Wei wea Iu Fit Hem Showaot Long Nara Pipol?

‘Mi no wari long wanem nara pipol tingim!’ Taem kros or wei for wikdaon kamap, maet iu faendem iuseleva tok stret olsem. Bat taem datfala feeling hem finis, iu maet wari moa bihaen. Why? Bikos planti long iumi savve warim hao nara pipol ting abaotem iumi.

TRU NAO, iumi mas tingim feeling bilong nara pipol. Olsem olketa Christian, olketa minister wea Jehovah God appointim, iumi mas tingim hao nao nara pipol ting long iumi. Tingim, iumi nao “samting for disfala world lukluk long hem.” (1 Corinthians 4:9) Long 2 Corinthians 6:3, 4, iumi faendem gudfala kaonsel bilong aposol Paul: “Mifala no givim eni reason for mekem man stambol, mekem no eniwan savve faendem rong long ministry bilong mifala; bat long evri wei mifala showimaot mifala olketa minister bilong God wea fit.”

Bat, wanem nao hem minim for showimaot iumi fit front long nara pipol? Waswe, hem minim for apim seleva or mekem pipol lukluk long iumi and savve wanem iumi garem? Nomoa. Bat iumi need for followim toktok long 1 Peter 2:12: “Keepim fasin bilong iufala gud midolwan long olketa nation, mekem, long samting wea olketa tok againstim iufala olsem nogud pipol, olketa savve lukim gudfala waka bilong iufala and givim glory long God.” Olketa Christian showimaot olketa fit taem olketa letem fasin bilong olketa for talemaot diswan. Diswan bringim praise, no long iumi, bat long God. Nomata olsem, wei for showimaot long nara pipol hao iumi fit savve helpem iumiseleva tu. Letem iumi lukluk long thrifala point wea maet hem tru long iu.

Olsem Wanfala wea Fit for Marit

Tingim marit olsem example. Hem wanfala gift from Jehovah God, man “wea evri famili long heven and long earth kasem nem bilong olketa.” (Ephesians 3:15) Maet iu hope for marit wan day. Sapos olsem, hao nao iu showimaot iuseleva fit for marit? Hao nao pipol ting long iu olsem wanfala single Christian man or woman?

Staka famili long samfala kantri barava ting strong long diswan. Olsem example, long Ghana, taem man and woman laek for marit, hem kastom for tufala talem diswan long dadi and mami bilong tufala. Then, dadi and mami bilong tufala bae talem long olketa nara famili member. Then famili bilong man bae go ahed for faendaot long datfala ples hem wanem kaen woman. Taem dadi and mami barava sure hao disfala woman hem fit, tufala bae talem long famili bilong disfala woman abaotem tingting bilong son bilong tufala for maritim datfala dota. Then famili bilong woman hia lukluk moa long wei bilong disfala man bifor olketa agree long disfala marit. Dastawe wanfala toktok bilong Ghana hem sei, “Askem olketa wea shud savve bifor iu marit.”

Waswe long olketa Western kantri, wea hem free for man chusim marit partner bilong hemseleva? Nomata long there, hem bae wise for wanfala Christian man or woman wea mature for herem story bilong olketa wea savve gud long datwan wea maet kamap partner, olsem dadi and mami or olketa mature fren. Olsem datfala buk Secret for Kasem Hapi Famili hem talem, wanfala young woman maet ask olsem: “‘Waswe, pipol ting gud long disfala man? Hu nao olketa fren bilong hem? Waswe, hem savve showimaot fasin for bossim seleva? Hao nao hem deal witim olketa olo? Wanem kaen famili nao hem kam from? Hao nao hem fren witim famili bilong hem? Hao nao tingting bilong hem long saed bilong selen? Waswe, hem savve drinkim tumas alcohol? Waswe, hem savve kros kwiktaem, or raf? Wanem kaen responsibility nao hem garem insaed long kongregeson, and hao nao hem deal witim? Waswe, mi fit for barava respectim hem?’—Leviticus 19:32; Proverbs 22:29; 31:23; Ephesians 5:3-5, 33; 1 Timothy 5:8; 6:10; Titus 2:6, 7.”a

Long sem wei tu wanfala man bae laek for ask abaotem eni Christian woman wea hem ting for maritim. Olsem long Bible taem, Boaz garem sem wei for interest long Ruth, woman wea hem maritim bihaen. Taem Ruth ask olsem: “Hao nao iu hapi long mi mekem iu interest long mi nomata mi woman from difren kantri?” Boaz sei: “Mi kasem full report abaotem evri samting wea iu duim.” (Ruth 2:10-12) Tru nao, Boaz no just lukim seleva nomoa hao Ruth hem wanfala loyal, dedicate, woman wea savve waka hard bat hem herem gudfala story from nara pipol.

Olsem tu, fasin bilong iu nao bae mekem pipol tingim sapos iu fit for marit. So, hao nao iu showimaot iuseleva long disfala wei?

Olsem Wanfala Wakman

Ples for waka hem narafala area wea wei for keepim gud fasin savve helpem iu. Staka pipol tumas aftarem waka. Planti taem olketa sakem olketa wakman wea no herem boss, leit evritaem, and no honest. Olketa kampani maet finisim tu olketa wakman wea garem savve, for katem daon kost. Taem olketa liu lukaotem niu waka, olketa savve faendem hao olketa kampani bae chek moa witim first boss bilong olketa for faendaot long waka, tingting, and savve bilong olketa. Planti Christian win for kasem praise from boss bilong olketa from olketa showimaot respect, wei wea olketa werem kaleko, gudfala fasin, and olketa nambawan Christian fasin.

Wanfala nao hem honest fasin—wan wea planti boss tinghae long hem. Olsem aposol Paul, iumi want for “duim evri samting long honest wei.” (Hebrews 13:18) Long wanfala mining company long Ghana, olketa reportim fasin for steal. Supervisor long treatment plant, wea hem wanfala Witness, keepim waka bilong hem taem olketa sakem olketa nara wan. Why nao olsem? Olketa boss lukim honest fasin bilong hem insaed olketa year wea go pas. Olketa savve gud long wei wea hem waka hard and respectim boss. Tru nao, stretfala fasin bilong hem nao sevem waka bilong hem!

Wanem nao samfala samting wea wanfala Christian savve duim for showimaot hem fit long waka? Lane for savve gud long eni waka wea olketa givim long iu. (Proverbs 22:29) Mas willing for waka hard and duim long gudfala wei. (Proverbs 10:4; 13:4) Deal witim boss and supervisor bilong iu witim respect. (Ephesians 6:5) Followim taem, honest fasin, for duim waka long gudfala wei, and for waka hard, hem olketa fasin wea olketa boss tinghae long hem, and olketa fasin hia savve helpem iu for faendem waka nomata no staka waka stap.

Olketa Privilege Long Kongregeson

Winim enitaem bifor, distaem iumi needim olketa mature man for lead insaed Christian kongregeson. Wanem nao reason? Isaiah talem profesi olsem: “Mekem ples bilong tent bilong iu kamap moa big. And letem olketa mekem big tent bilong nambawan tabernacle bilong iu.” (Isaiah 54:2) Kongregeson bilong Jehovah evriwea long world hem go ahed for grow, wea fulfillim disfala profesi.

So sapos iu wanfala Christian man, hao nao iu savve showimaot iu fit for olketa savve appointim iu? Tingim example bilong young man Timothy. Luke reportim hao “olketa brata long Lystra and Iconium givim gudfala report abaotem [Timothy].” Tru nao, thru long gudfala fasin bilong hem, disfala young man mekem pipol long tufala difren taon for tok gud abaotem hem. Dastawe, Paul invaetem Timothy for joinim hem for gogo raon long ministry.—Acts 16:1-4.

Distaem hao nao man savve ‘trae for kasem waka bilong overseer’ long gudfala wei, followim wei bilong God? Hem barava no long wei for campaign for olketa appointim hem bat for mekem grow olketa spiritual fasin wea man needim for disfala responsibility. (1 Timothy 3:1-10, 12, 13. Titus 1:5-9) Hem savve showimaot hem “wantem gudfala waka” taem hem share evribit long waka for preach and mekem disaepol. (Matthew 24:14; 28:19, 20) Olketa Christian man wea showimaot olketa fit for garem responsibility barava showimaot interest long living bilong olketa spiritual brata. Olketa followim disfala advaes bilong aposol Paul: “Helpem olketa holy wan taem olketa needim samting. Followim wei for showimaot welkam.” (Romans 12:13) Taem hem duim olsem, wanfala Christian man savve barava ‘showimaot hemseleva olsem minister bilong God.’

Long Evritaem

For showimaot long nara pipol hao iumi fit hem no minim for oso-oso or “for mekem man hapi.” (Ephesians 6:6) Really, hem minim for iumi showimaot long Creator bilong iumi, Jehovah God, hao iumi fit, taem iumi barava followim olketa law and principle bilong hem. Sapos iu mekem grow spiritual fasin bilong iu and strongim wei wea iu fren witim Jehovah God, olketa narawan bae luksavve hao wei wea iu deal witim olketa famili member bilong iu, olketa wakfren, and olketa nara Christian hem kamap moabeta. Olketa bae luksavve tu long wei wea iu stedy and balance, hao iu garem gudfala tingting, savve bilong iu long hao for deal witim responsibility and hambol fasin bilong iu. Olketa bae lovem and respectim iu from diswan and, moa important, Jehovah God bae hapi long iu bikos iu showimaot long nara pipol hao iu fit!

[Footnote]

[Piksa long page 19]

Planti dadi and mami faendaot abaotem samwan wea dota bilong olketa hem laek for maritim

[Piksa long page 20]

Wanfala brata showimaot hem fitim privilege bilong service taem hem tingim nara pipol