi minim samfala Bible scripture—taem bilong hem. Brata Russell savve hem kanduit forcem laet for shaen long buk bilong Revelation, olsem wanfala man wea wakabaot kanduit talem sun for kamap bifor taem bilong hem.

Showaot—Bat Long Taem wea God Markem

12. (a) Wanem taem nao hem best for minim klia Bible profesi? (b) Wanem example nao showimaot wei wea iumi minim Bible profesi hem depend long taem wea God markem? (Lukim footnote.)

¹² Long sem wei wea olketa aposol minim planti profesi abaotem Messiah only bihaen Jesus hem dae and resurrect, olketa Christian distaem minim evri part bilong wanfala Bible profesi only bihaen hem fulfill. (Luke 24:15, 27; Acts 1:15-21; 4:26, 27) Revelation hem wanfala buk bilong profesi, so iumi expectim hao iumi bae minim klia taem olketa samting hem storyim go ahed for happen. Example hem olsem, C. T. Russell hard for savve long mining bilong tokpiksa wild animal wea Revelation 17:9-11 storyim, bikos olketa organization wea datfala animal piksarem, League of Nations and United Nations, nating stap yet taem hem laef.a

13. Wanem nao savve happen taem niu laet hem kamap long wanfala Bible subject?

¹³ Taem olketa first Christian herem hao olketa Gentile wea no circumcise savve kamap man wea biliv witim olketa, datfala change lead go for wanfala niu kwestin abaotem need for pipol bilong olketa nation for circumcise. Diswan muvim olketa aposol and older man for tingting gud moa long datfala point bilong wei for circumcise. Datfala wei hem semsem distaem. Niu laet long wanfala Bible subject samfala taem mekem olketa anointed servant bilong God, “faithful and wise slave,” for lukluk moa long olketa point wea join witim niu laet, olsem olketa example long daon wea happen no longtaem go nomoa showimaot.—Matthew 24:45.

14-16. Hao nao change long tingting bilong iumi abaotem spiritual temple affectim savve bilong iumi long Ezekiel chapter 40 go kasem 48?

¹⁴ Long 1971, olketa pablisim mining bilong profesi long Ezekiel insaed long buk “The Nations Shall Know That I Am Jehovah”—How? (“Olketa Nation Bae Savve Hao Mi Nao Jehovah”—Hao?) Wanfala chapter bilong datfala buk hem storyim lelebet vision bilong Ezekiel abaotem wanfala temple. (Ezekiel, chapter 40-48) Long datfala taem, olketa point go long wei wea temple vision bilong Ezekiel bae fulfill insaed niu world.—2 Peter 3:13.

¹⁵ Bat, tufala article wea olketa pablisim insaed English Wastaoa bilong December 1, 1972, affectim savve bilong iumi abaotem vision bilong Ezekiel. Tufala storyim bigfala spiritual temple wea aposol Paul story abaotem long Hebrews chapter 10. Datfala Wastaoa talem hao Holy rum and courtyard insaed hem minim living bilong olketa anointed wan taem olketa stap long earth. Taem olketa reviewim Ezekiel chapter 40 go kasem 48 samfala year bihaen, olketa luksavve hao long sem wei wea datfala spiritual temple hem go ahed distaem, olsem tu temple wea Ezekiel lukim long vision hem go ahed distaem. Hao nao olsem?

¹⁶ Insaed vision bilong Ezekiel, olketa priest muv raon long olketa courtyard bilong temple taem olketa servem olketa wea no insaed tribe bilong olketa priest. Olketa priest hia barava piksarem “sekson bilong olketa priest for rul,” olketa anointed servant bilong Jehovah. (1 Peter 2:9) Bat, insaed Thousand Year Rul Bilong Christ, olketa bae no serve insaed courtyard long earth. (Revelation 20:4) Long datfala taem, maet long full taem hia, olketa anointed wan bae servem God insaed Most Holy, “long heven,” bilong datfala spiritual temple. (Hebrews 9:24) Bikos olketa priest go and kam insaed olketa courtyard long temple bilong Ezekiel, datfala vision hem go ahed for fulfill distaem, taem samfala anointed wan stap yet long earth. Dastawe, March 1, 1999, Wastaoa showimaot tingting wea change long disfala point. So, kam kasem end bilong mek-20 century, spiritual laet abaotem profesi bilong Ezekiel hem shaen kam.

Willing for Changem Tingting Bilong Iu

17. Wanem nao olketa change wea iuseleva mekem taem iu kasem savve abaotem truth, and hao nao iu kasem gud samting from diswan?

¹⁷ Eniwan wea laek for kasem savve abaotem truth mas willing for “kasholem evri tingting, mekem hem obeyim Christ.” (2 Corinthians 10:5) Datwan hem no isi evritaem, especially taem olketa tingting hem barava strong. Olsem example, bifor iu lanem truth bilong God, maet iu enjoyim wei for celebratem samfala holiday bilong religion witim famili bilong iu. Bihaen iu start for studyim Bible, iu luksavve olketa holiday hia start kam long heathen worship. Firstaem, maet iu hol bak lelebet for followim wanem iu lanem. Bat gogo, love for God hem moa strong winim feeling for followim religion, and iu stop nao for join insaed olketa celebration wea mekem God no hapi. Waswe, Jehovah no blessim disison bilong iu?—Markem Hebrews 11:25.

18. Wanem nao iumi mas duim taem savve bilong iumi long Bible truth hem kamap moa klia?

¹⁸ Evritaem iumi kasem gud samting taem iumi duim samting followim wei bilong God. (Isaiah 48:17, 18) So taem tingting bilong iumi long wanfala Bible scripture hem kamap moa klia, letem iumi hapi long truth wea go ahed for kamap moa klia! Tru nao, wei wea iumi go ahed for kasem spiritual savve showimaot iumi stap long stretfala road. Hem nao “road bilong olketa raeteous wan,” wea “olsem braet laet wea kamap moa strong go kasem taem bilong full daylaet.” (Proverbs 4:18) Hem tru, long distaem, iumi lukim samfala part long purpose bilong God long “wei wea no klia gud.” Bat long taem wea God markem, bae iumi lukim full truth, sapos leg bilong iumi hem gogo strong long “road” hia. Go kasem datfala taem, letem iumi barava hapi long olketa truth wea Jehovah showimaot klia, and weitim spiritual savve long olketa truth wea iumi no minim klia evribit yet.

19. Wanem nao wanfala wei for showimaot iumi lovem truth?

¹⁹ Hao nao iumi savve showimaot love for datfala laet long gudfala wei? Wanfala wei hem for readim Word bilong God evritaem—evriday sapos hem fitim. Waswe, iu followim wanfala program for readim Bible evritaem? Wastaoa and Wekap! magasin tu givim iumi planti nambawan spiritual kaikai for enjoyim. Tingim tu, olketa buk, brochure, and narafala pablikeson wea olketa redyim for helpem iumi. And waswe long olketa report wea encouragem iumi abaotem Kingdom-preaching waka wea stap insaed Yearbook of Jehovah’s Witnesses?

20. Hao nao laet and truth from Jehovah hem join witim wei wea iumi attendim olketa Christian meeting?

²⁰ Tru nao, Jehovah ansarem long nambawan wei datfala prea wea stap long Psalm 43:3. Long end bilong datfala verse, hem sei: “Letem [laet and truth bilong iu] tekem mi go long holy maunten bilong iu and long nambawan tabernacle bilong iu.” Waswe, iu luk forward for worshipim Jehovah witim staka pipol? Spiritual instruction wea kamaot long olketa meeting bilong iumi hem wanfala important wei wea Jehovah provaedem spiritual savve distaem. Wanem nao iumi savve duim for mekem moa big wei wea iumi tinghae long olketa Christian meeting? Mifala invaetem iu for tingim diswan witim prea long next article.

[Footnote]

Waswe, Iu Savve Ansa?

• Why nao Jehovah isisi showimaot olketa purpose bilong hem?

• Hao nao olketa aposol and older man long Jerusalem stretem problem bilong wei for circumcise?

• Wanem wei for studyim Bible nao olketa first Bible Student duim, and why nao diswan hem spesol?

• Givim example abaotem hao spiritual laet hem showaot klia long taem wea God markem.

[Piksa long page 12]

Charles Taze Russell savve laet bae shaen long buk bilong Revelation long taem wea God markem