Stap Olsem Pipol wea Garem Gudfala Savve
1 Taem Jesus askem fofala fisherman for kamap disaepol bilong hem, olketa no tingting moa bat ‘semtaem nomoa olketa followim hem nao.’ (Matt. 4:18-22) Taem Saul from Tarsus kamap disaepol and eye bilong hem kamap gud moa, hem tu no tingting moa bat, “stretawe hem go long olketa sinagog and start for preach abaotem Jesus.” (Acts 9:20) Taem wanfala day go finis, hem no savve kam bak moa. Dastawe, hem important for iumi iusim taem bilong iumi “olsem pipol wea garem gudfala savve.”—Eph. 5:15, 16.
2 Seknomoa Samting Happen: Chance wea iumi garem for worshipim Jehovah tuday maet no kamap tumoro. (Jas. 4:14) Wei wea ‘seknomoa samting happen’ savve kasem iumi evriwan. (Eccl. 9:11) And long disfala world iumi no savve missim ‘olketa day bilong trabol’ wea kam taem iumi gogo for olo and wea mekem hem hard for duim staka samting for worshipim Jehovah. (Eccl. 12:1) Man wea garem gudfala savve nao bae no weit longtaem for dedicate long God or weit for evri samting stret bifor hem duim big go moa preaching waka wea hem fit for duim. (Luke 9:59-62) Abraham stap gud and hem dae taem hem ‘olo and hapi,’ bikos hem stap followim gudfala savve and hem barava faithful long Jehovah.—Gen. 25:8.
3 Taem Hem Short: Iumi tu mas stap followim gudfala savve bikos “lelebet taem nomoa hem stap.” (1 Cor. 7:29-31) Klosap nao disfala world bae finis. Klosap nao disfala big waka for hipimap olketa sheepsheep long taem bilong “harvest bilong earth” bae finis. (Rev. 14:15) Iumi mas keakea for no stap olsem man wea letem eni samting and wei for wari spoelem taem bilong iumi for duim preaching. (Luke 21:34, 35) Iumi bae barava hapi taem iumi tingim bak bigfala waka iumi duim long disfala harvest waka!
4 Iumi mas gohed for lukaotem eni chance for duim eni nambawan waka for Jehovah. Iumi mas disaed strong “taem hem ‘Tuday’ yet” for duim evri waka wea iumi savve duim for Jehovah. (Heb. 3:13) Taem iumi duim olsem, diswan showimaot iumi garem gudfala savve, bikos “man wea duim wanem God laekem bae stap for olowe.”—1 John 2:17.