Kaonsel From God for Chusim Marit Partner

“Mi bae mekem iu for garem fasin for luksavve and teachim iu long wei wea iu mas followim. Mi bae givim advaes and lukluk long iu.”—PSALM 32:8.

1. Wanem nao samfala important samting for tufala pipol stap hapi insaed long marit?

WANFALA acrobat hem flae go from trapeze wea swing, bendim body bilong hem, and tan raon long air. Hem kwiktaem stretem body, holem aot hand for nara acrobat wea ap saed daon wea swing kam from opposite saed for kasholem hem. Tufala wea savve tumas ski tugeta long ice. Seknomoa, man liftimap partner bilong hem and pushim hem long air. Hem spin raon and kamdaon isisi long wanfala leg, and go ahed for ski witim man long ice. Tufala akson wea iumi storyim maet luk olsem isi nomoa. Bat, no eniwan bae traem sapos hem no practice, garem partner wea fit, and especially stretfala instruction. Olsem tu, wei wea tufala pipol stap hapi insaed marit maet luk olsem hem kamap seleva nomoa. Bat, hem tu depend long wanfala gud partner, tufala wea willing for trae hard, and especially for followim wisefala kaonsel. Tru tumas, stretfala kaonsel hem main important samting.

2. (a) Hu nao startim marit, and for wanem purpose? (b) Hao nao samfala marit kamap?

² Hem wei bilong wanfala young man or woman wea no marit for ting abaotem wanfala marit partner—wanfala partner long laef. Start kam from taem Jehovah God startim, marit hem wei bilong laef for wanfala man and woman. Bat firstfala man, Adam, no chusim waef bilong hem. Long loving wei Jehovah nao provaedem for hem. (Genesis 2:18-24) Hem purpose bilong hem for tufala hia garem staka pikinini, and gogo earth bae fulap witim pipol. Bihaen datfala first marit, olketa parents savve arrangem marit bilong boy and girl, samfala taem hem bihaen evriwan agree. (Genesis 21:21; 24:2-4, 58; 38:6; Joshua 15:16, 17) Nomata long samfala kantri hem still kastom for arrangem marit, distaem planti chusim marit partner seleva.

3. Hao nao man shud chusim wanfala marit partner?

³ Hao nao man shud chusim wanfala marit partner? Lukluk nao pullim samfala—samwan wea luk naes tumas long eye bilong olketa. Narafala pipol lukaotem gud samting long material wei, samwan wea bae lukaftarem and provaedem samting wea olketa needim and wantem. Bat waswe, tufala wei for chus olsem savve lead go long wei for fren wea mekem man hapi and satisfae? “Swit toktok maet giaman, and for luk naes maet hem samting nating,” Proverbs 31:30 talem, “bat woman wea fraet long Jehovah nao hem fit for kasem praise.” And long there nao wanfala important point: Ting abaotem Jehovah taem iumi chusim wanfala partner.

Loving Kaonsel From God

4. God provaedem wanem help saed long wei for chusim wanfala marit partner?

⁴ Loving Father bilong iumi long heven, Jehovah, provaedem Word bilong hem for kaonselem iumi long evri samting. Hem sei: “Mi, Jehovah, mi nao God bilong iufala, Datwan wea teachim iufala for helpem iufala seleva, Datwan wea mekem iufala followim road wea iufala mas wakabaot long hem.” (Isaiah 48:17) So, iumi no sapraes for faendem insaed Bible best kaonsel for helpem iumi chusim marit partner. Jehovah wantem marit bilong iumi for hapi and for stap olowe. Dastawe, hem provaedem help for iumi minim and followim kaonsel hia. Waswe, iumi no expectim kaen samting olsem from loving Creator bilong iumi?—Psalm 19:8.

5. Wanem nao important tumas for hapi olowe long marit?

⁵ Hem purpose bilong Jehovah taem hem startim marit, for datwan mas for olowe. (Mark 10:6-12; 1 Corinthians 7:10, 11) Dastawe “hem heitim wei for divorce,” and “fornication” nomoa hem only reason hem bae letem. (Malachi 2:13-16; Matthew 19:9) So, for chusim wanfala marit partner hem wanfala barava important disison long laef and no samting for ting nating long hem. No staka nara disison wea man mekem savve givim barava hapi or sorre olsem marit. Nomata wei for chus gud savve mekem laef kamap moabeta and man satisfae, for chus long wei wea no wise savve givim sorre for olowe. (Proverbs 21:19; 26:21) For go ahed hapi, hem important for chus long wisefala wei and willing for keepim datfala promis, bikos God startim marit olsem wei for fren wea bae go ahed gud sapos tufala wan mind and waka tugeta.—Matthew 19:6.

6. Why nao olketa young man and woman barava need for careful taem olketa chusim partner, and hao nao olketa savve mekem wisefala disison?

⁶ Olketa young man and woman need for barava careful for no letem lukluk and strongfala feeling affectim fasin for luksavve taem olketa chusim partner. Tru nao, wei for fren wea garem faondeson long kaen samting olsem savve kwiktaem kamap nogud mekem man les or maet heitim partner. (2 Samuel 13:15) Long narasaed, iumi savve mekem grow strongfala love taem iumi savve gud long partner bilong iumi and savve moabeta long iumiseleva tu. Iumi need for luksavve tu hao best samting for iumi maet no evritaem samting wea heart bilong iumi laekem firstaem. (Jeremiah 17:9) Dastawe kaonsel bilong God long Bible hem important tumas. Hem helpem iumi for luksavve hao for mekem olketa wisefala disison long laef. Man for raetem Psalm talem disfala toktok bilong Jehovah: “Mi bae mekem iu for garem fasin for luksavve and teachim iu long wei wea iu mas followim. Mi bae givim advaes and lukluk long iu.” (Psalm 32:8; Hebrews 4:12) Nomata marit savve satisfaem need wea iumi born witim for love and fren, hem garem tu samfala challenge wea needim man for mature and garem fasin for luksavve.

7. Why nao samfala no acceptim kaonsel from Bible for chusim partner, bat diswan savve lead go long wanem?

⁷ Hem wise for obeyim samting wea Man Wea Startim marit talem saed long wei for chusim partner. Bat, iumi maet les taem iumi kasem kaonsel from parents or olketa Christian elder. Iumi maet feel olsem olketa no minim iumi gud, and strongfala feeling for samting wea iumi wantem maet barava muvim iumi for followim samting heart laekem. Gogo, taem iumi feisim olketa tru samting long laef, maet iumi sorre iumi no obeyim wisefala kaonsel for helpem iumi. (Proverbs 23:19; 28:26) Gogo maet iumi insaed marit wea no garem love, witim olketa pikinini wea iumi kanduit lukaftarem gud, and maet partner wea no biliv tu. Hem sorre samting sapos wei for marit wea fit for givim iumi bigfala hapi hem kamap samting wea kosim bigfala pain!

Love for God—Wanfala Important Part

8. Hao nao wei for lovem God savve helpem marit go ahed strong and givim hapi?

⁸ Hem tru, strongfala feeling for laekem each other savve strongim wanfala marit. Bat for tufala agree long olketa mark saed long fasin and tingting hem moa important for mekem wanfala marit go ahed strong and givim hapi. Wei wea tufala evriwan lovem Jehovah God savve strongim klos wei for fren and mekem wan mind kamap long wei wea no eni nara samting savve duim. (Ecclesiastes 4:12) Taem tru worship bilong Jehovah hem main samting long laef bilong wanfala Christian hasband and waef, tufala bae wan mind saed long spiritual, mind, and fasin. Tufala studyim Word bilong God tugeta. Tufala prea tugeta, and datwan mekem heart bilong tufala olsem wan. Tufala go tugeta long olketa Christian meeting and waka tugeta long field ministry. Evri samting hia hem help for joinim tufala long spiritual wei and mekem tufala moa klos. Moa important winim datwan, hem bringim blessing bilong Jehovah.

9. Wanem nao Abraham duim for faendem waef for Isaac, and wanem nao kamaot from datwan?

⁹ From fasin bilong hem for lovem God, faithful laen dadi Abraham want for mekem God hapi taem hem redy for chusim waef for son bilong hem Isaac. Long servant bilong hem wea hem trustim, Abraham sei: “Iu mas promisim mi front long Jehovah, God bilong heven and God bilong earth, hao iu bae no tekem wanfala waef for son bilong mi from olketa dota bilong olketa Canaanite wea stap raonem mi, bat iu bae go long kantri bilong mi and long olketa relative bilong mi, and iu bae barava tekem wanfala waef for son bilong mi, for Isaac. . . . [Jehovah] bae sendem angel bilong hem for go firstaem long iu, and iu bae barava tekem wanfala waef for son bilong mi from there.” Gogo Rebekah hem wanfala nambawan waef, wea Isaac barava lovem.—Genesis 24:3, 4, 7, 14-21, 67.

10. Olketa wanem responsibility nao Bible markem for hasband and waef?

¹⁰ Sapos iumi nao olketa Christian wea no marit, fasin for lovem God bae helpem iumi for mekem grow olketa fasin wea bae mekem iumi fit for kasem olketa mark bilong Bible for marit. Midolwan olketa samting wea hasband and waef mas duim hem olketa hia wea aposol Paul talem: “Letem olketa waef stap anda long hasband bilong olketa olsem long Lord  . . . Olketa hasband, go ahed for lovem waef bilong iufala, olsem Christ tu hem lovem kongregeson and givim laef bilong hem for kongregeson  . . . Olketa hasband mas lovem waef bilong olketa olsem olketa seleva. . . . Letem evriwan long iufala wanwan lovem waef bilong hem olsem hemseleva; long narasaed, waef mas garem bigfala respect for hasband bilong hem.” (Ephesians 5:22-33) Olsem iumi lukim, olketa word bilong Paul from God mekhae long need for love and respect. For obeyim disfala kaonsel man mas fraet long Jehovah. Mas live followim promis witim full heart nomata long gud or hardfala taem. Olketa Christian wea ting for marit shud fit for keepim disfala responsibility.

Disaedem Wanem Taem for Marit

11. (a) Bible givim wanem kaonsel abaotem wanem taem man shud marit? (b) Wanem example nao showimaot hem wise for followim kaonsel bilong Bible long 1 Corinthians 7:36?

¹¹ For savve wanem taem iumi redy for marit hem barava important. From diswan hem difren for evriwan, Bible no markem age. Bat, hem showim hao, hem moabeta for weit go kasem taem iumi “ovarem finis young laef,” taem strongfala feeling for laekem sex savve affectim gudfala judgment. (1 Corinthians 7:36) Michelle hem sei: “Samfala taem hem hard for followim disfala kaonsel taem mi lukim olketa fren bilong mi frenim narawan and marit, nomata planti teenager yet. Bat mi luksavve disfala kaonsel hem from Jehovah, and hem talem nomoa samting for helpem iumi. Taem mi weit for marit, mi fit for tingim wei wea mi fren witim Jehovah and mi kasem samfala savve long laef, wea iu kanduit garem taem iu teenager. Samfala year bihaen, mi moa redy for deal witim olketa responsibility and problem wea kamap insaed marit.”

12. Why nao hem wise for no hariap for marit taem iu young?

¹² Olketa wea hariap for marit taem olketa barava young planti taem faendaot hao samting wea olketa needim and laekem hem change taem olketa kamap mature. Long datfala taem olketa luksavve hao samting wea olketa laekem firstaem hem no important distaem. Wanfala young Christian disaed strong hem bae marit taem hem 16 year. Granmami bilong hem marit taem hem 16 year, and mami bilong hem tu. Taem wanfala young man wea hem laekem no willing for maritim hem long datfala taem, hem chusim narawan wea willing. Bat, bihaen samfala year, hem barava sorre long disison wea hem kwiktaem mekem.

13. Olketa wea marit early tumas planti taem short long wanem?

¹³ Taem man ting for marit, hem important for minim long mature wei evri samting wea insaed diswan. For marit early tumas savve bringim planti problem wea tufala young wan maet barava no savve hao for deal witim. Tufala maet short long savve or no mature for deal witim olketa hevi bilong marit and for bringimap olketa pikinini. Iumi shud marit nomoa taem iumi redy saed long body, mind, and spiritual wei for acceptim disfala wei for fren for olowe.

14. Wanem nao man needim for deal witim olketa problem insaed marit?

¹⁴ Paul raet hao olketa wea marit “bae kasem trabol long body.” (1 Corinthians 7:28) Olketa problem bae kamap bikos tufala garem difren fasin, and tingting bae difren. From olketa man no perfect, hem maet hard for iumi fulfillim part wea Bible markem for iumi insaed long marit. (1 Corinthians 11:3; Colossians 3:18, 19; Titus 2:4, 5; 1 Peter 3:1, 2, 7) Hem needim man wea mature and stedy long spiritual wei for lukaotem and followim kaonsel from God for stretem olketa problem long loving wei.

15. Wanem samting nao parents savve duim for redyim olketa pikinini for marit? Givim example.

¹⁵ Parents savve redyim olketa pikinini for marit long wei for helpem olketa minim hao hem important for followim kaonsel from God. Thru long gudfala wei for iusim Bible and olketa Christian pablikeson, parents savve helpem pikinini bilong olketa for disaed sapos olketa seleva, or samwan wea olketa frenim, redy for mekem marit promis.a Blossom wea eitin year tingse hem lovem wanfala young man long kongregeson bilong hem. Hem full-taem pioneer minister, and tufala laek for marit. Bat parents bilong hem askem hem weit for wanfala year, from olketa tingse hem young tumas. Bihaen, Blossom hem raet: “Mi barava thankiu mi lisin long datfala wise advaes. Insaed datfala year, mi kamap mature lelebet and start for luksavve hao disfala young man no garem olketa fasin wea fitim gudfala marit partner. Gogo hem lusim organization, and mi missim barava nogud samting long laef bilong mi. Hem nambawan samting for garem wise parents wea iu savve trustim judgment bilong olketa!”

‘Marit Only Insaed Long Lord’

16. (a) Long wanem wei nao maet olketa Christian kasem test for ‘marit insaed long Lord’? (b) Taem temptation kamap for maritim man wea no biliv, olketa Christian shud ting raonem wanem samting?

¹⁶ Kaonsel bilong Jehovah for olketa Christian hem barava klia: ‘Marit only insaed long Lord.’ (1 Corinthians 7:39) Christian parents and olketa pikinini bilong olketa maet kasem test long diswan. Long wanem wei? Young pipol maet laek for marit, bat maet no eni partner wea fitim stap insaed kongregeson. Maet hem luk olsem. Long wanfala area maet moa woman stap winim man, or maet no eniwan wea fitim long datfala area. Wanfala young man wea no member bilong kongregeson and dedicate finis maet interest long wanfala young Christian woman (or woman aotsaed maet interest long wanfala brata), and hevi hem kamap for no tingim olketa standard wea Jehovah putim. Long taem olsem, hem bae gud for ting raonem example bilong Abraham. Wanfala wei wea hem keepim gudfala wei for fren witim God hem taem hem mek sure son bilong hem Isaac maritim wanfala tru worshiper bilong Jehovah. Isaac duim sem samting for son bilong hem Jacob. Diswan needim hard waka bilong evriwan, bat hem mekem God hapi and givim blessing bilong hem.—Genesis 28:1-4.

17. Why nao wei for maritim man wea no biliv savve barava nogud, and wanem nao main important reason for ‘marit only insaed long Lord’?

¹⁷ Samfala taem, gogo man wea no biliv hem kamap wanfala Christian. Nomata olsem, planti taem wei for maritim man wea no biliv hem barava nogud. Olketa wea join tugeta long wei wea no fitim no sharem olketa sem biliv, principle, or goal. (2 Corinthians 6:14) Diswan savve spoelem wei for story tugeta and hapi insaed long marit. Olsem example, wanfala Christian woman barava sorre hao bihaen long meeting wea buildim hem ap, hem no savve go bak long haos and storyim spiritual samting tugeta witim partner bilong hem wea no biliv. Bat samting wea moa important hem hao wei for ‘marit insaed long Lord’ hem minim man hem loyal long Jehovah. Taem iumi obeyim Word bilong God, heart bilong iumi no judgem iumi, from iumi duim “samting wea hem hapi long hem.”—1 John 3:21, 22.

18. Taem man ting for marit, hem mas ting strong long olketa wanem important samting, and why nao olsem?

¹⁸ Taem man ting for marit, main samting for ting raonem hem gudfala and spiritual fasin bilong partner wea hem chusim. Christian fasin, witim love for God and wei for worshipim hem witim full soul, hem barava moa important winim naesfala lukluk. God appruvim olketa wea tinghae long and fulfillim responsibility for olsem marit partner wea strong long spiritual wei. And nambawan strong wea tufala savve kasem hem from wei wea tufala evriwan lovem God and acceptim evribit kaonsel bilong hem. Diswan hem honorim Jehovah, and mekem marit start long wanfala strongfala spiritual faondeson wea bae helpem tufala go ahed strong for fren tugeta.

[Footnote]

Hao Nao Bae Iu Ansa?

• Why nao iumi needim kaonsel bilong God for chusim wanfala gudfala marit partner?

• Hao nao fasin for lovem God savve help for strongim marit?

• Hao nao parents savve redyim pikinini bilong olketa for marit?

• Why nao hem important for ‘marit only insaed long Lord’?

[Olketa Piksa long page 17]

For followim kaonsel bilong God for chusim partner bilong iu savve givim bigfala hapi

[Olketa Piksa long page 18]

Olketa rich blessing kam from wei for ‘marit only insaed long Lord’