Long olketa Hebrew Christian long first-century, aposol Paul raet olsem: “So wanfala sabbath rest hem stap yet for pipol bilong God. From man wea go insaed long rest bilong God hem tu rest from olketa waka bilong hemseleva, olsem God duim from waka bilong hemseleva. Dastawe iumi mas duim barava best bilong iumi for go insaed long datfala rest.”—Hebrews 4:9-11.

Taem Paul story abaotem wei wea God hem rest from waka bilong Hem, luk olsem hem story abaotem toktok wea stap long Genesis 2:2, wea iumi readim: “And long mek-seven day God hem finis long samting wea hem wakem, and hem rest long mek-seven day from evri samting wea hem wakem.” Why nao Jehovah hem go ahed for “rest long mek-seven day”? Hem no duim from hem need for feel strong moa bihaen hem duim “evri samting wea hem wakem.” Nextfala verse helpem iumi for minim: “And God hem blessim mek-seven day and mekem hem holy, bikos long datfala day nao hem go ahed for rest from evri waka bilong hem wea God creatim witim purpose for wakem olketa samting.”—Genesis 2:3; Isaiah 40:26, 28.

Datfala “mek-seven day” hem difren from eniwan long firstfala six day long wei wea hem nao day wea God blessim and mekem holy, wea minim, hem markem, or dedicatem for wanfala spesol purpose. Wanem nao datfala purpose? Firstaem, God talemaot purpose bilong hem abaotem olketa man and earth. God sei olsem long firstfala man and waef bilong hem: “Garem pikinini and kamap planti and fulimap earth and lukaftarem, and olketa fish bilong sea and olketa bird bilong heven and evri living samting wea muv long graon mas stap anda long iufala.” (Genesis 1:28) Nomata God givim olketa man and disfala earth wanfala nambawan start, hem bae tek-taem for full earth change for kamap wanfala paradaes wea fulap witim perfect famili bilong olketa man, followim purpose bilong God firstaem. So, long “mek-seven day,” God hem rest, or finis, from olketa waka bilong hem for creatim earth for mekem olketa samting wea hem creatim finis for kamap followim will bilong hem. Kasem end bilong datfala mek-seven “day,” evri samting wea God talem bae kamap followim purpose bilong hem. Datfala rest hem for hao long?

Taem hem tingim datfala nambawan hope, Paul explainim wei wea man maet go insaed rest bilong God. Hem raet: “Man wea go insaed long rest bilong God hem rest tu from olketa waka bilong hemseleva.” Diswan showimaot hao nomata olketa man start long perfect wei, olketa nating go insaed rest bilong God. Diswan hem bikos for shortfala taem nomoa Adam and Eve followim rest bilong God long “mek-seven day” long wei for acceptim arrangement bilong hem for tufala. Bat, tufala againstim and want for kamap independent from God. Tru nao, tufala duim samting wea Satan wantem winim wei for followim loving direction bilong God. (Genesis 2:15-17) Samting wea kamaot from diswan, tufala lusim chance for stap olowe long paradaes earth. Start from datfala taem, evri man kamap slave long sin and dae.—Romans 5:12, 14.

Wei wea olketa man no obey no stopem purpose bilong God. Rest day bilong hem go ahed yet. Nomata olsem, long loving wei Jehovah provaedem samting—datfala ransom—thru long Son bilong hem, Jesus Christ, mekem evriwan wea acceptim datwan thru long faondeson bilong faith savve luk forward for kamap free and rest from hevi bilong sin and dae. (Romans 6:23) Dastawe Paul encouragem olketa Christian for ‘rest from waka bilong olketa seleva.’ Olketa need for acceptim samting wea God provaedem for salvation and no trae for mekem future bilong olketa followim wei bilong olketa seleva, olsem Adam and Eve duim. Olketa tu need for stap klia long waka bilong olketa for pruvim olketa seleva raeteous.

Wei for no aftarem olketa selfish samting bilong seleva mekem man savve duim will bilong God and savve strongim man. Jesus talemaot disfala invitation: “Kam long mi, iufala evriwan wea waka hard and karem bigfala hevi, and mi bae strongim iufala. Karem yoke bilong mi and lanem samting from mi, from mi garem kwaet fasin and mi hambol long heart, and iufala bae faendem samting for strongim soul bilong iufala. From yoke bilong mi hem kaenfala and lod bilong mi hem no hevi.”—Matthew 11:28-30.

Story bilong Paul abaotem rest bilong God and hao nao man maet go insaed long hem barava encouragem olketa Hebrew Christian long Jerusalem, wea stand strong long planti persecution and wei wea pipol mekfani long faith bilong olketa. (Acts 8:1; 12:1-5) Olsem tu, toktok bilong Paul savve encouragem olketa Christian distaem. Taem iumi luksavve hao promis bilong God for bringim kam paradaes earth hem klosap, iumi tu shud rest from olketa waka bilong iumiseleva and duim best for go insaed datfala rest.—Matthew 6:10, 33; 2 Peter 3:13.