‘Love Bilong Iufala Evriwan Hem Gohed for Kamap Big’
LONG year 2004, samfala natural disaster kasem Japan. Samfala long olketa hem cyclone, flood and earthquake. Olketa disaster hia barava spoelem laef bilong staka pipol and Olketa Jehovah’s Witness tu. (Ecclesiastes 9:11) Nomata olsem, olketa trabol hia mekem chance kamap for olketa Witness showimaot love long each other.—1 Peter 1:22.
Olsem example, long July wanfala river long Japan hem flood bikos long bigfala rain. Disfala flood hem spoelem winim 20-fala haos bilong Olketa Jehovah Witness. Long wanfala Kingdom Hall wata hem fulap insaed go kasem samting olsem 1 meter hae winim floor. Kwiktaem nomoa olketa Witness from nara kongregeson kam for help. Plande handred pipol klinim olketa haos wea fulap witim mud. Olketa barava klinim gud and repairim datfala Kingdom Hall insaed tufala week nomoa.
Long October 23, wanfala earthquake wea strong bilong hem 6.8 long Richter scale kasem sem area. Winim 100,000 pipol kasem help for lusim haos bilong olketa and 40 pipol nao dae. Datfala ples no garem eni wata, gas, and electric. Kingdom Hall wea olketa repairim nating foldaon, nomata hem stap 50 kilometer nomoa from ples wea earthquake hem start. Semtaem hem kamap main ples for pipol kasem help for lelebet taem. Olketa Christian overseer kwiktaem faendaot sapos olketa Christian brata and sista bilong olketa stap sef, and olketa hapi for savve no eniwan garekil or dae. Early morning long next day, sixfala Witness wea flood spoelem olketa long July hapi for help for tekem wata and kaikai go long olketa ples wea needim. No staka hour bihaen datfala earthquake olketa brata hia kasem samting olketa needim.
Wanfala overseer sei: “Pipol wea flood spoelem olketa ting long wei wea olketa helpem pipol wea earthquake spoelem, hem chance for showimaot thankiu for help wea olketa kasem bifor. Olketa start for waka long early morning gogo kasem barava naet nao. And feis bilong olketa showimaot olketa barava hapi nomoa!”
Nomata flood or earthquake, hem no savve spoelem love wea Olketa Jehovah’s Witness garem for each other. Bat taem disaster kamap, olketa Christian lukim samting wea aposol Paul talem long olketa Christian long Thessalonica: “Love bilong each wan and iufala evriwan for narawan hem gohed for kamap big.”—2 Thessalonians 1:3.