Niu World—Bae Iu Long There?

“No eni samting hem moabeta for olketa winim wei for hapi and for duim gud samting insaed long laef; and tu hao evri man mas kaikai and drink and lukim gud samting from evri hard waka bilong hem. Hem nao present from God.”—ECCLESIASTES 3:12, 13.

1. Why nao iumi savve garem gudfala hope for future?

PLANTI pipol ting long Almighty God olsem hem strict and hard tumas. Bat, scripture antap hem wanfala tru toktok wea iu savve faendem insaed Word bilong hem. Hem showimaot wei wea hem datfala “hapi God” and hao hem putim first dadi and mami bilong iumi insaed wanfala paradaes earth. (1 Timothy 1:11; Genesis 2:7-9) Taem iumi laek for savve abaotem future wea God promisim for pipol bilong hem, iumi mas no sapraes for lane abaotem living wea bae mekem iumi hapi for olowe.

2. Wanem nao samfala samting iu luk forward long hem?

² Long article bifor diswan, iumi lukim thrifala long fofala taem wea Bible talem profesi abaotem “niu heven and niu earth.” (Isaiah 65:17) Wanfala long olketa profesi hia wea iumi fit for trustim hem stap long Revelation 21:1. Olketa verse bihaen talem taem wea Almighty God bae barava changem living long earth for kamap moabeta. Hem bae aotem krae bilong sorre. Pipol bae no dae from olo, sik, or accident. Sorre, singaot, and pain bae nomoa nao. Datwan hem nambawan hope! Bat waswe, iumi savve sure datwan bae kam, and hao nao hope hia savve affectim iumi distaem?

Olketa Reason for Trust

3. Why nao iumi savve trustim olketa promis bilong Bible abaotem future?

³ Lukim wanem Revelation 21:5 hem talem. Hem talem toktok bilong God, wea sidaon long throne bilong hem long heven, wea sei: “Lukim! Mi bae mekem evri samting kamap niu.” Datfala promis bilong God hem moabeta winim eni toktok bilong independence bilong nation, eni law, or goal bilong man for future. Hem toktok wea iumi barava fit for trustim bilong Man wea Bible sei hem “kanduit laea.” (Titus 1:2) So, maet iu garem feeling for laek weit firstaem and ting raonem disfala barava spesol hope and trustim God. Bat iumi no need for weit. Moa samting stap for iumi lanem abaotem future bilong iumi.

4, 5. Wanem nao olketa Bible profesi wea iumi lukluk long olketa finis wea savve strongim trust bilong iumi abaotem future?

⁴ Ting raonem samting wea article bifor diswan talem abaotem olketa promis bilong Bible abaotem niu heven and niu earth. Isaiah hem talem profesi abaotem wanfala niu kaen living olsem, and profesi bilong hem fulfill taem olketa Jew go bak long homland bilong olketa for startim moa tru worship. (Ezra 1:1-3; 2:1, 2; 3:12, 13) Bat waswe, profesi bilong Isaiah point go long diswan nomoa? Barava nomoa nao! Olketa profesi wea hem talem bae fulfill long wei wea moa big long future wea farawe yet. Why nao iumi sei olsem? Bikos long samting wea iumi readim long 2 Peter 3:13 and Revelation 21:1-5. Olketa scripture hia point go long niu heven and niu earth wea bae givim gud samting for olketa Christian evriwea long earth.

⁵ Olsem iumi story abaotem finis, Bible iusim disfala toktok “niu heven and niu earth” fofala taem. Iumi storyim thrifala finis and kasem olketa ansa wea encouragem iumi. For tok stret, Bible hem talem profesi hao God bae finisim wicked fasin and olketa nara samting wea kosim wei for safa and then hem bae blessim moa olketa man insaed niu kaen living wea hem promisim.

6. Wanem nao mek-foa profesi wea storyim “niu heven and niu earth” talemaot?

⁶ Distaem letem iumi lukluk long last taem wea toktok “niu heven and niu earth” hem kamap long Isaiah 66:22-24: “‘Olsem niu heven and niu earth wea mi wakem hem standap front long mi,’ Jehovah hem talemaot, ‘olsem tu olketa pikinini bilong iufala pipol and nem bilong iufala pipol bae go ahed for standap. And hem bae barava happen hao from niu moon go kasem niu moon and from sabbath go kasem sabbath evriwan wea laef bae kam insaed for baodaon front long mi,’ Jehovah hem talem. ‘And olketa bae barava go aot and luk long olketa dead body bilong man wea sin againstim mi; from olketa worm long olketa bae no dae and fire bilong olketa bae no finis, and olketa mas kamap rabis samting long evri samting wea laef.’”

7. Why nao iumi fit for sei Isaiah 66:22-24 bae fulfill long olketa day front long iumi?

⁷ Disfala profesi hem fulfill long olketa Jew wea go bak moa long hom bilong olketa, bat hem bae fulfill tu long narataem. Datwan mas kamap bihaen olketa raetem mek-tu leta bilong Peter and buk bilong Revelation wea point go long wanfala ‘niu heven and earth’ wea bae kamap long future. Iumi savve luk forward long nambawan and full wei wea diswan bae fulfill long niu system. Tingim samfala samting wea iumi savve luk forward for enjoyim.

8, 9. (a) Long wanem wei nao pipol bilong God bae “go ahed for standap”? (b) Wanem nao mining bilong profesi hao olketa servant bilong Jehovah bae worship “from niu moon go kasem niu moon and from sabbath go kasem sabbath”?

⁸ Revelation 21:4 showimaot dae bae nomoa nao. Scripture long Isaiah chapter 66 agree witim datwan. Iumi savve lukim long verse 22 hao Jehovah savve datfala niu heven and niu earth bae no for lelebet taem nomoa. And tu, pipol bilong hem bae go ahed strong; olketa bae “go ahed for standap” front long hem. Samting wea God duim finis for pipol wea hem chusim givim iumi reason for trustim hem. Olketa tru Christian feisim nogud persecution, and tu samfala krangge pipol wea trae for finisim olketa. (John 16:2; Acts 8:1) Nomata olsem, olketa enemy bilong pipol bilong God wea garem bigfala paoa, olsem Emperor Nero bilong Rome and Adolf Hitler, no fit for finisim olketa loyal wan bilong God wea karem nem bilong hem. Jehovah hem protectim kongregeson bilong pipol bilong hem, and iumi savve sure hem bae mekem diswan stap for olowe.

⁹ Olsem tu, olketa wea faithful long God olsem part bilong niu earth, sekson bilong olketa trufala worshiper insaed long datfala niu world, bae go ahed for standap bikos olketa bae givim klin worship long Creator bilong evri samting. Datwan bae no wei for worship samfala taem nomoa or worship olabaot. Law bilong God, wea hem givim long Israel thru long Moses, askem samfala samting long worship evri month, olsem long taem bilong niu moon, and evri week, olsem long taem bilong Sabbath day. (Leviticus 24:5-9; Numbers 10:10; 28:9, 10; 2 Chronicles 2:4) So Isaiah 66:23 point go long wei for evritaem worshipim God, evri week and evri month. Wei for bilivim no eni God stap and hypocrite fasin insaed long religion bae no stap long datfala taem. “Evriwan wea laef bae kam insaed for baodaon front long” Jehovah.

10. Why nao iu savve sure hao niu world bae no kamap nogud from olketa wicked pipol?

¹⁰ Isaiah 66:24 promisim iumi hao peace and raeteous fasin bilong niu earth bae nating stap long danger. Wicked pipol bae no spoelem datwan. Tingim wei wea 2 Peter 3:7 sei hao front long iumi hem “day for judgem and distroem olketa man wea no followim God.” Olketa wea bae finis nao hem olketa man wea no followim God. No eni samting bae spoelem pipol wea no guilty, wea difren from samting wea happen planti taem long olketa war bilong man, wea namba bilong olketa man nating wea dae hem winim namba bilong olketa soldia wea dae. Nambawan Judge promisim iumi hao day bilong hem, hem for distroem olketa man wea no followim God.

11. Wanem nao Isaiah showimaot bae hem future bilong eniwan wea tan againstim God and worship bilong hem?

¹¹ Olketa raeteous wan wea stap laef bae lukim hao profesi toktok bilong God hem tru. Verse 24 talemaot hao “olketa dead body bilong man wea sin againstim” Jehovah bae kamap pruv bilong judgment bilong hem. Toktok bilong Isaiah maet mekem iumi seke tumas. Bat hem talem tru samting bilong history. Aotsaed long wall bilong Jerusalem bifor olketa ples stap for rabis and, samfala taem, for dead body bilong olketa criminal wea no fit for pipol berem long stretfala wei.a Olketa worm and fire long ples hia kwiktaem finisim evribit olketa rabis and dead body. Isaiah iusim disfala example for showimaot hao judgment bilong Jehovah for olketa wea min for sin againstim olketa raeteous wei bilong God bae nating savve change.

Wanem Hem Promisim

12. Isaiah showimaot wanem moa abaotem living insaed niu world?

¹² Revelation 21:4 talem iumi abaotem samfala samting wea bae no stap long niu system wea bae kam. Bat, wanem nao bae stap long datfala taem? Laef hem bae hao? Waswe, iumi savve kasem eni idea wea iumi fit for trustim? Barava nao. Isaiah chapter 65 story abaotem living wea iumi bae enjoyim sapos Jehovah appruvim iumi for laef taem hem creatim, long last wei, niu heven and niu earth. Olketa wea kasem blessing for garem ples for olowe long disfala niu earth bae no kamap olo and gogo for dae. Isaiah 65:20 promisim iumi: “Bae nomoa eni baby kam from datfala ples wea tu-thri day nomoa, no eni olo man tu wea no kasem full laef bilong hem; from man bae dae olsem wanfala boy nomoa, nomata hem kasem wan handred year; and saed long man wea sin, nomata hem kasem wan handred year, curse bae kamdaon long hem.”

13. Hao nao Isaiah 65:20 promisim iumi pipol bilong God bae garem sef living?

¹³ Taem diswan fulfill firstaem long pipol bilong Isaiah, hem minim olketa baby long datfala kantri olketa stap sef. No eni enemy kam, olsem olketa bilong Babylon duim wantaem, for tekem olketa baby or killim dae olketa young man. (2 Chronicles 36:17, 20) Long niu world wea bae kam, pipol bae stap sef, fit for enjoyim laef. Sapos man hem chus for bighed againstim God, hem bae no fit for go ahed for laef. God bae aotem hem. Waswe sapos datfala bighed sinner hem wan handred year? Hem bae dae “olsem wanfala boy nomoa” sapos iumi markem datwan witim laef olowe.—1 Timothy 1:19, 20; 2 Timothy 2:16-19.

14, 15. Olsem Isaiah 65:21, 22 talem, wanem nambawan waka nao iu savve luk forward long hem?

¹⁴ Winim wei for ting raonem hao nao God bae aotem wanfala man wea min for sin, Isaiah storyim kaen living wea bae kamap long niu world. Trae for tingim iuseleva long there. First samting wea iu maet tingim nao olketa samting wea affectim living bilong iu. Isaiah story abaotem datwan long verse 21 and 22: “Olketa bae buildim haos and stap insaed; and olketa bae plantim plantation and kaikaim frut bilong hem. Olketa bae no buildim and narafala man nao stap insaed; olketa bae no plantim and narafala man nao kaikaim. From olketa day bilong pipol bilong mi bae olsem olketa day bilong wanfala tree; and waka wea olketa seleva duim pipol wea mi chusim bae iusim evribit.”

¹⁵ Sapos iu no garem savve for buildim haos or no wakem garden enitaem, profesi bilong Isaiah showimaot samfala education weitim iu yet. Bat waswe, bae iu willing for lane sapos samfala wea garem savve and experience helpem iu, maet olketa kaenfala neiba wea hapi for helpem iu? Isaiah no sei sapos haos bilong iu bae garem bigfala open window, mekem iu feelim wind, or garem glass window mekem iu luk thru and lukim olketa difren weather. Waswe, bae iu designim wanfala haos wea garem steep ruf for aotem rain and snow? Or waswe, maet weather mekem iu needim ruf wea flat—olsem olketa ruf long Middle East—wanfala ruf wea iu savve hipap witim famili bilong iu for kaikai and story?—Deuteronomy 22:8; Nehemiah 8:16.

16. Why nao iu sure niu world bae mekem man satisfae for olowe?

¹⁶ Samting wea moa important winim olketa information olsem, hem wei for savve hao iu bae garem haos bilong iuseleva. Hem bae bilong iuseleva—no olsem distaem wea iu maet waka hard for buildim haos bat narawan kasem gud samting long hem. Isaiah 65:21 sei tu hao iu bae plantim kaikai and kaikaim wanem iu plantim. Hem klia, diswan hem main point abaotem living long datfala taem. Iu bae barava satisfae long samting iu duim, frut bilong hard waka bilong iu. Iu bae fit for duim datwan for longtaem—“olsem olketa day bilong wanfala tree.” Datwan barava fitim disfala toktok “evri samting kamap niu”!—Psalm 92:12-14.

17. Wanem promis nao barava encouragem olketa dadi and mami?

¹⁷ Sapos iu wanfala dadi or mami, disfala toktok bae muvim heart bilong iu: “Olketa bae no hard waka nating, or bornim pikinini for mek trabol; bikos olketa nao pikinini wea Jehovah blessim, witim laen pikinini bilong olketa tu. And hem mas happen hao bifor olketa singaot, miseleva nao bae ansarem; taem olketa story yet, miseleva nao bae herem.” (Isaiah 65:23, 24) Waswe, iu kasem pain bilong wei for “bornim pikinini for mek trabol”? Iumi no need for talemaot evrikaen problem bilong pikinini wea savve mek trabol for dadi and mami or nara pipol. And join witim datwan, iumi evriwan lukim olketa dadi and mami wea busy tumas long living, waka, or hapitaem bilong olketa seleva, wea mekem olketa garem lelebet taem nomoa witim pikinini bilong olketa. Long narasaed, Jehovah promisim iumi hao hem bae herem and givim samting iumi needim, and hem bae savve firstaem wanem nao olketa samting hia.

18. Why nao iumi bae hapi long olketa animal insaed long niu world?

¹⁸ Taem iu tingting abaotem wanem iu savve enjoyim insaed niu world, piksarem toktok wea profesi bilong God talemaot: “‘Wolf and pikinini sheep nao bae kaikai tugeta, and lion bae kaikaim grass olsem buluka; and for snek, kaikai bilong hem bae dust. Olketa bae no spoelem or duim eni nogud samting long full maunten bilong mi wea holy,’ Jehovah hem talem.” (Isaiah 65:25) Olketa man for paint trae finis for paintim disfala story, bat diswan hem no piksa wea man paintim from tingting nomoa. Disfala samting hem barava tru. Peace bae stap midolwan long pipol and sem samting bae happen witim olketa animal. Planti savveman long biology and pipol wea lovem animal iusim planti year long laef bilong olketa for lane abaotem samfala kaen animal or maet wankaen or wan sekson nomoa. Long narasaed, tingim wanem iu savve lanem taem olketa animal no fraet long olketa man. Long datfala taem iu savve kam klos long olketa bird and smol animal wea stap long forest or bush—tru nao, lukluk, lane from, and hapi long olketa. (Job 12:7-9) Iu bae duim diswan long sef wei, no eni danger for man or animal. Jehovah sei: “Olketa bae no spoelem or duim eni nogud samting long full maunten bilong mi wea holy.” Datwan bae difren tumas from samting wea iumi lukim and kasem distaem!

19, 20. Why nao pipol bilong God difren tumas from planti pipol distaem?

¹⁹ Olsem iumi storyim finis, olketa man no savve talemaot future long stretfala wei nomata planti pipol evriwea no barava sure long wanem bae happen long year 2000. Diswan mekem planti no hapi, konfius, or no garem hope. Peter Emberley, bigman bilong wanfala university long Canada, hem raet olsem: “Planti [man wea full-grown] start for tingim olketa main kwestin saed long laef. Hu nao mi? Wanem nao barava goal bilong mi? Wanem nao mi givim for genereson wea kam bihaenem mi? Taem haf long laef bilong olketa go pas, olketa stragol yet for kasem order and faendem mining long laef bilong olketa.”

²⁰ Iu savve minim why nao diswan hem happen witim planti pipol. Olketa maet trae for enjoyim laef thru long olketa samting wea olketa interest tumas long hem. Nomata olsem, olketa no savve wanem nao bae happen long future, so laef maet no garem reason, order, or barava mining. Distaem, markem datwan witim tingting bilong iu abaotem laef, followim evri samting iumi storyim. Iu savve hao insaed long niu heven and niu earth wea Jehovah promisim, iumi bae savve luk raonem iumi and talem from heart bilong iumi, ‘Tru nao, God hem mekem evri samting kamap niu!’ Bae iumi hapi tumas for duim datwan!

21. Wanem sem samting nao iumi faendem long Isaiah 65:25 and Isaiah 11:9?

²¹ Hem no bighed samting for iumi tingim iumiseleva insaed datfala niu world bilong God. Hem invaetem, encouragem iumi tu, for worshipim hem long truth distaem and for kamap fit for laef taem ‘olketa bae no spoelem or duim eni nogud samting long full maunten bilong hem wea holy.’ (Isaiah 65:25) Bat waswe, iu savve hao firstaem Isaiah talem toktok wea klosap semsem and samting wea hem talem hem important long wei wea iumi barava enjoyim niu world? Isaiah 11:9 sei: “Olketa bae no spoelem eniwan or spoelem eni samting long maunten bilong mi wea holy; from earth bae fulap witim savve bilong Jehovah olsem wata hem kavarem sea.”

22. Wei wea iumi lukluk long fofala Bible profesi fit for mekem iumi disaed strong for duim wanem?

²² “Savve bilong Jehovah.” Taem God mekem evri samting kamap niu, olketa pipol bilong earth bae garem stretfala savve abaotem hem and will bilong hem. Datwan bae minim moa samting winim wei for lane from olketa animal nomoa. Toktok wea kam from Hem nao insaed diswan. Olsem example, tingim staka samting iumi lanem taem iumi lukluk long fofala profesi nomoa wea storyim “niu heven and niu earth.” (Isaiah 65:17; 66:22; 2 Peter 3:13; Revelation 21:1) Iu garem gudfala reason for readim Bible evriday. Waswe, datwan hem part long schedule bilong iu? Sapos nomoa, wanem nao olketa change iu savve duim mekem iu bae readim samting wea God talem? Iu bae faendem hao witim wei for luk forward for enjoyim niu world, iu bae kasem moa hapi distaem tu, olsem man wea raetem psalm hem kasem.—Psalm 1:1, 2.

[Footnote]

Hao Nao Bae Iu Ansa?

• Why nao iumi savve sei Isaiah 66:22-24 talem profesi abaotem samting wea bae happen long future?

• Wanem nao iu barava luk forward long hem long olketa profesi long Isaiah 66:22-24 and Isaiah 65:20-25?

• Wanem nao olketa reason wea mekem iu barava sure abaotem future bilong iu?

[Piksa long page 15]

Isaiah, Peter, and John talem profesi abaotem olketa difren part bilong “niu heven and niu earth”