1. Taem iumi storyim Matthew 6:9-13 wanem nao samfala samting wea iumi savve story abaotem?

STAKA pipol savve gud long datfala Lord’s Prea wea stap long Matthew 6:9-13. Taem iumi duim preaching waka, staka taem iumi savve storyim datfala prea for teachim pipol Kingdom bilong God hem wanfala gavman wea bae mekem earth kamap paradaes. Iumi savve storyim tu datfala toktok “mifala laekem nem bilong iu for holy” for teachim pipol God hem garem nem, and iumi mas showimaot iumi laekem datfala nem for holy.—Matt. 6:9.

2. Hao nao iumi savve Jesus no laekem iumi for repeatim nomoa datfala Lord’s Prea taem iumi prea?

² Waswe, taem iumi prea Jesus laekem iumi for repeatim nomoa datfala Lord’s Prea, olsem staka pipol savve duim? Nomoa. Bifor Jesus talem datfala prea, hem sei: “Taem iu prea, no talem sem samting evritaem.” (Matt. 6:7) Long narafala taem wea Jesus teachim olketa disaepol bilong hem hao for prea, hem talem moa datfala prea bat hem no iusim olketa sem word. (Luke 11:1-4) So Jesus talem datfala Lord’s Prea for teachim iumi wanem kaen samting nao iumi mas prea abaotem.

3. Wanem tufala kwestin nao iumi savve ting raonem taem iumi storyim datfala Lord’s Prea?

³ Long disfala study and long nextfala study, iumi bae story raonem datfala Lord’s Prea. Taem iumi duim diswan, ting raonem tufala kwestin hia: ‘Hao nao datfala Lord’s Prea savve helpem mi for talem olketa gudfala prea? And barava important samting nao, waswe, mi duim samting followim datfala Lord’s Prea?’

“DADI BILONG MIFALA LONG HEVEN”

4. Datfala toktok “Dadi bilong mifala” mekem iumi for tingim wanem samting, and hao nao Jehovah hem Dadi bilong olketa wea bae laef long earth?

⁴ First samting wea Jesus talem long datfala prea hem olsem: “Dadi bilong mifala.” Diswan hem mekem iumi for tingim Jehovah hem Dadi bilong iumi evriwan wea insaed organization bilong hem. (1 Pet. 2:17) Jehovah adoptim olketa anointed Christian olsem olketa son bilong hem for stap long heven, so hem barava fitim for olketa hia kolem Jehovah, “Dadi” bilong olketa. (Rome 8:15-17) Olketa wea garem hope for laef olowe long earth tu savve kolem hem “Dadi.” Jehovah nao givim laef long olketa and provaedem evri samting wea olketa needim. Olketa hia bae kamap “olketa pikinini bilong God” bihaen olketa kamap perfect and showimaot olketa faithful long Jehovah long lastfala test.—Rome 8:21; Rev. 20:7, 8.

5, 6. Wanem nambawan present nao dadi and mami savve givim long pikinini bilong olketa, and wanem nao olketa pikinini mas duim? (Lukim piksa long start bilong study.)

⁵ Taem dadi and mami teachim pikinini bilong olketa for prea and helpem olketa for luksavve Jehovah hem Dadi bilong olketa long heven, datwan hem nambawan present wea olketa givim long pikinini bilong olketa. Wanfala circuit overseer long South Africa sei: “Stretawe bihaen tufala gele bilong mifala born, mi savve prea witim tufala evri naet sapos mi no go long eni ples. Tufala sei tufala no rememberim evri samting wea mi talem long olketa prea bilong mi. Bat tufala tingim yet wei wea hem barava spesol for story witim Dadi bilong iumi Jehovah, and wei wea tufala feel sef and hapi taem mifala prea. Taem tufala fit for prea seleva, mi encouragem tufala for prea big mekem mi savve herem wanem tufala talem long Jehovah. Datwan hem nambawan chance for mi savve wanem nao stap long heart bilong tufala. Then mi savve isisi helpem tufala for storyim samfala samting long datfala Lord’s Prea mekem tufala savve talem olketa gudfala prea.”

⁶ Tufala dota bilong datfala brata gohed gud long spiritual wei. Distaem tufala marit and gohed duim full-taem service witim hasband bilong tufala. Nambawan samting wea dadi and mami savve duim for pikinini hem for teachim olketa Jehovah hem really stap, and for helpem olketa fren gud witim God. Bat olketa pikinini seleva nao mas waka hard for gohed fren gud witim Jehovah.—Ps. 5:11, 12; 91:14.

“MIFALA LAEKEM NEM BILONG IU FOR HOLY”

7. Wanem bigfala privilege nao iumi garem, bat wanem nao iumi mas no duim?

⁷ Iumi garem bigfala privilege for savve long nem bilong God and for “garem nem bilong hem.” (Acts 15:14; Isa. 43:10) Taem iumi prea long Dadi bilong iumi long heven, iumi sei: “Mifala laekem nem bilong iu for holy.” Maet iumi askem hem tu for helpem iumi for no duim or talem eni samting wea bae spoelem nem bilong hem. Iumi no laek for olsem samfala long first century wea olketa seleva no duim samting wea olketa teachim for narawan duim. Aposol Paul sei long olketa: “Samting wea iufala duim hem mekem nara pipol barava tok spoelem nem bilong God.”—Rome 2:21-24.

8, 9. Storyim example wea showimaot Jehovah helpem olketa wea laek for mekhae long nem bilong hem.

⁸ Iumi laek for mekhae long nem bilong Jehovah long evri samting wea iumi duim. Taem hasband bilong wanfala sista long Norway hem dae, sista hia mas lukaftarem son bilong hem wea tu year nomoa. Sista sei: “Hem barava no isi for mi long datfala taem. Mi prea long Jehovah klosap evri hour long day, for hem helpem mi for garem gudfala tingting, mekem mi gohed faithful long hem and no duim eni samting wea Satan savve iusim for tok daonem Jehovah. Mi laek for mekhae long nem bilong Jehovah, and mi laekem son bilong mi for lukim moa dadi bilong hem taem hem laef bak long Paradaes.”—Prov. 27:11.

⁹ Waswe, Jehovah ansarem prea bilong sista hia? Yes. Sista hia kasem encouragement taem hem evritaem associate witim olketa brata and sista. Faevfala year bihaen, hem maritim wanfala elder. Son bilong hem, wea 20 year distaem, hem baptaes finis. Sista sei: “Mi hapi tumas hasband bilong mi helpem mi for lukaftarem boy bilong mi.”

10. Wanem nao God bae duim for mekem nem bilong hem holy?

¹⁰ Jehovah bae mekem nem bilong hem holy taem hem finisim evriwan wea spoelem nem bilong hem and no laek for stap anda long rul bilong hem. (Readim Ezekiel 38:22, 23.) Long datfala taem olketa man bae kamap perfect, and evriwan long heven and long earth bae worshipim Jehovah, and mekhae long nem bilong hem. Long datfala taem, Dadi bilong iumi long heven bae “rul ovarem evriwan.”—1 Cor. 15:28.

“MIFALA LAEKEM KINGDOM BILONG IU FOR KAM”

11, 12. Long 1876, Jehovah helpem pipol bilong hem for luksavve long wanem samting?

¹¹ Bifor Jesus go bak long heven, olketa disaepol bilong hem askem hem olsem: “Hao Lord, distaem nao bae iu mekem rul bilong God kamap moa long Israel?” Jesus talem olketa hem no taem yet for olketa savve long taem wea Kingdom bilong God bae start for rul. Hem talem olketa for gohed strong for duim preaching waka. (Readim Acts 1:6-8.) Nomata olsem, Jesus teachim olketa for prea for Kingdom bilong God for kam, and luk forward for datwan. Dastawe iumi gohed prea for datfala Kingdom for kam.

¹² Klosap long taem wea Jesus start for rul long Kingdom long heven, Jehovah helpem pipol bilong hem for luksavve long year wea datwan bae happen. Long 1876, Charles Russell raetem wanfala article wea garem title: “Gentile Times: When Do They End?” Datfala article showimaot datfala “sevenfala taem” wea profesi bilong Daniel story abaotem, and datfala “taem wea olketa kantri rul” wea Jesus story abaotem, hem storyim sem samting. Article hia sei “sevenfala taem” and “taem wea olketa kantri rul” bae finis long 1914.a—Dan. 4:16; Luke 21:24.

13. Wanem nao happen long 1914, and wanem nao olketa samting wea happen start long 1914 hem pruvim?

¹³ Long 1914, war hem start long Europe and no longtaem bihaen, staka kantri long world joinim datfala war. Datfala war mekem staka pipol short long kaikai. And taem datfala war hem finis long 1918, wanfala rabis flu killim dae staka pipol raonem world, winim namba bilong pipol wea dae long datfala war. Olketa nogud samting hia wea happen hem part long datfala “saen” wea Jesus storyim. Datfala saen pruvim Jesus hem kamap King long heven long 1914. (Matt. 24:3-8; Luke 21:10, 11) Long datfala year Jesus “go for winim olketa enemy bilong hem.” (Rev. 6:2) Jesus torowem kam daon Satan and olketa demon bilong hem long disfala earth. Start long datfala taem, profesi hia kamap tru: “Earth and sea bae kasem barava nogud samting bikos Devil hem kam daon long iufala and hem kros fogud from hem savve hem garem lelebet taem nomoa.”—Rev. 12:7-12.

14. (a) Why nao iumi gohed prea for Kingdom bilong God for kam? (b) Wanem important waka nao iumi mas gohed for duim?

¹⁴ Datfala profesi long Revelation 12:7-12 helpem iumi for luksavve why nao olketa nogud samting start for happen long earth long semtaem wea Jesus kamap King long Kingdom bilong God. Nomata Jesus hem rul distaem long heven, Satan hem kontrolem yet disfala earth. Bat klosap nao Jesus bae “winim olketa enemy bilong hem” and finisim wicked pipol. Go kasem datfala taem, iumi bae gohed for prea for Kingdom bilong God for kam, and iumi bae gohed busy for preach abaotem datfala Kingdom. Preaching waka wea iumi duim hem mekem disfala profesi bilong Jesus kamap tru, wea sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”—Matt. 24:14.

“DUIM SAMTING WEA IU LAEK FOR DUIM LONG EARTH”

15, 16. Hao nao iumi savve showimaot iumi laekem God for duim wanem hem laekem long earth?

¹⁵ Samting olsem 6,000 year go finis, plan bilong God for disfala earth hem gohed. Dastawe Jehovah sei evri samting long datfala taem “hem barava gud tumas!” (Gen. 1:31) Then Satan hem againstim God, and start long datfala taem, staka pipol no duim nao wanem God laekem. Bat distaem, samting olsem eit million pipol nao worshipim Jehovah. Olketa hia prea long God and askem hem for duim samting wea hem laek for duim long earth, and olketa duim tu wanem God laekem. Olketa followim long laef bilong olketa wanem God talem olketa for duim, and olketa strong for teachim nara pipol abaotem Kingdom.

¹⁶ Olsem example, wanfala missionary sista long Africa, wea 80 year and wea baptaes long 1948, hem sei: “Staka taem mi savve prea and askem Jehovah for evriwan wea olsem sheepsheep herem truth and for Jehovah helpem olketa savve long hem bifor end hem kam. And tu, bifor mi preach long eniwan, mi prea long God for helpem mi kasem heart bilong olketa. And mi prea for Jehovah blessim waka bilong iumi for helpem olketa wea olsem sheepsheep wea herem truth finis.” Disfala sista hem helpem staka pipol for lane abaotem Jehovah. Maet iu tu tingim samfala olo brata and sista wea strong for duim wanem Jehovah laekem.—Readim Philippi 2:17.

17. Wanem nao tingting bilong iu abaotem samting Jehovah bae duim long future for iumi olketa man and long disfala earth?

¹⁷ Iumi bae gohed prea long Jehovah for duim wanem hem laek for duim long earth, go kasem taem wea hem bae finisim evri enemy bilong hem. Then earth bae kamap paradaes and staka billion pipol bae laef bak. Jesus sei: “Taem bae kam wea evriwan wea stap insaed long grev bae herem toktok bilong hem and laef bak.” (John 5:28, 29) Iumi bae hapi tumas for welkamim bak olketa wea iumi lovem wea dae finis! God “bae draem evri tias long eye” bilong iumi. (Rev. 21:4) Staka long olketa wea bae laef bak hem “pipol wea no raeteous” wea no savve long Jehovah and Jesus bifor olketa dae. Iumi bae hapi tumas for teachim olketa abaotem wanem God laekem mekem olketa tu savve kasem “laef olowe.”—Acts 24:15; John 17:3.

18. Wanem nao olketa man barava needim?

¹⁸ Taem Kingdom bilong God hem kam, hem bae mekhae long nem bilong God, and evriwan long heven and long earth bae wan mind for worshipim Jehovah. Tru nao, olketa man bae kasem wanem olketa barava needim taem God ansarem thrifala first samting wea Lord’s Prea storyim. Long nextfala study, iumi bae storyim olketa nara important samting wea iumi mas prea abaotem wea Lord’s Prea storyim.

1-3. Wanem nao happen long wanfala sista wea mekem hem sure Jehovah savve long wanem iumi needim?

LANA, wanfala regular pioneer, bae no forgetim samting wea happen long hem long Germany long 2012. Hem sei Jehovah ansarem tufala prea bilong hem long datfala taem. Taem hem gogo long train for go long airport, hem prea long Jehovah for helpem hem for preach long eniwan. Then taem hem kasem airport, olketa talem hem flight bilong hem cancel for next day. So hem prea moa bikos hem no garem inaf selen, and hem no garem eni ples for stap long datfala naet.

² Taem Lana prea finis nomoa, hem herem samwan sei: “Hello, Lana, iu go wea?” Hem wanfala young man wea tufala skul tugeta bifor. Datfala man redi for go long South Africa, and mami and granmami bilong hem kam for lusim hem long airport. Taem Lana storyim samting wea kasem hem, mami and granmami bilong man hia invaetem Lana for go sleep long haos bilong olketa. Tufala askem staka kwestin abaotem olketa biliv bilong Lana, and pioneer waka wea hem duim.

³ Long next morning, bihaen olketa kaikai, tufala askem Lana samfala kwestin moa abaotem Bible. Lana askem tufala sapos hem olraet for samwan contactim tufala and gohed ansarem olketa kwestin bilong tufala. Then Lana go bak long hom bilong hem, and gohed pioneer. Lana sure Jehovah herem prea bilong hem and helpem hem long datfala taem.—Ps. 65:2.

4. Wanem nao bae iumi storyim long disfala study?

⁴ Taem iumi kasem problem, iumi no hol bak for prea long Jehovah for askem hem for helpem iumi. Jehovah laekem iumi for prea long hem long olketa taem olsem. (Ps. 34:15; Prov. 15:8) Bat Lord’s Prea showimaot samfala samting wea moa important hem stap wea iumi mas no forget for prea long Jehovah abaotem. Long disfala study, bae iumi storyim nara fofala samting wea iumi mas prea abaotem, and hao olketa samting hia savve helpem iumi gohed faithful long Jehovah.—Readim Matthew 6:11-13.

“GIVIM MIFALA KAIKAI WEA MIFALA NEEDIM FOR TUDAY”

5, 6. Nomata iumi garem staka kaikai, why nao iumi shud prea olsem: “Givim mifala kaikai wea mifala needim”?

⁵ Jesus sei “givim mifala kaikai wea mifala needim,” hem no sei “givim mi kaikai wea mi needim.” Victor, wea hem circuit overseer long Africa, sei: “Staka taem mi savve sei thankiu long Jehovah from mitufala waef bilong mi no need for wari tumas abaotem kaikai and ples for stap. Olketa brata and sista nao lukaftarem mifala and provaedem wanem mifala needim evriday. Bat mi savve prea for Jehovah helpem olketa for deal witim olketa hevi wea olketa kasem saed long selen.”

⁶ Maet iumi garem staka kaikai, bat staka brata bilong iumi olketa poor. And tu, samfala kasem natural disaster. Iumi savve prea for olketa, and iumi savve helpem olketa tu. Olsem example, iumi savve givim samfala samting wea olketa needim. And tu, iumi savve givim contribution for waka raonem full world. Iumi savve organization bilong Jehovah iusim olketa contribution hia for helpem olketa brata wea needim help.—1 John 3:17.

7. Wanem nao Jesus talem wea showimaot iumi shud “no warim samting wea bae happen tumoro”?

⁷ Bihaen Jesus talem Lord’s Prea, hem sei iumi shud no aftarem olketa material samting. Hem sei: “Sapos God hem givim kaleko long olketa flaoa wea stap long bush . . . hao, iufala tingse hem bae givim nomoa kaleko long olketa flaoa and no long iufala, wea important winim olketa flaoa hia? Faith bilong iufala hem no strong! So no wari and sei, . . . ‘Wanem nao bae mifala werem?’” Jesus sei tu: “No warim samting wea bae happen tumoro.” (Matt. 6:30-34) Diswan showimaot iumi shud no aftarem olketa material samting, bat iumi shud satisfae sapos iumi garem wanem iumi needim for each day. Olsem example, iumi savve prea for olketa samting olsem: ples for stap, waka for selen for lukaftarem famili, and for mekem olketa wise disison taem iumi sik. Bat nara samting stap wea moa important for iumi prea for hem.

8. Samting wea Jesus talem abaotem kaikai wea iumi needim evriday hem mekem iumi tingim wanem samting? (Lukim piksa long start bilong study.)

⁸ Samting wea Jesus talem abaotem kaikai wea iumi needim evriday hem mekem iumi tingim narafala samting wea hem talem. Hem sei: “Samting wea mekem man laef nao, hem no kaikai nomoa, bat hem evri toktok wea kamaot from mouth bilong Jehovah.” (Matt. 4:4) So iumi shud prea for Jehovah gohed teachim iumi, and givim iumi wanem iumi needim for gohed fren gud witim hem.

“FORGIVIM KAON BILONG MIFALA”

9. Why nao Jesus sei wei for duim sin hem olsem iumi garem kaon long Jehovah?

⁹ Jesus sei: “Forgivim kaon bilong mifala.” Long narafala taem hem sei: “Forgivim sin bilong mifala.” (Matt. 6:12, footnote; Luke 11:4) Hem talem tufala toktok hia bikos taem iumi duim sin hem olsem iumi garem kaon long Jehovah. Long 1951, The Watchtower magasin sei iumi evriwan mas lovem and obeyim Jehovah, so taem iumi no obeyim hem and duim sin, hem olsem iumi no peim kaon bilong iumi long Jehovah. The Watchtower sei Jehovah savve chus for no fren witim iumi sapos hem laek for duim datwan. Hem sei tu: “Man wea duim sin hem no showimaot love long God.”—1 John 5:3.

10. Wanem nao openem wei for Jehovah forgivim olketa sin bilong iumi, and wanem tingting nao iumi shud garem abaotem datwan?

¹⁰ Iumi barava tinghae long ransom sakrifaes bilong Jesus. Datwan openem wei for Jehovah forgivim olketa sin bilong iumi! Evriday iumi needim forgiveness from Jehovah. Nomata Jesus dae for iumi klosap 2,000 year go finis, iumi still kasem gudfala samting from datfala ransom distaem. Iumi shud evritaem sei thankiu long Jehovah for disfala nambawan present. From iumi evriwan no perfect, no eni man long earth savve givim ransom long God for sevem iumi from sin and dae. (Readim Psalm 49:7-9; 1 Peter 1:18, 19.) Datfala toktok, “forgivim sin bilong mifala” insaed long Lord’s prea, mekem iumi luksavve hem no iumiseleva nomoa wea needim ransom, bat evri brata and sista bilong iumi tu needim datwan. Diswan showimaot Jehovah laekem iumi for tingim narawan tu, and wei wea olketa fren witim hem. And taem narawan sin againstim iumi, iumi mas willing for forgivim olketa. Staka taem samting wea olketa duim hem smol samting nomoa, bat taem iumi forgivim olketa, datwan showimaot iumi lovem olketa. And tu, datwan showimaot iumi tinghae long wei wea Jehovah forgivim iumi.—Col. 3:13.

11. Why nao hem important for iumi mas willing for forgivim narawan?

¹¹ From iumi no perfect, samfala taem maet iumi no laek for forgivim narawan wea mekem iumi feel nogud. (Lev. 19:18) Sapos iumi start for storyim long narawan wanem datfala brata or sista duim, maet samfala saedem iumi, and datwan bae spoelem wan mind bilong kongregeson. Sapos iumi letem diswan for gohed, datwan showimaot iumi no tinghae long ransom and mercy bilong God, and bae iumi no kasem gud samting from ransom. (Matt. 18:35) Sapos iumi no willing for forgivim narawan, Jehovah bae no iusim ransom for forgivim iumi. (Readim Matthew 6:14, 15.) And tu, sapos iumi laekem Jehovah for forgivim iumi, iumi mas no gohed duim eni samting wea hem heitim.—1 John 3:4, 6.

“HELPEM MIFALA FOR NO FOLDAON . . . FOR DUIM WANEM HEM NO STRET”

12, 13. (a) Wanem nao happen long Jesus no longtaem bihaen hem baptaes? (b) Sapos Satan win for switim iumi, why nao iumi shud no blamem narawan? (c) Wei wea Jesus faithful go kasem taem hem dae, hem pruvim wanem samting?

¹² Lord’s Prea sei: “Helpem mifala for no foldaon long eni samting wea switim mifala for duim wanem hem no stret.” Datwan mekem iumi tingim samting wea happen long Jesus no longtaem bihaen hem baptaes. Spirit bilong God leadim Jesus go long wilderness “for Devil savve traem hem.” (Matt. 4:1; 6:13) Why nao Jehovah letem Satan for traem Jesus? Taem Adam and Eve rejectim rul bilong Jehovah, samfala kwestin kamap wea needim taem for ansarem. Jehovah sendem Jesus long earth for ansarem olketa kwestin hia. Olsem example, waswe, Jehovah hem no wakem gud long olketa man? Waswe, man wea perfect fit for faithful long Jehovah taem Satan traem hem? And waswe, bae hem moabeta for olketa man rulim olketa seleva winim for God nao rulim olketa? (Gen. 3:4, 5) Long future, taem evri kwestin hia kasem ansa fitim hao Jehovah laekem, evriwan long heven and earth bae savve rul bilong Jehovah nomoa bae givim gud samting long evriwan.

¹³ Jehovah hem holy so hem no savve switim eniwan for duim olketa nogud samting. Satan nao hem man for traem pipol. (Matt. 4:3) Satan trae for switim iumi long staka difren wei. Bat iumi nao savve chus. Each wan long iumi savve disaed for againstim Satan or nomoa. (Readim James 1:13-15.) Taem Satan traem Jesus, stretawe Jesus rejectim hem and talem toktok from olketa Holy Raeting. Jesus hem faithful long God. Nomata olsem, Satan no givap. Hem weitim “eni chance for hem savve traem [Jesus] moa.” (Luke 4:13) Bat nomata wanem Satan duim, Jesus evritaem obeyim God. Hem laek for stap anda long rul bilong God, and hem pruvim man wea perfect fit for faithful long Jehovah nomata hem kasem barava hard taem. Nomata olsem, Satan trae for switim olketa wea followim Jesus, and hem trae for switim iu tu, for no obeyim Jehovah.

14. Wanem nao iumi mas duim for no foldaon long sin?

¹⁴ Olketa kwestin wea Satan mekem kamap abaotem raet bilong Jehovah for rul no kasem ansa yet. So Jehovah letem Satan gohed traem iumi. Jehovah no “switim [iumi] for duim wanem hem no stret.” Jehovah hem sure iumi savve gohed faithful long hem, and hem laek for helpem iumi. Bat from hem respectim wei wea iumi savve disaedem samting seleva, hem letem iumi for chus for faithful long hem or nomoa. Iumi mas duim tufala samting sapos iumi laek for no foldaon long sin. Iumi mas gohed fren gud witim Jehovah, and gohed prea long hem for helpem iumi. Long wanem wei nao hem ansarem olketa prea olsem?

15, 16. (a) Wanem nao samfala samting wea iumi mas stap klia long hem? (b) Sapos iumi duim samting wea no stret, why nao iumi shud no blamem Satan?

¹⁵ Jehovah savve givim holy spirit for helpem iumi no foldaon long olketa trik bilong Satan. And tu, Jehovah givim Bible and kongregeson for warnim iumi long olketa samting wea iumi mas stap klia long hem. Olsem example, hem warnim iumi for no spendem staka taem, selen, and strong bilong iumi long olketa samting wea iumi no needim. Espen and Janne stap long wanfala rich kantri long Europe. Tufala pioneer for staka year long ples wea needim samfala pablisa moa. Taem tufala garem pikinini tufala mas stop for pioneer, and distaem Espen and Janne garem tufala pikinini. Espen sei: “Distaem mifala no savve spendem staka taem long olketa spiritual samting olsem mifala savve duim bifor, so mifala evritaem prea long Jehovah for helpem mifala for no foldaon long eni samting wea savve switim mifala. Mifala askem Jehovah for helpem mifala gohed strong long spiritual wei and long ministry.”

¹⁶ Narafala samting wea iumi mas stap klia long hem nao hem wei for lukluk long olketa rabis piksa. Sapos iumi lukluk long olketa rabis piksa, iumi no savve blamem Satan for datwan. Why nao olsem? Bikos hem samting wea iumiseleva nao disaed for duim. Satan and world bilong hem no savve forcem iumi for duim rong samting. Samfala lukluk long rabis piksa from olketa no rejectim dirty tingting. Bat staka brata and sista bilong iumi olketa no foldaon long disfala test, and iumi tu savve olsem olketa.—1 Cor. 10:12, 13.

“SEVEM MIFALA FROM SATAN”

17. (a) Wanem nao iumi shud duim for showimaot iumi laekem Jehovah for “sevem [iumi] from Satan”? (b) Wanem samting nao iumi luk forward long hem?

¹⁷ Wanem nao iumi shud duim for showimaot iumi laekem Jehovah for “sevem [iumi] from Satan”? Iumi mas “no olsem pipol long world [bilong Satan]” and “no lovem world [bilong Satan] and no lovem tu olketa samting long world.” (John 15:19; 1 John 2:15-17) Bae iumi barava hapi taem Jehovah finisim Satan and disfala nogud world bilong hem! Bat go kasem datfala taem, iumi mas no forget Satan hem “kros fogud from hem savve hem garem lelebet taem nomoa.” Hem bae waka hard for spoelem wei wea iumi fren witim Jehovah. So iumi mas gohed prea for Jehovah protectim iumi from Satan.—Rev. 12:12, 17.

18. Sapos iumi laek for stap laef taem world bilong Satan hem finis, wanem nao iumi mas duim?

¹⁸ Waswe, iu laek for stap long niu world wea Satan bae no spoelem eniwan? Sapos olsem, gohed prea for Kingdom bilong God for kam, for nem bilong God for holy, and for hem duim samting wea hem laek for duim long earth. Trustim Jehovah evritaem for lukaftarem iu and for hem givim evri samting wea iu needim for gohed faithful long hem. Tru nao, iumi evriwan laek for gohed duim samting followim datfala Lord’s Prea.