Maet iu lukim Olketa Jehovah’s Witness givimaot olketa Bible magasin and buk, and offerim Bible study, taem olketa duim preaching waka long haos tu haos or long street. Maet wanfala long olketa givim disfala magasin long iu. Bat maet iu laek for savve wanem kaen pipol nao Olketa Jehovah’s Witness. Maet iu tu garem sem tingting abaotem olketa, olsem olketa wea iumi storyim antap.

Sapos iu laek for savve wanem kaen pipol nao Olketa Jehovah’s Witness, hu nao iu savve askem? Hu nao savve explainim wanem Olketa Jehovah’s Witness bilivim, hu nao givim selen for sapotim waka bilong olketa and for buildim olketa Kingdom Hall bilong olketa, and why nao olketa evritaem kam long haos bilong iu or laek story witim iu long street?

Cecilie hem sei tu: “Mi readim staka story abaotem Olketa Jehovah’s Witness long Internet. Plande pipol talem staka nogud samting abaotem olketa. Datwan mekem mi for no laekem Olketa Jehovah’s Witness.” Bat gogo mi askem samfala Jehovah’s Witness abaotem biliv bilong olketa and mi luksavve mi no garem stretfala tingting abaotem olketa.

Waswe, iu laek for savve long tru samting abaotem Olketa Jehovah’s Witness? Mifala encouragem iu for story witim eni Jehovah’s Witness. (Proverbs 14:15) Olketa nara article long disfala magasin bae story abaotem wanem kaen pipol nao mifala, wanem mifala bilivim, and waka wea mifala duim.

Olketa Jehovah’s Witness stap long staka difren kantri long world and mifala no part long eni nara religion. Hedquarter bilong mifala hem long America bat long winim 230 kantri,a samting olsem eit million Jehovah’s Witness teachim Bible long pipol. Mifala duim olsem bikos Jesus hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem.”—Matthew 24:14.

Nomata wanem kantri mifala stap, mifala obeyim olketa law bilong datfala kantri. Bat mifala no join insaed politik or war bikos mifala followim wanem Jesus talem for olketa Christian for “no olsem pipol long world.” (John 15:19; 17:16) Olsem example, long World War II, olketa putim samfala Jehovah’s Witness long prison, whipim olketa nogud, and killim dae samfala bikos olketa no laek for sapotim datfala war. Wanfala bigman bilong religion long Germany hem sei: “Olketa Jehovah’s Witness nao olketa main wan wea no joinim army bilong Germany long datfala taem.”

Nomata olsem, long staka wei, mifala semsem olsem olketa nara pipol. Jesus prea abaotem olketa disaepol bilong hem: “Mi no askem iu for tekem olketa from disfala world.” (John 17:15) Dastawe iu bae lukim mifala Jehovah’s Witness waka for selen, go long skul, go long market and long stoa, olsem olketa nara pipol.

Olketa Jehovah’s Witness bilivim “evri toktok insaed long olketa Holy Raeting hem kam from God.” (2 Timothy 3:16) Mifala readim Bible evritaem mekem mifala lane abaotem God and savve hao for garem gudfala laef.

Bible hem sei: “Mekem pipol savve, iu, wea nem bilong iu Jehovah, iu nomoa Barava Haefala God long full earth.” (Psalm 83:18) Dastawe mifala worshipim Jehovah God nomoa, and mifala waka hard for helpem pipol savve long nem bilong hem bikos mifala olketa Witness bilong hem.—Isaiah 43:10-12.

From mifala Christian, mifala bilivim Jesus hem “Son bilong God,”a hem kam long earth, and hem kamap Messiah. (John 1:34, 41; 4:25, 26) Bihaen Jesus hem dae and hem laef bak, hem go ap long heven. (1 Corinth 15:3, 4) Gogo hem kamap King long Kingdom bilong God. (Revelation 11:15) Datfala Kingdom hem wanfala gavman wea bae mekem earth kamap paradaes. (Daniel 2:44) Bible sei: “God bae givim earth long olketa wea hambol and olketa bae hapi fogud bikos evriwan bae garem peace.”—Psalm 37:11, 29.

Olketa Jehovah’s Witness luksavve olketa Bible principle savve helpem pipol distaem. (Isaiah 48:17, 18) So mifala followim olketa Bible principle. Olsem example, from Bible warnim iumi for no duim olketa samting wea bae mekem tingting and body for no klin, mifala no smoke or iusim olketa drug. (2 Corinth 7:1) And tu, mifala no duim olketa samting wea Bible sei hem no stret, olsem wei for drunk, durong and steal.—1 Corinth 6:9-11.

Evri year mifala printim and givimaot staka million Bible and olketa Bible pablikeson. Long samfala kantri, mifala wakem olketa branch office and olketa ples for duim printing. Staka thousand kongregeson savve hipap long olketa ples for worship wea mifala kolem long Kingdom Hall. Hao nao mifala kasem selen for peim olketa samting hia?

Olketa donation wea pipol givim nao sapotim waka bilong mifala. (2 Corinth 9:7) Long 1879, disfala magasin wea bifor olketa kolem Zion’s Watch Tower, hem sei: “Mifala luksavve JEHOVAH nao sapotim disfala waka, so mifala no askem pipol for givim selen for sapotim disfala waka.” Datwan hem no change kam kasem distaem.

Olketa donation go long branch office or mifala putim long contribution box wea stap long evri Kingdom Hall. Mifala no tithe, duim kolekson, or askem selen long pipol for olketa pablikeson or for eni nara samting wea mifala duim for olketa. Mifala no kasem pei for preaching waka, for teach long kongregeson, or for waka for buildim olketa Kingdom Hall. Mifala followim wanem Jesus sei: “Samting wea iufala kasem hem free nomoa, so iufala mas no askem selen for samting wea iufala duim.” (Matthew 10:8) Olketa wea waka long branch office and long hedquarter bilong mifala and olketa member bilong Governing Body bilong Olketa Jehovah’s Witness, evriwan hia no kasem eni pei for waka wea olketa duim.

Mifala iusim olketa donation tu for helpem olketa narawan wea disaster kasem olketa. Olketa Christian long first century willing for helpem olketa wea kasem hard taem. (Rome 15:26) Mifala tu laek for helpem olketa wea kasem hard taem long wei for givim kaikai, kaleko and medicine for olketa, and for wakem bak haos bilong olketa and ples wea olketa iusim for prea.

Main samting wea pipol savve abaotem Olketa Jehovah’s Witness hem wei wea mifala pipol for preach long haos tu haos and long evri ples wea pipol stap. Why nao mifala preach?

Olketa Jehovah’s Witness duim preaching waka for mekhae long God and for helpem pipol savve long nem bilong God. (Hebrew 13:15) And tu, mifala laek for obeyim komand bilong Jesus wea sei: “Go and teachim pipol long evri kantri for kamap disaepol bilong mi. . . . Teachim olketa for followim evri samting wea mi laekem iufala for duim.”—Matthew 28:19, 20.

Nara reason why mifala preach hem bikos mifala lovem pipol. (Matthew 22:39) Mifala luksavve staka pipol garem religion finis and staka pipol no interest long message wea mifala preachim. Bat, mifala savve olketa teaching wea stap long Bible savve sevem laef bilong pipol. Dastawe mifala “gohed for teachim pipol and talemaot gud nius abaotem Jesus, wea hem nao datfala Christ,” olsem olketa Christian long first century duim.—Acts 5:41, 42.

Plande pipol wea interest for readim olketa buk and olketa magasin bilong mifala, olketa no Jehovah’s Witness. And staka million pipol wea mifala studyim Bible witim olketa, olketa garem difren religion. Bat olketa barava tinghae long wei wea olketa Jehovah’s Witness kam visitim olketa.

Maet iu laek for savve long olketa nara samting abaotem Olketa Jehovah’s Witness. Mifala encouragem iu for

• Story witim eni Jehovah’s Witness.

• Go long website bilong mifala, www.jw.org.

• Kam long our olketa meeting bilong mifala. Eniwan savve kam and olketa no askem selen for datwan.