Bible Buk Namba 14​—2 Chronicles

Man wea Raetem: Ezra

Ples Hem Raetem: Jerusalem (?)

Taem Hem Finis Raetem: c. 460 B.C.E.

Taem Hem Storyim: 1037–537 B.C.E.

FROM 1 Chronicles and 2 Chronicles stap tugeta insaed wanfala buk bifor, olketa samting wea stap long chapter bifor abaotem history bilong hem, man wea raetem, taem wea olketa raetem, wei wea hem fit for stap insaed long Bible, and wei wea hem tru evribit, olketa fitim tufala buk evriwan. Olsem evri pruv showimaot, Ezra hem finis raetem 2 Chronicles long year 460 B.C.E., maet long Jerusalem. Hem goal bilong Ezra for keepim gud evri information bilong history wea stap long danger for lus. Witim help bilong holy spirit, and from hem garem gudfala savve long wei for lukaotem and preparem evri information for raetem history, diswan helpem Ezra for raetem record wea stret evribit. Hem keepim samting wea hem savve hem trufala history for future. Waka wea Ezra duim hem barava fitim datfala taem, from olketa need tu for kolektem tugeta evri holy raeting long Hebrew wea olketa raetem long olketa handred year wea go pas.

² Olketa Jew long taem bilong Ezra barava kasem gudfala samting from buk wea Ezra raetem witim help bilong spirit bilong God. Hem raetem for teachim olketa and encouragem olketa for go ahed strong. Thru long comfort from olketa Scripture, diswan savve givim olketa hope. Olketa acceptim buk bilong Chronicles olsem part long olketa buk bilong Bible. Olketa savve olketa fit for trustim. Olketa fit for chekim diswan witim olketa nara raeting wea kam from God and plande nara buk bilong history wea Ezra hem iusim. Nomata olketa letem olketa nara buk bilong history for finis, olketa barava keepim gud Chronicles. Olketa wea transleitim Septuagint putim Chronicles olsem part bilong Hebrew Bible.

³ Jesus Christ and olketa wea raetem Christian Greek Scripture acceptim olsem tru and hem kam from God. Iumi no daot Jesus hem tingim toktok wea olketa raetem long 2 Chronicles 24:21 taem hem tokdaonem Jerusalem from olketa killim dae olketa profet and servant bilong Jehovah. (Matt. 23:35; 5:12; 2 Chron. 36:16) Taem James kolem Abraham “fren bilong Jehovah,” maet hem tingim toktok wea Ezra talem long 2 Chronicles 20:7. (Jas. 2:23) Disfala buk garem tu olketa profesi wea fulfill evribit.—2 Chron. 20:17, 24; 21:14-19; 34:23-28; 36:17-20.

⁴ Wei for studyim olo samting tu hem pruvim wei wea 2 Chronicles hem tru. Taem olketa digim graon long ples wea Babylon hem stap bifor, olketa faendem samfala clay ston wea storyim samting wea happen taem Nebuchadnezzar hem rul, wanfala hem story abaotem “Yaukin, king bilong land bilong Yahud,” hem nao, “Jehoiachin, king bilong land bilong Judah.”a Diswan hem fitim story long Bible abaotem taem wea olketa tekem Jehoiachin go long Babylon olsem prisoner long mek-seven year bilong rul bilong Nebuchadnezzar.

⁵ Second Chronicles hem lukluk long olketa samting wea happen long Judah start from taem Solomon hem rul, wea start long year 1037 B.C.E., go kasem taem wea Cyrus hem givim law, long year 537 B.C.E., for buildim moa haos bilong Jehovah long Jerusalem. Insaed disfala 500-year history, only taem wea hem story abaotem ten-tribe kingdom hem long taem wea hem join insaed samting wea happen long Judah nomoa, bat hem nating storyim taem wea datfala kingdom long north hem finis evribit long year 740 B.C.E. Why nao olsem? Bikos main interest bilong priest Ezra hem for worship bilong Jehovah stap long stretfala ples bilong hem, haos bilong Hem long Jerusalem, and long kingdom bilong laen bilong David, wea Jehovah wakem covenant bilong Hem witim. Dastawe nao Ezra interest long kingdom long south nomoa long saed for sapotim tru worship and for weitim man wea bae rul for kamaot from Judah.—Gen. 49:10.

⁶ Ezra hem tingim evriting long gudfala wei. Long 36 chapter bilong 2 Chronicles, first 9-fala chapter story abaotem rul bilong Solomon, and 6-fala full chapter long olketa hia story abaotem wei wea olketa preparem and dedicatem haos bilong Jehovah. Hem no storyim wei wea Solomon lusim Jehovah. Long nara 27 chapter, 14-fala chapter storyim faevfala king wea followim example bilong David long wei for worshipim Jehovah evribit: Asa, Jehoshaphat, Jotham, Hezekiah, and Josiah. Nomata insaed 13-fala nara chapter, Ezra careful for mekhae long olketa gud point bilong olketa nogud king. Evritaem hem mekhae long samting wea olketa duim for startim moa and keepim gud trufala worship. Diswan barava muvim iumi!

WEI WEA HEM HELPEM IUMI

³⁴ Second Chronicles joinim strongfala pruv bilong hem witim olketa nara witness wea storyim disfala important taem, 1037-537 B.C.E. And tu, hem givim nambawan information wea no stap long olketa nara buk bilong Bible history, olsem long 2 Chronicles chapter 19, 20, and 29 go kasem 31. Information wea Ezra raetem hem strongim olketa main and important samting bilong history bilong datfala nation, olsem waka bilong priest and service wea olketa duim, temple, and Kingdom covenant. Diswan hem helpem datfala nation for wan mind long hope for Messiah and Kingdom bilong hem.

³⁵ Olketa lastfala verse bilong 2 Chronicles (36:17-23) pruvim evribit wei wea Jeremiah 25:12 hem fulfill, and tu, hem showimaot hao for kaontem full 70 year from taem wea datfala ples hem finis evribit go kasem taem wea worship bilong Jehovah hem start moa long year 537 B.C.E. So, datfala taem for finis evribit hem start long year 607 B.C.E.b—Jer. 29:10; 2 Ki. 25:1-26; Ezra 3:1-6.

³⁶ Second Chronicles garem strongfala kaonsel for olketa wea wakabaot insaed long Christian faith. Plande king bilong Judah olketa gud taem olketa start rul, bat then olketa followim olketa wicked wei. Disfala raeting bilong history barava showimaot hao wei for win hem depend long wei for stap faithful long God! Dastawe iumi kasem warning for no kamap “datkaen wea muv bak for finis evribit, bat datkaen wea garem faith for keepim soul laef.” (Heb. 10:39) King Hezekiah tu kamap praod bihaen hem kamap gud moa from sik bilong hem, and only bikos hem kwiktaem for mekem hemseleva kamap hambol nao kros bilong Jehovah no kasem hem. Second Chronicles mekhae long olketa nambawan fasin bilong Jehovah and hem liftimap nem and rul bilong hem. Full history hia hem join witim wei for worshipim Jehovah evribit. Bikos hem mekhae long laen bilong king bilong Judah, hem strongim hope bilong iumi for lukim klinfala worship kamap hae anda long Kingdom bilong Jesus Christ wea bae stap olowe, datfala loyal “son bilong David.”—Matt. 1:1; Acts 15:16, 17.

[Olketa Footnote]