EACH week, klosap evri kongregeson bilong Olketa Jehovah’s Witness arrange for garem pablik tok abaotem wanfala Bible subject. Sapos iu wanfala elder or ministerial servant, waswe, iu showimaot hao iu wanfala gudfala pablik speaker, wanfala teacher? Sapos olsem, maet olketa invaetem iu for givim wanfala pablik tok. Theocratic Ministry Skul hem helpem staka thousand brata finis for kasem mark for disfala privilege bilong service. Taem olketa assignim iu wanfala pablik tok, wea nao iu shud start?

Studyim Aotlaen

Bifor iu duim eni research, readim and ting raonem datfala aotlaen go kasem taem iu barava minim gud. Ting raonem gud datfala theme, wea hem nao title bilong tok. Wanem nao samting wea iu mas teachim long audience? Wanem nao goal bilong iu?

Savve gud long olketa main heding. Ting raonem olketa main point hia. Hao nao each wan hem join witim theme? Olketa subpoint stap anda long each main point. Olketa nara point wea saportim olketa subpoint stap anda long olketa. Tingim hao each sekson bilong aotlaen hem build antap long sekson bifor datwan, lead go long next wan, and help for kasem goal bilong tok. Bihaen iu minim datfala theme, goal bilong tok, and wei wea olketa main point fulfillim datfala goal, iu redy nao for preparem datfala information.

Firstaem, maet hem helpem iu for tingim tok bilong iu olsem foa or faevfala shortfala tok, wea each wan garem wanfala main point. Preparem each wan separate.

Aotlaen wea olketa provaedem hem wanfala tul for helpem iu prepare. Iu shud no iusim olsem olketa note for tok bilong iu. Hem olsem olketa bon nating. Iu bae need for putim meat long hem, givim wanfala heart, and givim laef long hem.

Wei for Iusim Olketa Scripture

Jesus Christ and olketa disaepol bilong hem iusim olketa scripture olsem faondeson for teaching bilong olketa. (Luke 4:16-21; 24:27; Acts 17:2, 3) Iu savve duim sem samting. Olketa scripture shud kamap faondeson bilong tok bilong iu. Winim wei for explainim and showim hao for followim nomoa samting wea aotlaen talem, luksavve hao olketa scripture saportim samting wea aotlaen talem, and then iusim olketa scripture for teach.

Taem iu preparem tok bilong iu, lukluk gud long each scripture long aotlaen. Tingim olketa verse wea stap raonem. Samfala scripture maet stap for just givim moa information abaotem samting nomoa. Iu no need for readim and storyim evri scripture insaed long tok bilong iu. Chusim olketa best wan wea fitim audience. Sapos iu iusim gud olketa scripture wea insaed long datfala aotlaen, maet iu no need for iusim eni extra wan.

For tok bilong iu kamap gud, hem no depend long haomas scripture iu iusim, bat long wei wea iu teach. Taem iu introducem olketa scripture, showim why nao iu iusim olketa. Markem inaf taem for storyim hao for followim olketa. Bihaen iu readim wanfala scripture, keepim Bible bilong iu open taem iu storyim datfala scripture. Audience bae duim sem samting. Hao nao iu savve muvim audience for interest and helpem olketa for kasem moa gudfala samting from Word bilong God? (Neh. 8:8, 12) Iu savve duim long wei for explainim, iusim tokpiksa, and showim hao for followim.

Explainim. Taem iu preparem hao for explainim wanfala main scripture, askem iuseleva: ‘Wanem nao mining bilong hem? Why nao mi iusim long tok bilong mi? Wanem nao maet audience askem olketa seleva abaotem disfala verse?’ Maet iu need for ting raonem wanem olketa verse wea stap raonem talem, olketa samting wea go ahed long datfala taem, samting wea lead go long datwan, paoa bilong olketa word, and goal bilong man wea raetem. Diswan needim research. Bae iu faendem staka gudfala information insaed long olketa pablikeson wea “faithful and wise slave” provaedem. (Matt. 24:45-47) No trae for explainim evri samting abaotem datfala verse, bat explainim wei wea hem join witim point wea iu storyim.

Tokpiksa. Goal bilong olketa tokpiksa hem for helpem audience for kasem mining wea moa deep or for helpem olketa rememberim wanfala point or principle wea iu storyim finis. Olketa tokpiksa helpem pipol for joinim samting iu talem witim samting olketa savve finis long hem. Hem nao samting wea Jesus duim taem hem givim Sermon long Maunten. “Olketa bird bilong heven,” “olketa lily flaoa long field,” “smolfala gate,” wanfala “smolfala road,” wanfala “haos antap long ston,” and planti toktok olsem, mekem teaching bilong hem garem paoa, klia, and hard for forgetim.—Matt., chap. 5–7.

Hao for Followim. Wei for explainim and givim example for wanfala scripture bae givim savve, bat for followim datfala savve nao bae mekem man kasem gud samting. Tru, hem responsibility bilong olketa long audience for duim samting followim message bilong Bible, bat iu savve helpem olketa for luksavve long wanem nao olketa need for duim. Bihaen iu feel sure hao audience minim datfala verse and minim wei wea hem join witim point wea iu mekem, spendem lelebet taem for showim olketa wei wea datwan affectim biliv and fasin. Mekhae long olketa gudfala samting wea bae kamaot from wei for lusim olketa rongfala idea or fasin wea no followim truth wea iu storyim.

Taem iu ting raonem hao nao audience savve followim olketa scripture, remember hao olketa kam from planti difren kaen living and feisim staka difren samting. Maet samfala long olketa niu, young, olo, and stragol witim olketa difren kaen problem. Mekem tok bilong iu samting for helpem pipol and followim really samting long laef. Stap klia long wei for givim kaonsel wea luk olsem iu markem for tu-thri man nomoa.

Olketa Disison Bilong Speaker

Samfala disison abaotem tok bilong iu olketa disaedem finis. Olketa main point, and haomas taem iu garem for storyim each main heding olketa raetem klia. Iu nao savve mekem olketa nara disison. Maet iu chus for spendem moa taem long samfala subpoint winim olketa narawan. No tingse taem iu markem for storyim evri subpoint mas semsem. Maet datwan mekem iu for kwiktaem tumas long datfala information and audience bae hard for minim. Hao nao iu savve disaed which wan for storyim gud and which wan for talem kwiktaem? Askem iuseleva: ‘Wanem nao olketa point wea bae helpem mi teachim main idea bilong tok? Which wan long olketa nao savve barava helpem audience bilong mi? Waswe, for no iusim wanfala scripture and point wea join witim datwan bae mekem tok no garem wanem hem needim for kasem goal bilong hem?’

Barava careful for no talem samting wea no garem eni pruv or tingting bilong iuseleva. Nomata Son bilong God, Jesus Christ, hem stap klia long wei for talem ‘samting bilong hemseleva.’ (John 14:10) Luksavve hao reason for pipol kam long olketa meeting hem for herem story abaotem Bible. Sapos pipol start for tingim iu olsem wanfala gudfala speaker, planti taem diswan hem bikos hem fasin bilong iu for mekhae no long iuseleva bat long Word bilong God. From diswan, pipol tinghae long olketa tok bilong iu.—Phil. 1:10, 11.

From iu mekem wanfala aotlaen nomoa for kamap wanfala barava interesting tok for minim olketa scripture, iu need for practicem tok bilong iu. Hem help for practicem big. Important samting hem for mek sure iu savve gud long evri point. Iu mas fit for story witim fasin for biliv strong, mekem information kamap interesting and givim long wei wea showaot iu barava hapi for sharem datfala truth. Bifor iu givim tok bilong iu, askem iuseleva: ‘Wanem nao mi hope for duim? Waswe, olketa main point showaot klia? Waswe, mi barava mekem olketa scripture for kamap olsem faondeson bilong tok bilong mi? Waswe, each main point lead go long next wan? Waswe, tok buildimap wei for tinghae long Jehovah and olketa samting hem provaedem? Waswe, conclusion hem barava join witim theme, showim audience wanem nao for duim, and muvim olketa for duim datwan?’ Sapos iu savve sei yes long olketa kwestin hia, then iu fit for ‘duim gud samting witim savve,’ for helpem kongregeson and praisem Jehovah!—Prov. 15:2.

WANEM nao goal bilong iu olsem wanfala teacher? Sapos iu kamap wanfala Kingdom pablisa no longtaem go nomoa, iu bae want for lane hao for conductim wanfala hom Bible study, from Jesus givim olketa disaepol bilong hem assignment for mek-disaepol. (Matt. 28:19, 20) Sapos iu garem lelebet savve finis abaotem hao for duim diswan, maet goal bilong iu hem for kamap moabeta long wei for kasem heart bilong olketa wea iu trae for helpem. Sapos iu wanfala mami or dadi, iu bae want for kamap wanfala teacher wea savve muvim olketa pikinini bilong iu for dedicatem laef bilong olketa seleva long God. (3 John 4) Sapos iu wanfala elder or iu trae hard for kamap wanfala elder, maet iu want for kamap wanfala pablik speaker wea savve buildimap insaed long olketa wea lisin, wei for ting moa hae long Jehovah and olketa wei bilong hem. Hao nao iu savve kasem olketa goal hia?

Lane from Nambawan Teacher, Jesus Christ. (Luke 6:40) Nomata Jesus hem story witim bigfala sekson long wanfala maunten or tu-thri pipol wea wakabaot long road, samting hem talem and wei wea hem talem barava affectim olketa for longtaem. Jesus muvim mind and heart bilong olketa wea lisin long hem, and hem storyim wei for followim teaching wea olketa savve minim. Waswe, iu savve duim olketa samting olsem?

Depend Long Jehovah

Samting wea mekem savve bilong Jesus for teach kamap moabeta hem klos wei for fren wea hem garem witim Dadi bilong hem long heven and blessing bilong spirit bilong God. Waswe, iu barava strong for askem Jehovah long prea for helpem iu kamap fit for conductim wanfala gudfala hom Bible study? Sapos iu wanfala mami or dadi, waswe, iu prea evritaem for help taem iu teachim olketa pikinini bilong iu? Waswe, iu talem prea wea kamaot from heart bilong iu taem iu prepare for givim olketa tok or conductim olketa meeting? Kaen wei for depend long Jehovah olsem bae helpem iu for kamap wanfala teacher wea moabeta.

Wei for depend long Jehovah hem showaot tu long wei for depend long Word bilong hem, Bible. Taem hem prea long lastfala naet bilong hem olsem wanfala perfect man, Jesus talem Dadi bilong hem: “Mi givim word bilong iu long olketa.” (John 17:14) Nomata Jesus garem bigfala savve, hem nating talem tingting bilong hemseleva. Hem evritaem talem samting wea Dadi bilong hem teachim long hem, wea hem wanfala example for iumi followim. (John 12:49, 50) Toktok bilong God insaed Bible garem paoa for affectim pipol—samting wea olketa duim, tingting and feeling bilong olketa. (Heb. 4:12) Taem iu grow long savve bilong Word bilong God and lane for iusim gud datwan long ministry bilong iu, bae iu mekem grow kaen savve for teach wea bae pullim pipol long God.—2 Tim. 3:16, 17.

Honorim Jehovah

For followim example bilong Jesus saed long teaching, hem no for savve hao for givim tok wea interesting nomoa. Hem tru, pipol sapraes long “olketa naesfala toktok” wea Jesus talem. (Luke 4:22) Bat, wanem nao goal bilong Jesus for story gud? Hem for givim honor long Jehovah, no for mekhae long hemseleva. (John 7:16-18) Hem barava encouragem olketa follower bilong hem: “Letem laet bilong iufala shaen front long olketa man, mekem olketa savve lukim olketa gudfala waka bilong iufala and givim glory long Father bilong iufala wea stap long heven.” (Matt. 5:16) Datfala kaonsel shud affectim wei wea iumi teach. Hem shud goal bilong iumi for stap klia long eni samting wea againstim datfala goal. So taem iumi planim wanem for talem and hao for talem, hem gud for askem iumiseleva, ‘Bae diswan mekem wei for tinghae long Jehovah kamap moa deep, or bae pullim interest kam long mi nomoa?’

Olsem example, iu savve iusim olketa tokpiksa and olketa really-laef example for teach long gudfala wei. Bat, taem iu talem wanfala tokpiksa wea long tumas or wanfala experience wea iu talem evri part bilong hem, point wea iu laek for mekem maet lus nao. Olsem tu, wei for talem olketa story for mekem pipol laf nomoa, hem no fitim purpose bilong ministry bilong iumi. Hem olsem teacher pullim interest kam long hemseleva, winim wei for kasem really goal bilong theocratic education.

“Luksavve” Hao Tufala Samting Difren

For kamap wanfala really disaepol, man mas minim gud samting hem lanem. Hem mas herem truth and lukim wei wea hem difren from olketa nara biliv. Wei for lukim hao tufala samting difren bae help long diswan.

Jehovah evritaem encouragem pipol bilong hem for “luksavve” long samting wea klin and samting wea no klin. (Lev. 10:9-11) Hem talem hao olketa wea bae serve insaed long nambawan spiritual temple bilong hem, bae teachim pipol “wei wea holy samting hem difren from samting wea spoelem holy samting.” (Ezek. 44:23) Buk bilong Proverbs hem fulap witim wei wea raeteous fasin hem difren from nogud fasin and wisdom hem difren from krangge fasin. Iumi savve minim wei wea olketa samting hem difren nomata olketa samting wea no opposite long each other. Long Romans 5:7, aposol Paul storyim wei wea wanfala raeteous man and wanfala gudfala man olketa difren. Long buk bilong Hebrews, hem showim wei wea service wea Christ duim olsem hae priest hem winim service bilong Aaron. Tru nao, olsem man for givim education long mek-17 century, John Amos Comenius hem raet: “For teach hem minim nomoa for showim wei wea samting hem difren from nara samting saed long purpose, lukluk, and start bilong olketa. . . . So man wea explainim gud wei wea samting hem difren from nara samting hem teach gud.”

Olsem example, wei for teachim samwan abaotem Kingdom bilong God. Sapos hem no minim wanem nao Kingdom, maet iu showim hao samting wea Bible talem hem difren from idea for sei Kingdom hem samting insaed long heart bilong man. Or iu savve showim hao Kingdom hem difren from olketa gavman bilong man. Bat for pipol wea savve long olketa main truth, maet iu givim moa information. Maet iu showim hao Kingdom bilong Messiah hem difren from rul bilong Jehovah wea ovarem evriwan wea Psalm 103:19 hem story abaotem, or from ‘kingdom bilong Son wea God lovem,’ long Colossians 1:13, or from “administration,” wea Ephesians 1:10 storyim. Wei for showim hao samting hem difren from nara samting savve helpem audience bilong iu for minim gud disfala important teaching bilong Bible.

Jesus hem evritaem iusim disfala wei for teach. Hem showim hao wei wea staka pipol minim Law bilong Moses hem difren from trufala purpose bilong Law. (Matt. 5:21-48) Hem showim hao trufala wei for worshipim God hem difren from hypocrite fasin bilong olketa Pharisee. (Matt. 6:1-18) Hem showim hao spirit bilong olketa wea ‘bossim’ nara pipol hem difren from spirit for sakrifaesim seleva wea olketa wea followim hem bae showimaot. (Matt. 20:25-28) Long narataem, olsem Matthew 21:28-32 talem, Jesus invaetem olketa wea lisin long hem for disaed seleva sapos man wea tingse hem raeteous hem difren from trufala wei for repent. Datwan leadim iumi for tingim narafala important part bilong gudfala wei for teach.

Encouragem Olketa wea Lisin for Tingting

Long Matthew 21:28, iumi readim hao Jesus startim wei wea hem markem samting taem hem ask: “Wanem nao tingting bilong iu?” Wanfala gud teacher no talem nomoa olketa tru samting or givim ansa. Bat, hem encouragem olketa wea lisin long hem for mekem grow wei for tingting gud. (Prov. 3:21; Rom. 12:1) Insaed diswan hem wei for askem olketa kwestin. Olsem Matthew 17:25 talem, Jesus hem ask: “Wanem nao tingting bilong iu, Simon? Olketa king bilong earth kasem selen or hed tax from hu nao? From olketa son bilong olketa or from olketa stranger?” Olketa kwestin bilong Jesus for mekem man tingting, helpem Peter seleva for kasem stretfala ansa abaotem wei for peim temple tax. Olsem tu, taem hem ansa long man wea ask, “Hu nao really neiba bilong mi?” Jesus markem hao wanfala priest and wanfala Levite duim samting wea difren from wanfala Samaritan. Then hem askem disfala kwestin: “Long tingting bilong iu, hu long thrifala hia nao mekem hemseleva kamap neiba bilong disfala man wea olketa man for steal spoelem?” (Luke 10:29-36) Long hia moa, winim wei for tingting for man wea lisin long hem, Jesus invaetem hem for ansarem kwestin bilong hemseleva.—Luke 7:41-43.

Trae for Kasem Heart

Olketa teacher wea minim Word bilong God luksavve hao tru worship hem no minim for baeheartim samfala information or followim samfala rul nomoa. Wei for fren witim Jehovah and for tinghae long olketa wei bilong hem nao faondeson bilong diswan. Heart tu insaed long worship olsem. (Deut. 10:12, 13; Luke 10:25-27) Long olketa scripture, planti taem disfala word “heart” minim full man long insaed, and insaed long diswan hem samting wea man wantem, olketa feeling, and samting wea muvim hem.

Jesus hem savve hao nomata man lukim samting long aotsaed, God lukim wanem nao insaed long heart. (1 Sam. 16:7) Samting wea shud muvim iumi for servem God hem love wea iumi garem for hem, no for duim samting for apim iumi seleva front long olketa narawan. (Matt. 6:5-8) Long narasaed, olketa Pharisee duim planti samting for mekem olketa seleva luk gud. Olketa barava strongim wei for obeyim evri part bilong law and olketa rul wea olketa nao mekem. Bat olketa fail for showimaot long laef bilong olketa, olketa fasin wea bae showimaot wei wea olketa servem datfala God wea olketa sei olketa worshipim. (Matt. 9:13; Luke 11:42) Jesus hem teachim pipol hao hem important for obeyim samting wea Jehovah askem iumi for duim, bat samting wea insaed long heart nao bae affectim wei wea man obey. (Matt. 15:7-9; Mark 7:20-23; John 3:36) Teaching bilong iumi bae duim barava gud samting sapos iumi followim example bilong Jesus. Hem important for iumi helpem pipol for lanem wanem nao God mas kasem from olketa. Bat hem important tu for olketa savve long Jehovah and lovem hem olsem wanfala person, mekem fasin bilong olketa kamap samting wea showimaot hao olketa tinghae long datfala wei for fren witim trufala God wea hem appruvim.

Bat, for kasem gudfala samting from disfala teaching, pipol need for feisim wanem nao insaed long heart bilong olketa. Jesus encouragem pipol for ting raonem olketa samting wea muvim olketa, and for tingim wanem nao feeling bilong olketa. Taem hem stretem wanfala rong tingting, hem askem olketa wea lisin long hem why nao olketa tingim, talem, or duim samfala samting. Bat, winim wei for just askem olketa kwestin nomoa, Jesus talem wanfala toktok, tokpiksa, or duim samting wea encouragem olketa for garem stretfala tingting abaotem datwan. (Mark 2:8; 4:40; 8:17; Luke 6:41, 46) Long sem wei, iumi savve helpem olketa wea lisin long iumi for askem olketa seleva kaen kwestin olsem: ‘Why nao mi laek for duim samting hia? Why nao mi duim samting olsem taem diswan hem happen?’ Then muvim olketa for lukluk long samting olsem hao Jehovah hem lukluk long hem.

Showim Hao for Followim

Wanfala gudfala teacher hem savve hao “wisdom hem main samting.” (Prov. 4:7) Wisdom hem wei wea man iusim savve for stretem olketa problem, for stap klia long danger, for kasem olketa goal, for helpem narawan. Hem responsibility bilong teacher for helpem olketa student lane hao for duim datwan, bat no for disaedem samting for olketa. Taem iu storyim olketa Bible principle, helpem student for ting raonem olketa. Maet iu storyim samting wea happen long evriday living and askem student hao nao Bible principle wea iutufala bin studyim bae helpem hem sapos datwan kasem hem.—Heb. 5:14.

Long tok bilong hem long Pentecost 33 C.E., aposol Peter provaedem example bilong gudfala wei for followim samting wea affectim laef bilong pipol. (Acts 2:14-36) Bihaen hem storyim thrifala sekson bilong scripture wea olketa wea hipap sei olketa bilivim, Peter storyim mining bilong olketa scripture hia followim olketa samting wea evriwan lukim finis. From diswan, olketa feelim need for duim samting followim wanem olketa herem. Waswe, teaching bilong iu affectim pipol long sem wei? Waswe, iu helpem pipol minim why nao samting hem olsem winim wei for just talem tru samting nomoa? Waswe, iu encouragem olketa for tingim hao olketa samting olketa lanem shud affectim laef bilong olketa? Maet olketa no singaot, “Wanem nao mifala shud duim?” olsem pipol duim long Pentecost, bat sapos iu showim gud hao for followim olketa scripture, diswan bae muvim olketa for tingim wanem nao hem fitim for olketa duim.—Acts 2:37.

Taem iu readim Bible witim olketa pikinini bilong iu, iufala olketa mami and dadi garem gudfala chance for trainim olketa for evritaem tingim hao for followim olketa Bible principle. (Eph. 6:4) Olsem example, maet iu chusim tu-thri verse from Bible reading wea olketa markem for datfala week, storyim mining bilong olketa, and then askem olketa kwestin olsem: ‘Hao nao diswan provaedem instruction for iumi? Hao nao maet iumi iusim olketa verse hia long ministry? Wanem nao olketa showim abaotem Jehovah and wei bilong hem for duim samting, and hao nao diswan buildimap wei wea iumi tinghae long hem?’ Encouragem famili for givim koment abaotem olketa point hia taem part bilong Bible main point kamap long Theocratic Ministry Skul. Olketa verse wea olketa givim koment long hem nao bae olketa rememberim.

Showim Gudfala Example

Iu teach no from samting iu talem nomoa, bat from wanem iu duim tu. Samting wea iu duim hem provaedem gudfala example long hao for duim olketa samting wea iu talem. Hem nao wei wea olketa pikinini lane. Taem olketa copyim mami and dadi bilong olketa, olketa showimaot hao olketa want for olsem mami and dadi bilong olketa. Olketa laek for savve hao nao hem feel for duim samting wea mami and dadi duim. Long sem wei, taem olketa wea iu teachim ‘kamap olketa wea followim example bilong iu olsem iu followim example bilong Christ,’ olketa start for experiencem olketa blessing wea kam taem iumi followim olketa wei bilong Jehovah. (1 Cor. 11:1) Wei wea God deal witim olketa hem kamap part long olketa experience bilong olketa seleva.

Diswan hem barava remindim iumi hao wei for givim stretfala example hem important. “Wanem kaen man [nao iumi] long holy fasin and waka wea showimaot fasin for lovem God” bae barava help for givim olketa wea iumi teachim wanfala really example bilong hao for followim olketa Bible principle. (2 Pet. 3:11) Sapos iu encouragem wanfala Bible student for readim Word bilong God evritaem, iu mas readim evritaem tu. Sapos iu laekem olketa pikinini bilong iu for followim olketa Bible principle, mek sure olketa lukim hao olketa samting wea iu duim hem wan mind witim will bilong God. Sapos iu givim instruction long kongregeson for strong long ministry waka, mek sure iu garem full share long datfala waka. Taem iu duim samting wea iu teachim, iu fit for muvim olketa narawan.—Rom. 2:21-23.

Witim goal for mekem teaching bilong iu kamap moabeta, askem iuseleva: ‘Taem mi givim instruction, waswe, mi givim long wei wea bae changem wei for tingting, toktok, or samting wea olketa wea herem duim? For mekem samting hem klia, waswe, mi showim wei wea wanfala idea or wei for duim samting hem difren from narawan? Wanem nao mi duim for helpem olketa student, pikinini, or audience for rememberim wanem mi talem? Waswe, mi showim klia long olketa wea lisin hao for followim wanem olketa lanem? Waswe, olketa savve lukim datwan long example bilong mi? Waswe, olketa minim hao wei wea olketa followim samting wea mi storyim savve affectim wei wea olketa fren witim Jehovah?’ (Prov. 9:10) Go ahed for lukluk gud long olketa samting hia taem iu trae for mekem grow savve bilong iu olsem wanfala teacher. “Lukluk gud evritaem long iuseleva and teaching bilong iu. Followim olketa samting hia, sapos iu duim olsem iu bae sevem iuseleva and olketa wea lisin long iu.”—1 Tim. 4:16.