Distaem pipol savve wari tumas bikos evri samting ‘hem barava difren and hem hard tumas.’ (2 Timothy 3:1) Staka kasem hard taem saed long selen, hasband and waef divorce or separate, war, nogud sik, or disaster. And tu, maet iumi savve wari abaotem olketa samting olsem: ‘Waswe, disfala boela long body bilong mi bae gogo hem cancer?’ ‘Sapos world hem gohed for olsem, hao nao bae laef bilong olketa granpikinini bilong mi?’

Hem normal nomoa for iumi wari abaotem samfala samting. Olsem example, iumi savve wari abaotem wanfala exam, or for duim gud interview for wanfala waka. And taem iumi fraetem eni danger samting, datwan helpem iumi for no kasem eni nogud samting. Bat wei for wari tumas or wari olowe savve spoelem man. Long wanfala research wea olketa duim long winim 68,000 pipol, olketa faendemaot pipol wea wari olowe nomata long smol samting nomoa, olketa bae no laef longtaem. Dastawe Jesus sei: “Hao, wei for wari savve mekem eniwan long iufala savve addim go maet wanfala minute moa long laef bilong hem?” Tru nao, wei for wari no mekem man laef for longfala taem. Dastawe Jesus sei for iumi “no wari” tumas. (Matthew 6:25, 27) Bat wanem nao savve helpem iumi for no wari tumas?

Iumi mas garem gudfala tingting, garem strongfala faith long God, and garem hope for future. Nomata iumi no kasem hard taem distaem, maet iumi kasem long future. So iumi bae storyim hao wei for followim olketa samting hia helpem Paul, Janet, and Alona for no wari tumas.

Paul, wanfala dadi wea garem tufala pikinini sei: “Taem price bilong evri samting hae tumas, kaikai hem no staka and hem expensive. Mifala laenap for plande hour for tekem kaikai, bat taem mifala kasem long front, no eni kaikai stap. From pipol no garem kaikai, olketa bone nating. Samfala wakabaot gogo olketa foldaon nomoa long road. Price bilong olketa samting wea pipol needim, hem barava expensive. Gogo, selen bilong kantri no fitim eni samting nao. Selen bilong mi long bank, insurance, and pension fund no fitim eniting tu.”

Paul luksavve hem mas garem gudfala tingting mekem hem savve helpem famili bilong hem. (Proverbs 3:21) Hem sei: “Mi wanfala electrician, bat mi willing for duim eni waka nomata pei bilong hem smol tumas. Samfala pipol peim mi long kaikai or eni samting for iusim long haos. Taem olketa givim mi fofala soap, mi iusim tufala and salem nara tufala. Gogo mi kasem 40 baby kokorako. Taem olketa big, mi salem and tekem 300 baby kokorako moa. Mi exchangem tu 50 kokorako for tufala 50 kilo bag cornmeal. Famili bilong mi and olketa narawan kaikaim diswan for lelebet longfala taem.”

Paul luksavve tu hem important for trustim God. Taem iumi duim wanem God laekem, bae hem helpem iumi. Saed long wanem iumi needim, Jesus sei: “No gohed for wari tumas. . . . Dadi bilong iufala long heven savve iufala needim olketa samting hia.”—Luke 12:29-31.

Satan trikim pipol mekem olketa iusim full strong and taem bilong olketa for kasem wanem olketa needim. Olketa wari tumas abaotem samting wea olketa needim, or wea olketa tingse olketa needim, and olketa trae hard for kasem olketa samting wea olketa no needim. Staka garem kaon and olketa mas waka hard for changem datfala kaon.—Proverbs 22:7.

Samfala pipol mekem olketa disison wea spoelem olketa. Paul sei: “Staka neiba bilong mi lusim famili and olketa fren for go faendem waka long nara kantri. Samfala no garem olketa stretfala immigration pepa and olketa no savve faendem eni waka. Olketa mas haed from police and sleep nomoa long pablik ples. Olketa no depend long God for helpem olketa. Bat mi and famili depend long God for helpem mifala long hard taem wea mifala kasem saed long selen.”

FOLLOWIM ADVAES BILONG JESUS

Paul sei tu, “Jesus sei: ‘No warim samting wea bae happen tumoro, leavim go datwan for tumoro nao, bikos evri day bae olketa problem kamap. Tingim nomoa olketa problem wea iufala kasem tuday.’ So evriday mi prea long God for ‘givim mifala kaikai wea mifala needim for tuday’ mekem mifala gohed for laef. And God helpem mifala, olsem Jesus promisim. Samfala taem mifala kasem kaikai wea mifala no laekem. Olsem example, wanfala taem mi laenap for peim kaikai, bat mi no savve wanem nao olketa salem. Taem mi kasem long front, mi lukim olketa salem yogurt. Mi les long yogurt, nomata olsem, mi peim nao. Mi thankiu long God bikos mifala evritaem garem kaikai.”a

“Distaem hem no hard tumas saed long selen. Samting wea kasem mifala helpem mifala for luksavve hem important for trustim God mekem mifala no wari tumas. Sapos mifala gohed for duim wanem Jehovahb laekem, hem bae evritaem helpem mifala. Mifala barava bilivim wanem Psalm 34:8 talem. Hem sei: ‘Trustim Jehovah mekem iufala lukim wei wea hem gud tumas. Man wea depend long hem for protectim hem bae hapi.’ So sapos eni hard taem kamap moa saed long selen, mifala bae no wari tumas.

“Mifala luksavve kaikai nao savve mekem man for laef, no waka or selen. Bible sei, ‘olketa wheat bae barava grow gud.’ Mifala barava luk forward long taem wea disfala promis bilong God bae kamap tru. Distaem, ‘sapos iumi garem kaikai, kaleko, and ples for stap, iumi mas satisfae nomoa witim olketa samting hia.’ Nara scripture wea strongim mifala hem sei, ‘iufala mas no laekem tumas selen, bat iufala mas hapi nomoa long samting wea iufala garem,’ bikos God hem sei: “Bae mi nating lusim iu.” So iumi mas no fraet, bat sei: “Jehovah nao hem helpem mi. Bae mi no fraet.”’”c

For followim and trustim God, iumi mas garem strongfala faith olsem Paul and famili bilong hem. (Genesis 6:9) Sapos iumi kasem hard taem saed long selen distaem or maet iumi bae kasem long future, example bilong Paul saed long faith and gudfala tingting savve helpem iumi.

Bat waswe sapos iumi wari abaotem olketa problem long famili?

Janet sei: “No longtaem bihaen dadi bilong mi hem dae, hasband bilong mi talem hem frenim nara woman. No longtaem bihaen, hem tekem olketa kaleko bilong hem and hem go nao. Hem no baebae long mi and tufala pikinini bilong mifala tu.” Janet faendem waka, bat pei wea hem kasem hem no fitim for hem peim bak loan for haos bilong olketa. Hem kasem hard taem saed long selen and hem garem olketa nara problem tu. Hem sei: “Mi wari tumas abaotem hao mi bae lukaftarem gud famili bilong mi. Taem mi lukim olketa nara parents provaedem staka samting for pikinini bilong olketa, mi savve feel sorre bikos mi no savve duim olsem for tufala pikinini bilong mi. Mi savve tingim hao nao bae pipol ting long mi and olketa pikinini bilong mi. Waswe, olketa ting olsem mi no traem best for strongim marit bilong mitufala?”

Wei for prea helpem Janet for kontrolem feeling bilong hem and for fren gud witim God. Hem sei: “Long naet mi faendem hem hard tumas bikos mi savve tingting tumas abaotem olketa problem bilong mi. Bat wei for prea and readim Bible helpem mi for sleep. Mi laekem disfala scripture long Philippi 4:6, 7, wea sei: ‘Iufala mas no wari abaotem eni samting bat long eni samting wea iufala needim, askem God for datwan long wei for prea long hem witim wei for barava askem help bilong hem and for talem thankiu tu. Taem iufala duim olsem, peace bilong God wea winim nao wanem man savve minim bae gaedem heart and tingting bilong iufala.’ Staka naet mi prea long Jehovah and hem helpem mi for garem peace.”

Long Sermon long Maunten, Jesus sei: “Dadi bilong iufala hem savve finis long wanem iufala needim bifor iufala askem hem.” (Matthew 6:8) Datwan comfortim iumi bikos iumi savve prea long Jehovah abaotem eni samting wea iumi warim. Wei for prea savve helpem iumi for “fren gud witim God.” Taem iumi fren gud witim hem, ‘bae hem fren gud witim iumi.’—James 4:8.

Wei for storyim feeling bilong iumi long Jehovah savve mekem iumi feel gud and no wari tumas. And tu, from Jehovah hem God wea “herem prea,” hem bae duim samting for helpem olketa wea garem faith long hem. (Psalm 65:2) Dastawe Jesus talem olketa disaepol for “mas prea evritaem and no givap.” (Luke 18:1) Iumi mas gohed askem God for helpem and leadim iumi, and trustim hem for ansarem prea bilong iumi bikos long faith bilong iumi. Wei for “prea evritaem” showimaot iumi garem strongfala faith.—1 Thessalonica 5:17.

GAREM FAITH

Wanem nao iumi savve duim for garem faith? Iumi “mas lane” abaotem God. (John 17:3) Iumi duim olsem taem iumi studyim Bible for savve long tingting hem. Hem savve long iumi wanwan and hem laek helpem iumi. Bat wei for garem faith long God hem minim tu for fren gud witim hem. Hem tek taem for savve gud long wanfala man gogo hem kamap gudfala fren bilong iumi. Olsem tu, faith bilong iumi bae isisi “kamap moa strong” taem iumi gohed for lane abaotem God, ‘duim olketa samting wea hem laekem,’ and luksavve hem barava helpem iumi. (2 Corinth 10:15; John 8:29) Janet no wari tumas bikos hem garem kaen faith olsem long God.

Janet sei: “Jehovah no lusim mi long evri hard taem wea kasem mi. Datwan hem barava strongim faith bilong mi. Samfala taem samting wea no stret hem happen wea mekem mifala tingse mifala no wei nao. Taem mi prea long Jehovah hem evritaem helpem mi long wei wea mi no tingim. Taem mi talem thankiu long hem, datwan helpem mi for tingim staka gud samting wea hem duim for mi. Hem evritaem helpem mifala long taem wea mifala barava needim datwan. And mi garem olketa gudfala fren wea lovem Jehovah. Olketa evritaem helpem mi and showimaot gudfala example for tufala pikinini bilong mi followim.”a

“Mi savve why Jehovah sei long Malachi 2:16, ‘hem heitim wei for divorce.’ Wanem hasband bilong mi duim hem barava spoelem mi. Hasband bilong mi lusim mifala for staka year finis, nomata olsem, samfala taem mi lonely and feel iusles. Taem mi feel olsem, mi duim samting for helpem narawan wea datwan evritaem helpem mi tu.” Janet followim advaes long Bible for no stap seleva olowe, so datwan helpem hem for no wari tumas.b—Proverbs 18:1.

Janet sei: “Taem mi luksavve God hem ‘dadi bilong olketa wea no garem dadi and hem protectim olketa widow woman,’ datwan barava comfortim mi. Hem bae no lusim mifala olsem wanem hasband bilong mi duim.” (Psalm 68:5) Janet savve God no “duim nogud samting” long iumi. Bat hem “kaen tumas” for givim wisdom long evriwan and hem givim “strong wea winim strong bilong man” for helpem iumi for no wari tumas.—James 1:5, 13; 2 Corinth 4:7.

Bat wanem nao iumi savve duim sapos iumi wari abaotem samting wea mekem laef bilong iumi stap long danger?

Alona sei: “Taem mi herem siren krae, heart bilong mi pampam and mi ran go long ples for stap sef from bomb. Nomata mi stap long there, mi wari nomoa. Hem nogud tumas taem mi stap aotsaed and no eni ples for haed long hem. Wantaem, siren krae taem mi wakabaot followim road. Mi start for krae and mi no savve brith gud nao. Bihaen tu-thri hour mi just start for feel gud, seke nomoa, siren krae moa.”

War hem wanfala long olketa samting wea savve putim laef bilong pipol long danger. Olsem example, taem iu or narawan long famili kasem barava nogud sik, datwan savve mekem iu feel nogud tumas. Olketa narawan wari abaotem wanem nao bae happen long future. Olketa savve ting olsem, ‘Waswe, olketa pikinini or olketa granpikinini bilong iumi bae stap long world wea war hem gohed, pipol duim olketa criminal samting, climate hem change, pipol kasem nogud sik, and pollution?’ Hao nao iumi savve deal witim olketa wari olsem?

Man wea wise hem lukim danger samting and hem protectim hemseleva from datwan. (Proverbs 27:12) Iumi laek protectim tu tingting and feeling bilong iumi. Olketa raf video and olketa nius long TV showim staka piksa wea savve mekem iumi and olketa pikinini for wari and fraet. God hem savve finis olketa nogud samting hia savve mekem iumi for wari and fraet. Bat iumi shud tingim nomoa ‘evri samting wea tru, evri samting wea raeteous, evri samting wea klin, and evri samting wea mekem man garem love.’ Sapos iumi duim olsem, “God wea givim peace” bae gaedem heart and tingting bilong iumi.—Philippi 4:8, 9.

HEM IMPORTANT FOR PREA

Strongfala faith savve helpem iumi for deal witim wei for wari. Bible encouragem iumi for “prea evritaem.” (1 Peter 4:7) Iumi savve askem God for helpem iumi mekem iumi no fraet and for garem gudfala tingting. Datwan savve helpem iumi for deal witim eni hard samting from iumi sure “[God] herem iumi taem iumi askem eni samting long hem.”—1 John 5:15.

Bible sei: “Full world hem stap long paoa bilong Satan.” (1 John 5:19; John 12:31) Dastawe Jesus teachim iumi for prea olsem: “Sevem mifala from Satan.” (Matthew 6:13) Alona sei: “Enitaem mi herem siren, mi prea long Jehovah for helpem for kontrolem feeling bilong mi. And tu, hasband bilong mi savve ringim mi and hem prea witim mi. Wei for prea barava helpem mi.” Hem olsem nao wanem Bible talem, wea sei: “Jehovah hem helpem olketa wea prea long hem from heart bilong olketa.”—Psalm 145:18.

HOPE BILONG IUMI FOR FUTURE

Long Sermon long Maunten, Jesus teachim olketa follower bilong hem for prea olsem: “Mifala laekem Kingdom bilong iu for kam.” (Matthew 6:10) Kingdom bilong God bae finisim evri samting wea mekem iumi for wari. God bae iusim Jesus, wea hem “Prince bilong Peace,” for “finisim evri war long earth.” (Isaiah 9:6; Psalm 46:9) “Hem [God] bae judgem plande pipol. . . . Pipol bae no iusim sword for faetem pipol long narafala kantri, and olketa bae no lanem moa hao for faet. . . . No eniwan bae mekem olketa for fraet.” (Micah 4:3, 4) Olketa famili bae hapi and “bae wakem olketa haos and stap insaed, and olketa bae plantim olketa grape planteison and kaikaim frut bilong olketa.” (Isaiah 65:21) “And no eniwan bae sei: ‘Mi sik.’”—Isaiah 33:24.

Long distaem, samting wea iumi no expectim savve seknomoa kasem iumi, nomata iumi traem best for misstim datwan. (Ecclesiastes 9:11) For staka handred year finis, war, wei for raf, and olketa nogud sik killim dae staka gudfala pipol. Wanem hope nao hem stap for olketa hia?

Staka million pipol wea dae bae laef bak long future. Olketa sleep nomoa go kasem datfala taem. Olketa stap insaed long perfect memory bilong God go kasem taem wea “evriwan wea stap insaed long grev bae . . . laef bak.” (John 5:28, 29) Bible storyim disfala resurrection and sei, ‘hem olsem wanfala anka for laef bilong iumi wea strong and stedy.’ (Hebrew 6:19) And “evri man savve trustim diswan from [God] mekem [Jesus] for laef bak moa.”—Acts 17:31.

Distaem, nomata olketa wea traem best for mekem God hapi savve kasem hard taem and olketa savve wari tu. Paul, Janet, and Alona no wari tumas bikos olketa fren witim God long wei for prea long hem and olketa strongim faith bilong olketa long hope wea Bible storyim abaotem future. Hem helpem olketa and iumi sure, ‘God wea givim hope bae mekem iu barava hapi and helpem iu for garem peace from wei wea iu trustim hem.’—Rome 15:13.