“Kam Klosap Long God”

“Kam klosap long God, and hem bae kam klosap long iufala.”—JAMES 4:8.

1, 2. (a) Planti taem wanem nao olketa man savve talem? (b) Wanem toktok for encouragem man nao James talem, and why nao need kamap for talem datwan?

“GOD hem stap witim iumi.” Toktok hia stap long flag bilong planti nation and uniform bilong olketa soldia tu. “Iumi trust long God” hem stap long staka coin and pepa selen distaem. Planti taem olketa man sei olketa fren gud witim God. Bat waswe, iu agree hao for garem wei for fren olsem minim moa samting winim wei for tok abaotem or raetem olsem saen?

² Bible showimaot hao man fit for fren witim God. Bat hem need for waka hard. Samfala anointed Christian long first century tu need for strongim wei wea olketa fren witim Jehovah God. Christian overseer James mas givim warning long samfala saed long samting wea body wantem and hao olketa lusim wei for klin long spiritual wei. Insaed datfala kaonsel hem talem disfala nambawan toktok for encouragem man: “Kam klosap long God, and hem bae kam klosap long iufala.” (James 4:1-12) Wanem nao James hem minim taem hem talem datfala toktok “kam klosap”?

3, 4. (a) Olketa wea readim leta bilong James long first century maet rememberim wanem, taem olketa lukim toktok “kam klosap long God”? (b) Why nao iumi sure iumi savve fren witim God?

³ James iusim wanfala toktok wea planti long datfala taem savve. Law bilong Moses talem olketa klia instruction long olketa priest abaotem hao pipol bilong Jehovah savve “kam klosap long” hem thru long olketa. (Exodus 19:22) Maet diswan mekem olketa wea readim leta bilong James for tingim moa hao wei for story witim Jehovah hem no samting for ting smol long hem. Jehovah nao garem barava hae position long full universe.

⁴ Long narasaed, wanfala man wea studyim Bible sei, “disfala encouragement [long James 4:8] showimaot wei for barava tingim gud saed.” James savve hao long loving wei Jehovah evritaem invaetem olketa man wea no perfect for kam klosap long Hem. (2 Chronicles 15:2) Sakrifaes bilong Jesus openem go moa datfala wei for kam long Jehovah. (Ephesians 3:11, 12) Distaem, wei for fren witim God hem open for planti million pipol! So, hao nao iumi savve iusim gud disfala nambawan chance? For lelebet taem iumi bae lukim thrifala wei wea iumi savve kam klosap long Jehovah God.

Go Ahed for “Kasem Savve” Abaotem God

5, 6. Hao nao example bilong Samuel showimaot wanem hem insaed long wei for “kasem savve” abaotem God?

⁵ Long John 17:3, Jesus sei: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.” Planti transleison bilong disfala verse difren lelebet from New World Translation. Olketa no sei “kasem savve” long God, bat olketa transleitim datfala word olsem “for savve long” God or “go ahed for savve long” God. Bat, samfala savveman sei mining bilong first Greek languis hem minim samting wea go ahed for olowe, wea savve leadim man for barava savve and klos long narawan.

⁶ Wei for barava savve long God hem no niu samting long taem bilong Jesus. Olsem example, long Hebrew Scripture, iumi readim hao taem Samuel hem wanfala boy, “hem no savve yet long Jehovah.” (1 Samuel 3:7) Waswe, diswan minim Samuel savve lelebet nomoa abaotem God bilong hem? Nomoa. Iumi sure dadi and mami bilong hem and olketa priest teachim hem staka samting finis. Bat, wanfala savveman sei Hebrew word long datfala verse “hem fitim for iusim for wanfala barava klos fren.” Samuel no barava savve and klos fren yet long Jehovah, olsem hem bae duim taem hem serve olsem man for toktok for Jehovah bihaen. Taem Samuel go ahed for growap, hem barava savve long Jehovah, and fren long klos wei witim hem.—1 Samuel 3:19, 20.

7, 8. (a) Why nao iumi shud no fraet for studyim olketa deep teaching bilong Bible? (b) Wanem nao samfala deep truth insaed Word bilong God wea iumi shud studyim?

⁷ Waswe, iu kasem savve abaotem Jehovah witim goal for fren klos witim hem? For duim olsem, iu need for “barava hangre” for spiritual kaikai wea God provaedem. (1 Peter 2:2) No satisfae nomoa for kasem olketa main teaching. Waka hard for kasem olketa teaching bilong Bible wea moa deep. (Hebrews 5:12-14) Waswe, iu fraetem olketa teaching olsem, from iu ting olketa hard tumas for minim? Sapos olsem, remember hao Jehovah hem “Barava Nambawan Teacher.” (Isaiah 30:20) Hem savve hao for teachim olketa deep truth long mind bilong man wea no perfect. And hem savve blessim hard waka bilong iu for minim samting wea hem teachim long iu.—Psalm 25:4.

⁸ Hem gud tumas for lukluk long iuseleva saed long samfala “deep samting bilong God.” (1 Corinthians 2:10) Olketa hia no kaen boring subject wea pipol wea skulim religion and olketa bigman bilong church raoa abaotem. Olketa hia gudfala teaching wea mekem iumi savve long mind and heart bilong loving Father bilong iumi. Olsem example, datfala ransom, datfala “holy secret,” and olketa difren covenant wea Jehovah iusim for blessim pipol bilong hem and fulfillim olketa purpose bilong hem—olketa subject hia and planti moa olketa barava interesting subject for duim research and study long hem.—1 Corinthians 2:7.

9, 10. (a) Why nao hem danger samting for garem praod fasin, and wanem nao bae helpem iumi for stap klia long hem? (b) Long saed bilong savve abaotem Jehovah, why nao iumi shud trae for hambol?

⁹ Taem savve bilong iu long olketa deep spiritual truth kamap moa big, keakea long danger wea kamaot from wei for garem savve—praod fasin. (1 Corinthians 8:1) Praod fasin hem danger samting, from hem mekem olketa man stap farawe from God. (Proverbs 16:5; James 4:6) Remember, no eni man garem eni reason for tokplas abaotem savve wea hem garem. Olsem example, tingim olketa toktok hia from introduction bilong wanfala buk wea storyim olketa niu samting olketa lanem saed long science: “Taem mifala savve long moa samting, mifala barava luksavve hao mifala no savve long planti samting. . . . Evriting mifala lanem hem smol nomoa sapos mifala markem witim wanem mifala no lanem yet.” Kaen hambol fasin olsem hem gud tumas. So, saed long barava bigfala savve—savve abaotem Jehovah God—iumi garem moa reason for stap hambol olowe. Why nao olsem?

¹⁰ Lukim samfala toktok long Bible abaotem Jehovah. “Olketa tingting bilong iu barava deep.” (Psalm 92:5) “Savve bilong [Jehovah] barava winim eniting wea iumi savve talem.” (Psalm 147:5) “No eniwan savve minim wei bilong [Jehovah] for minim samting.” (Isaiah 40:28) “O riches and wisdom and savve bilong God hem deep tumas!” (Romans 11:33) Tru nao, iumi bae nating savve long evri samting abaotem Jehovah. (Ecclesiastes 3:11) Nomata hem teachim iumi planti nambawan samting finis, bae iumi olowe garem staka samting moa for lanem. Tru nao, datwan mekem iumi barava hapi and hambol! So, taem iumi go ahed for lane, iumi want for evritaem iusim savve bilong iumi for kam klosap long Jehovah and helpem nara pipol for duim olsem tu—no olsem wei for mekem iumiseleva hae winim nara pipol.—Matthew 23:12; Luke 9:48.

Showimaot Love Bilong Iu for Jehovah

11, 12. (a) Hao nao savve wea iumi kasem abaotem Jehovah shud affectim iumi? (b) Wanem nao showimaot sapos love wea man garem for God hem tru wan or nomoa?

¹¹ Aposol Paul hem joinim savve witim love. Hem raet olsem: “Diswan nao mi go ahed for prea for hem, for love bilong iufala evritaem kamap moa big long stretfala savve and fasin for luksavve evribit.” (Philippians 1:9) Winim wei for mekem iumi fulap witim praod fasin, evri nambawan truth wea iumi lanem abaotem Jehovah and purpose bilong hem shud mekem love bilong iumi for Father bilong iumi long heven hem grow.

¹² Tru, planti wea sei olketa lovem God no really lovem hem. Maet olketa garem trufala strong feeling insaed heart bilong olketa. Olketa feeling olsem gud tumas sapos man garem followim stretfala savve. Bat wei for garem olketa feeling no minim man hem lovem God. Why nao olsem? Lukim wanem Word bilong God talem abaotem mining bilong kaen love olsem: “Diswan nao mining bilong love bilong God, for iumi obeyim evri komandment bilong hem.” (1 John 5:3) So, love for Jehovah hem tru only taem man showimaot long wei for obey.

13. Hao nao wei for fraet long God bae helpem iumi for showimaot love bilong iumi for Jehovah?

¹³ Wei for fraet long God bae helpem iumi for obeyim Jehovah. Disfala bigfala wei for tinghae and garem deep respect for Jehovah hem kamaot from wei for kasem savve abaotem hem, for lane abaotem holy fasin, glory, paoa, justice, wisdom, and love bilong hem. Wei for fraet olsem hem important tumas sapos man laek for kam klosap long hem. Tru nao, lukim samting wea Psalm 25:14 hem talem: “Klos wei for fren witim Jehovah hem bilong olketa wea fraet long hem.” So sapos iumi garem stretfala wei for fraet for mekem Father bilong iumi long heven no hapi, iumi savve kam klosap long hem. Wei for fraet long God bae helpem iumi for followim wise kaonsel wea stap long Proverbs 3:6: “Long evri samting iu duim, lisin long hem, and hemseleva nao bae stretem gogo bilong iu.” Wanem nao datwan minim?

14, 15. (a) Wanem nao samfala samting wea iumi mas disaedem long evriday living? (b) Hao nao iumi savve disaedem samting long wei wea showimaot iumi fraet long God?

¹⁴ Iu mas disaedem samting evriday, olketa big and smol samting. Olsem example, wanem wei for story nao iu bae duim witim wakfren, skulfren, and olketa neiba? (Luke 6:45) Waswe, bae iu waka hard long samting iu mas duim, or bae iu luk aotem olketa wei for duim datwan bat no waka hard? (Colossians 3:23) Waswe, bae iu kamap moa klos long olketa wea showim lelebet or no eni love for Jehovah, or bae iu luk aotem olketa wei for strongim wei wea iu fren witim spiritual pipol? (Proverbs 13:20) Wanem nao bae iu duim, nomata long olketa smol wei, for saportim olketa samting bilong Kingdom bilong God? (Matthew 6:33) Sapos iu followim olketa principle insaed olketa Scripture hia long olketa samting iu disaedem evriday, then iu barava lisin long Jehovah ‘long evri samting wea iu duim.’

¹⁵ Hem olsem long evri samting wea iumi disaedem, iumi shud letem disfala tingting leadim iumi: ‘Wanem nao Jehovah bae wantem mi for duim? Wanem nao bae mekem hem barava hapi?’ (Proverbs 27:11) For showimaot wei for fraet long hem olsem hem nambawan wei for showimaot love for Jehovah. Wei for fraet long God bae muvim iumi tu for stap klin—long spiritual wei, saed long fasin, and body. Remember, long datfala sem verse wea James encouragem olketa Christian for “kam klosap long God,” hem givim disfala encouragement: “Klinim hand bilong iufala, iufala sinner, and mekem heart bilong iufala kamap klin, iufala wea no sure.”—James 4:8.

16. Wanem samting nao iumi no savve duim taem iumi give long Jehovah, bat wanem nao iumi savve win for duim evritaem?

¹⁶ Tru, wei for showimaot love bilong iumi for Jehovah hem minim moa samting winim wei for no duim nogud samting. Love muvim iumi tu for duim gudfala samting. Olsem example, long wanem wei nao barava bigfala kaenfala fasin bilong Jehovah affectim iumi? James raet olsem: “Evri gudfala present and evri perfect present hem from antap, from hem kam from Father bilong olketa laet long heven.” (James 1:17) Tru, taem iumi givim olketa samting bilong iumi long Jehovah, iumi no mekem hem moa rich. Hem ownim finis evri samting. (Psalm 50:12) And taem iumi givim taem and strong bilong iumi long Jehovah, iumi no duim samting wea hem needim tumas for iumi duim. Nomata sapos iumi no willing for preachim gud nius bilong Kingdom bilong God, hem savve mekem olketa ston for singaot! So, why nao iumi givim material samting, taem, and strong bilong iumi long Jehovah? Main samting nao, long wei olsem iumi showimaot love bilong iumi for hem witim full heart, soul, mind, and strong bilong iumi.—Mark 12:29, 30.

17. Wanem nao savve muvim iumi for hapi for give long Jehovah?

¹⁷ Taem iumi give long Jehovah, iumi shud duim witim hapi, “from God lovem man wea hapi for give.” (2 Corinthians 9:7) Principle wea stap long Deuteronomy 16:17 savve helpem iumi for hapi for give: “Datfala present long hand bilong each wan mas fitim wei wea God bilong iu Jehovah givim iu blessing.” Taem iumi ting raonem bigfala kaenfala fasin bilong Jehovah for iumi, diswan mekem iumi willing for give long hem. Wei for give olsem mekem heart bilong hem hapi, long sem wei wea smol present wea pikinini givim hem mekem dadi or mami hapi tumas. For showimaot love bilong iumi long wei olsem bae helpem iumi for kam klosap long Jehovah.

Buildim Klos Wei for Fren Thru Long Prea

18. Why nao hem gud for tingim hao for mekem olketa prea bilong iumi kamap moabeta?

¹⁸ Taem wea iumi prea seleva hem barava gudfala chance for story long klos wei witim Father bilong iumi long heven. (Philippians 4:6) From prea hem wanfala important wei for kam klosap long God, hem gud for ting abaotem hao gud nao prea bilong iumi. Diswan no minim olketa prea hia mas stael and followim wankaen order, bat olketa mas trufala toktok wea kam from heart. Hao nao iumi savve mekem olketa prea bilong iumi kamap moabeta?

19, 20. Why nao iumi mas tingting firstaem bifor iumi prea, and wanem nao samfala subject wea fitim iumi for ting raonem?

¹⁹ Maet hem gud for firstaem tingting raonem wanem for talem bifor iumi prea. Sapos iumi duim olsem, prea bilong iumi savve abaotem olketa important samting wea iumi tingim firstaem and garem mining, and bae iumi stap klia long wei for repeatim sem toktok wea kam kwiktaem long mind bilong iumi. (Proverbs 15:28, 29) Maet wei for ting raonem olketa subject wea Jesus talem insaed example prea bilong hem and then lukim hao nao olketa hia join witim living bilong iumi savve helpem iumi. (Matthew 6:9-13) Olsem example, iumi savve askem iumiseleva wanem smol part nao iumi hope for duim insaed wei for duim will bilong God long earth. Iumi savve talem Jehovah wei wea iumi want for hem iusim iumi long best wei wea fitim iumi and askem help bilong hem for duim eni assignment wea hem givim long iumi. Maet iumi garem hevi saed long material need. Maet iumi needim forgiveness for samfala sin, and maet iumi need for forgivim samfala long bigfala wei moa. Maet wanfala samting testim iumi, and iumi luksavve iumi barava needim protection bilong Jehovah long datwan.

²⁰ And tu, maet iumi tingim samfala wea really needim help bilong Jehovah. (2 Corinthians 1:11) Bat, iumi mas no forgetim wei for sei thankiu. Sapos iumi tek taem for ting abaotem, iumi savve tingim olketa reason for sei thankiu long Jehovah and praisem hem each day for staka gud samting wea hem givim. (Deuteronomy 8:10; Luke 10:21) Wei for duim olsem bae givim nara gud samting—hem savve helpem iumi for barava tinghae and tingim gud saed bilong laef.

21. Wei for studyim olketa wanem example insaed Bible nao savve helpem iumi taem iumi story witim Jehovah insaed prea?

²¹ Wei for study savve helpem prea bilong iumi tu. Olketa nambawan prea bilong olketa faithful man and woman stap insaed Word bilong God. Olsem example, sapos iumi feisim wanfala bigfala problem, wea mekem iumi wari and maet feel fraet for laef bilong iumi or olketa wea iumi lovem, maet iumi savve readim prea bilong Jacob taem hem redy for meetim brata bilong hem Esau, wea laek for pei bak. (Genesis 32:9-12) Or maet iumi studyim prea bilong King Asa taem army bilong samting olsem wan million man from Ethiopia kam for againstim pipol bilong God. (2 Chronicles 14:11, 12) Sapos wanfala problem wea kasem iumi wea maet mekem pipol tok spoelem nem bilong Jehovah, then hem gud for readim prea bilong Elijah front long pipol wea worshipim Baal long Maunt Carmel, and tu prea bilong Nehemiah saed long wei wea Jerusalem hem nogud. (1 Kings 18:36, 37; Nehemiah 1:4-11) Wei for readim and ting raonem olketa prea olsem savve strongim faith bilong iumi and givim iumi olketa idea long wanem nao best wei for story witim Jehovah abaotem olketa wari wea hevi long iumi.

22. Wanem nao yeartext for 2003, and wanem nao iumi savve askem iumiseleva long datfala full year?

²² Tru nao, no eni honor hem moa hae, or goal wea moa hae, winim wei for followim kaonsel bilong James for “kam klosap long God.” (James 4:8) Iumi want for duim olsem long wei for go ahed for grow long savve bilong iumi abaotem God, long wei for showimaot love bilong iumi for hem long bigfala wei moa, and for fren long klos wei witim hem insaed olketa prea bilong iumi. Insaed long year 2003, taem iumi tingim evritaem James 4:8 olsem yeartext, iumi want for go ahed for lukluk gud long iumiseleva for lukim sapos iumi kam klosap long Jehovah. Bat, waswe long last part bilong disfala toktok? Long wanem wei nao Jehovah ‘bae kam klosap long iu,’ wea bae mekem iumi kasem olketa wanem blessing? Next article bae storyim diswan.

‘Hem Bae Kam Klosap Long Iu’

“[God] hem no farawe from iumi wanwan.”—ACTS 17:27.

1, 2. (a) Taem iumi luk go ap long olketa star long naet, wanem kwestin nao iumi maet askem saed long Creator? (b) Hao nao Bible showimaot olketa man barava important long eye bilong Jehovah?

WASWE, enitaem iu luk go ap long skae long klia naet and barava sapraes? Wei wea staka star stap and spes hem big tumas hem barava narawe. Long disfala barava bigfala universe, earth hem wanfala smol samting nomoa. Waswe, diswan minim Creator, “Most Hae ovarem full earth,” hem hae tumas so hem no savve tingim olketa man, or hard tumas for olketa savve long hem?—Psalm 83:18.

² Bible hem showim klia hao olketa man barava important long eye bilong Jehovah. Tru nao, Word bilong God encouragem iumi for luk aotem hem, taem hem sei: “Hem no farawe from iumi wanwan.” (Acts 17:27; 1 Chronicles 28:9) Tru nao, sapos iumi duim samting for kam klosap long God, hem bae duim samting tu. Wanem nao bae hem duim? Yeartext for 2003 givim disfala ansa wea muvim heart: ‘Hem bae kam klosap long iu.’ (James 4:8) Bae iumi storyim samfala nambawan blessing wea Jehovah givim long olketa wea klos long hem.

Wanfala Present From Jehovah

3. Wanem present nao Jehovah givim long olketa wea kam klosap long hem?

³ First samting, olketa servant bilong Jehovah garem wanfala spesol present wea hem givim for pipol bilong hem. Evri paoa, riches, and education wea disfala system garem no savve givim man disfala present. Hem wanfala present wea Jehovah givim for olketa wea klos long hem nomoa. Wanem nao diswan? Word bilong God sei: “Sapos . . . iu ask for fasin for luksavve, sapos iu go ahed for luk aotem olsem silver, and olsem riches wea haed iu go ahed for luk aotem, then iu bae minim wei for fraet long Jehovah, and iu bae faendem barava savve bilong God. From Jehovah seleva givim wisdom.” (Proverbs 2:3-6) Tingim hao olketa man wea no perfect fit for faendem “barava savve bilong God”! Datfala present—savve wea stap insaed Word bilong God—hem olsem “riches wea haed.” Why nao olsem?

4, 5. Hao nao “barava savve bilong God” hem olsem “riches wea haed”? Givim example.

⁴ Wanfala samting, savve bilong God savve barava helpem man. Wanfala nambawan reward bilong datwan nao hem hope for laef olowe. (John 17:3) Bat datfala savve hem mekem laef bilong iumi kamap moabeta distaem tu. Olsem example, from iumi studyim gud Word bilong God, iumi faendem ansa long olketa important kwestin olsem: Wanem nao nem bilong God? (Psalm 83:18) Olketa wea dae finis olketa waswe? (Ecclesiastes 9:5, 10) Wanem nao purpose bilong God for earth and olketa man? (Isaiah 45:18) Iumi savve tu hao iumi bae garem best living taem iumi followim wise kaonsel insaed Bible. (Isaiah 30:20, 21; 48:17, 18) So, iumi garem gudfala kaonsel for helpem iumi deal witim olketa wari bilong laef and aftarem living wea bae mekem iumi garem really hapi and wei for satisfae. Winim evri samting, wei wea iumi studyim Word bilong God hem mekem iumi savve long olketa nambawan fasin bilong Jehovah and for kam klosap long hem. No eni samting hem winim wei for fren klos witim Jehovah wea garem faondeson long “barava savve bilong God”!

⁵ Narafala reason stap why savve bilong God hem olsem “riches wea haed.” Olsem planti riches, hem no staka tumas long disfala world. Long six billion pipol wea stap long earth, samting olsem six million worshiper bilong Jehovah, or samting olsem 1-fala long evri 1,000 pipol faendem “barava savve bilong God.” For showim hao hem spesol privilege for savve long truth insaed Word bilong God, tingim disfala Bible kwestin: Wanem nao happen long olketa man taem olketa dae? Iumi savve from Bible hao soul hem dae and olketa wea dae no savve long eniting. (Ezekiel 18:4) Nomata olsem, klosap evri religion bilong world acceptim giaman biliv hao samting wea insaed long man hem go ahed for laef bihaen hem dae. Hem wanfala main part bilong olketa religion bilong Christendom. Olketa Buddhist, Hindu, Islam, Jain, Shinto, Sikh, Tao, and Jew religion bilivim diswan tu. Tingim—planti billion pipol no savve long truth bikos long disfala false teaching!

6, 7. (a) Hu nomoa savve faendem “barava savve bilong God”? (b) Wanem example nao showimaot Jehovah hem blessim iumi witim fasin for luksavve wea planti “man wea garem bigfala savve” no garem?

⁶ Why nao moa pipol no faendem “barava savve bilong God”? From man no savve minim evribit mining bilong Word bilong God sapos God no helpem hem. Remember, disfala savve hem wanfala present. Jehovah givim nomoa long olketa wea willing for luk aotem Word bilong hem witim honest and hambol fasin. Olketa olsem maet no “wise long saed bilong world.” (1 Corinthians 1:26) World maet ting long planti long olketa olsem pipol wea “no skul gud and man nating.” (Acts 4:13) Bat, datwan hem no important. Jehovah givim iumi reward bilong “barava savve bilong God” bikos long olketa fasin wea hem faendem insaed heart bilong iumi.

⁷ Tingim wanfala example. Planti savveman long Christendom raetem planti buk explainim Bible. Olketa buk hia givim information saed long history, mining bilong olketa Hebrew and Greek word, and planti moa samting. Witim bigfala savve bilong olketa, waswe, olketa savveman olsem really faendem “barava savve bilong God”? For ansarem diswan, iumi savve ask: Waswe, olketa minim klia theme bilong Bible—wei for vindicatem sovereign rul bilong Jehovah thru long Kingdom bilong hem long heven? Waswe, olketa savve hao Jehovah God hem no part bilong wanfala Trinity? Iumi nao garem stretfala savve long olketa samting hia. Why nao olsem? Jehovah hem blessim iumi witim fasin for luksavve long olketa spiritual truth wea planti “man wea garem bigfala savve” no garem. (Matthew 11:25) Jehovah hem barava blessim olketa wea klos long hem!

“Jehovah Hem Protectim Evriwan wea Lovem Hem”

8, 9. (a) Hao nao David storyim narafala blessing for olketa wea stap klosap long Jehovah? (b) Why nao olketa tru Christian needim protection bilong God?

⁸ Olketa wea klos long Jehovah kasem narafala blessing—God protectim olketa. David, man wea raetem psalm wea kasem planti hard taem hem raet olsem: “Jehovah hem stap klosap long olketa wea singaot long hem, long evriwan wea singaot long hem witim trufala fasin. Hem bae duim samting wea olketa wea fraet long hem wantem, and hem bae herem singaot bilong olketa for help and hem bae sevem olketa. Jehovah hem protectim evriwan wea lovem hem.” (Psalm 145:18-20) Tru nao, Jehovah hem stap klosap long olketa wea lovem hem and bikos long diswan hem savve kwiktaem for duim samting taem olketa singaot for help.

⁹ Why nao iumi needim protection bilong God? Olketa tru Christian need for deal witim living insaed ‘olketa nogud taem wea hard for deal witim’ and tu, olketa kamap wanfala main target bilong main Enemy bilong Jehovah, datfala Devil Satan. (2 Timothy 3:1) Datfala kleva enemy laek tumas “for kaikaim” iumi. (1 Peter 5:8) Satan persecutim, givim hevi, and testim iumi. Hem lukluk tu for olketa tingting long mind and heart wea hem savve mekius long hem. Hem garem wanfala goal: for mekem faith bilong iumi wikdaon and distroem iumi long spiritual wei. (Revelation 12:12, 17) From iumi garem barava strongfala enemy for faet againstim, iumi kasem comfort taem iumi savve “Jehovah hem protectim evriwan wea lovem hem.”

10. (a) Hao nao Jehovah protectim pipol bilong hem? (b) Wanem nao barava important protection, and why nao olsem?

¹⁰ Bat, hao nao Jehovah protectim pipol bilong hem? Promis bilong hem for protectim iumi no minim living bilong iumi long disfala system bae no garem eni problem; and diswan no minim hem garem responsibility for duim olketa mirakol for iumi. Nomata olsem, Jehovah protectim pipol bilong hem olsem wanfala grup. Tru nao, hem bae nating letem Devil for finisim olketa tru worshiper bilong hem from earth! (2 Peter 2:9) Winim evri samting, Jehovah protectim iumi long spiritual wei. Hem givim iumi wanem iumi needim for stand strong long olketa test and for protectim wei wea iumi fren witim hem. Long end, wei for kasem spiritual protection nao hem barava important. Why nao olsem? Taem iumi garem wei for fren witim Jehovah, no eni samting—nomata dae tu—savve spoelem iumi for olowe.—Matthew 10:28.

11. Olketa wanem arrangement nao Jehovah provaedem for protectim pipol bilong hem long spiritual wei?

¹¹ Jehovah hem mekem planti arrangement for protectim spiritual saed bilong olketa wea klos long hem. Thru long Word bilong hem, Bible, hem givim iumi wisdom for deal witim olketa difren kaen test. (James 1:2-5) Wei for followim kaonsel wea stap insaed Bible savve protectim iumi. And tu, Jehovah givim “holy spirit long olketa wea askem hem.” (Luke 11:13) Spirit nao hem barava strongfala paoa long full universe, so hem savve helpem iumi for feisim eni test or temptation wea kasem iumi. Thru long Christ, Jehovah givim “olketa present olsem man.” (Ephesians 4:8) Olketa man hia wea fit long spiritual wei traem best for showimaot deep feeling bilong Jehovah for kea taem olketa helpem nara brata and sista.—James 5:14, 15.

12, 13. (a) Long wanem wei nao Jehovah givim iumi spiritual kaikai long barava taem? (b) Hao nao iu ting long olketa samting wea Jehovah provaedem for spiritual saed bilong iumi?

¹² Jehovah provaedem nara samting for protectim iumi: spiritual kaikai long barava taem. (Matthew 24:45) Thru long olketa pablikeson, olsem Wastaoa and Wekap! magasin, and tu thru long olketa meeting, assembly, and convention, Jehovah givim iumi wanem iumi needim long taem wea iumi needim. Waswe, iu savve rememberim wanfala point wea iu herem long Christian meeting, assembly, or wanfala convention wea muvim heart bilong iu and wea strongim and comfortim iu? Waswe, enitaem iu readim wanfala article insaed wanfala magasin hia and ting hem barava fitim iu?

¹³ Wanfala tul wea Satan iusim wea win staka taem hem wei for feel wikdaon, and iumi evriwan savve kasem datwan. Hem savve hao feeling for lus hope wea go ahed for longtaem savve aotem strong bilong iumi, and mekem hem isi for attakim iumi tu. (Proverbs 24:10) From Satan hem trae for mekius long wei for feel wikdaon, iumi needim help. Samfala taem, olketa Wastaoa and Wekap! magasin garem olketa article wea helpem iumi for faet againstim wei for feel wikdaon. Wanfala Christian sista raet olsem abaotem wanfala article hia: “Mi readim datfala article klosap evriday, and mi still krae each taem mi readim. Mi keepim saed long bed mekem hem stap redy taem mi feel wikdaon. Thru long olketa article olsem, mi savve feelim Jehovah holem mi long wei for protectim mi.”a Iumi barava tinghae long wei wea Jehovah givim iumi spiritual kaikai wea kam long barava taem! Remember, olketa arrangement bilong hem for spiritual saed bilong iumi pruvim hem klos long iumi and hem protectim iumi.

Story Long “Man wea Herem Prea”

14, 15. (a) Wanem blessing nao Jehovah givim long man wanwan wea kam klosap long hem? (b) Why nao invitation for story long Jehovah insaed long prea hem wanfala nambawan privilege?

¹⁴ Waswe, iu lukim hao taem olketa man kasem paoa, gogo olketa no interest for story witim olketa wea stap anda olketa? Bat waswe long Jehovah God? Waswe, hem farawe tumas for interest long toktok wea olketa man talem long hem? Nomoa nao! Present bilong prea hem narafala blessing wea Jehovah givim long olketa wea klos long hem. Wei wea iumi kasem invitation for story long “Man wea Herem prea” hem wanfala spesol privilege. (Psalm 65:2) Why nao olsem?

¹⁵ Olsem example: Main boss bilong wanfala big company hem garem planti responsibility. Hem disaedem wanem waka nao hemseleva bae duim and wanem waka nao for givim for olketa narawan for duim. Olsem tu, Sovereign Ruler bilong universe hem savve chusim wanem samting nao hemseleva bae duim and wanem nao hem bae givim for olketa narawan for duim. Tingim evri samting wea Jehovah givim long Jesus for duim, son bilong hem wea hem lovem. Disfala Son kasem “paoa for judge.” (John 5:27) Olketa angel “stap anda long hem.” (1 Peter 3:22) Strongfala holy spirit bilong Jehovah hem stap for Jesus iusim for helpem hem leadim olketa disaepol bilong hem long earth. (John 15:26; 16:7) Dastawe Jesus fit for sei: “Evri paoa nao mi kasem long heven and long earth.” (Matthew 28:18) Nomata olsem, saed long olketa prea, Jehovah hem chus for hemseleva nao herem. Dastawe Bible talem iumi for prea long Jehovah nomoa, thru long nem bilong Jesus.—Psalm 69:13; John 14:6, 13.

16. Why nao iumi savve sure Jehovah really lisin long olketa prea bilong iumi?

¹⁶ Waswe, Jehovah really lisin long olketa prea bilong iumi? Sapos hem no interest or no kea, hem bae nating encouragem iumi for “go ahed for prea” or for torowem olketa hevi and wari bilong iumi long hem. (Romans 12:12; Psalm 55:22; 1 Peter 5:7) Olketa faithful servant long taem bilong Bible garem full trust long wei wea Jehovah lisin long olketa prea. (1 John 5:14) Dastawe, man wea raetem psalm, David hem sei: “[Jehovah] herem voice bilong mi.” (Psalm 55:17) Iumi barava sure hao Jehovah hem stap klosap, hem stanbae for herem evri tingting and wari bilong iumi.

Jehovah Givim Reward Long Olketa Servant Bilong Hem

17, 18. (a) Hao nao Jehovah ting long faithful service bilong creation bilong hem wea garem savve? (b) Explainim wei wea Proverbs 19:17 showimaot hao Jehovah lukim olketa samting wea iumi duim saed long mercy?

¹⁷ Samting wea olketa man nating duim or no want for duim no savve affectim position bilong Jehovah. Nomata olsem, Jehovah hem God wea tinghae long samting. Hem tinghae—tru nao, hem lovem—faithful service wea creation bilong hem wea garem savve olketa duim. (Psalm 147:11) So, diswan hem nara gud samting wea olketa wea klos long Jehovah enjoyim: Hem givim reward long olketa servant bilong hem.—Hebrews 11:6.

¹⁸ Bible showimaot klia hao Jehovah tinghae long samting wea olketa worshiper bilong hem duim. Olsem example, iumi readim: “Man wea showimaot kaenfala fasin long poor man hem give long Jehovah, and Hem bae peim bak kaenfala fasin bilong hem.” (Proverbs 19:17) Wei wea Jehovah garem mercy for olketa wea poor showaot long Law bilong Moses. (Leviticus 14:21; 19:15) Hao nao Jehovah feel taem iumi followim mercy bilong hem long wei wea iumi deal witim olketa wea poor? Taem iumi give long olketa wea poor, and no want for kasem bak eni samting, Jehovah ting long diswan olsem Hem kaon long iumi. Jehovah promis for peim bak datfala kaon witim wei for hem appruvim iumi and givim iumi olketa blessing. (Proverbs 10:22; Matthew 6:3, 4; Luke 14:12-14) Tru nao, taem iumi showim fasin for kea long nara brata or sista wea garem need, diswan muvim heart bilong Jehovah. Iumi hapi tumas for savve hao Father bilong iumi long heven hem luksavve long olketa samting wea iumi duim saed long mercy!—Matthew 5:7.

19. (a) Why nao iumi savve sure Jehovah tinghae long wanem iumi duim long waka for preach and mek disaepol? (b)  Hao nao Jehovah rewardim olketa samting iumi duim for saportim Kingdom bilong hem?

¹⁹ Jehovah barava tinghae long olketa samting wea iumi duim for Kingdom bilong hem. Taem iumi kam klosap long Jehovah, hem normal samting for iumi want for iusim taem, strong, and wanem iumi garem for share evribit insaed waka for preachim Kingdom and mek disaepol. (Matthew 28:19, 20) Samfala taem, maet iumi feel olsem iumi duim smol samting nomoa. Heart bilong iumi wea no perfect maet mekem iumi no sure sapos Jehovah hapi long hard waka bilong iumi. (1 John 3:19, 20) Bat Jehovah hem tinghae long evri present—nomata hem smol—wea kamaot from heart wea love nao muvim. (Mark 12:41-44) Bible hem promisim iumi: “God hem no wicked mekem hem forgetim waka bilong iufala and love wea iufala showimaot for nem bilong hem.” (Hebrews 6:10) Tru nao, Jehovah rememberim and givim reward long nomata smol service tu wea iumi duim for saportim Kingdom bilong hem. Witim olketa richfala spiritual blessing distaem, iumi savve luk forward long olketa gud samting long living wea bae kamap insaed niu world, wea Jehovah bae openem hand bilong hem and givim raeteous samting wea evriwan wea klos long hem wantem!—Psalm 145:16; 2 Peter 3:13.

20. Insaed long year 2003, hao nao iumi savve tingim toktok bilong yeartext, and wanem nao savve kamaot from datwan?

²⁰ Insaed long year 2003, iumi want for askem iumiseleva sapos iumi go ahed for waka hard for kam klosap long Father bilong iumi long heven. Sapos iumi duim datwan, iumi savve sure hem bae duim wanem hem promisim. Tru nao, “God . . . kanduit laea.” (Titus 1:2) Sapos iu kam klosap long hem, bae hem kam klosap long iu. (James 4:8) And wanem nao bae kamaot from diswan? Olketa rich blessing distaem and chance for kamap moa and moa klos long Jehovah for olowe!

[Footnote]