Staka pipol tinghae long Bible, bat maet olketa no savve wanem nao hem storyim. Staka pipol wea stap long Asia no savve eni samting abaotem Bible. Nomata long olketa kantri wea pipol garem Bible, staka no savve tu long wanem Bible storyim.

Maet iu laek for savve, ‘Why nao hem gud for mi minim Bible?’ Taem iu minim wanem Bible storyim hem savve helpem iu for:

• Hapi and satisfae

• Deal witim olketa problem wea kamap long famili

• Deal witim olketa hard taem wea iu kasem

• Stap gud witim olketa narawan

• Iusim selen long wisefala wei

Tingim example bilong Yoshiko, wea stap long Japan. Hem laek for savve wanem nao Bible storyim, so hem disaed for readim. Wanem gud samting nao hem kasem from datwan? Hem sei: “Bible hem helpem mi for hapi and satisfae long laef and for garem hope for future.” Amit wea iumi storyim finis hem disaed for studyim Bible. Hem sei: “Mi barava sapraes. Bible hem storyim staka samting wea savve helpem evriwan.”

Bible hem helpem staka million pipol. Hem gud for iu studyim Bible and lukim hao hem savve helpem iu.

Bible hem wanfala buk wea hem stap for longfala taem finis. Wanem taem nao olketa start for raetem Bible? Olketa start for raetem Bible samting olsem 3,500 year go finis long Middle East. Long datfala taem tu Shang famili hem rulim China, and hem samting olsem 1,000 year bifor Buddhism hem start long India.—Lukim box “Samting for Savve Abaotem Bible.”

Sapos man wea raetem buk hem laekem datfala buk for helpem pipol, hem mas mek sure pipol minim wanem hem raetem. Bible hem buk wea pipol savve minim. Hem garem ansa for olketa kwestin wea pipol garem.

Olsem example, staka pipol laek for savve, ‘Why nao God wakem iumi?’ For longfala taem finis pipol laek for savve long ansa bilong datfala kwestin. Ansa for datfala kwestin hem stap long chapter 1 and 2 long first buk long Bible, Genesis. Tufala chapter hia storyim taem wea God wakem disfala universe, olsem olketa galaxy, olketa star, and disfala earth. (Genesis 1:1) Long there, hem storyim hao God redyim disfala earth for olketa man, and gogo hem wakem olketa animal, bird, and fish, then hem wakem Adam and Eve. Tufala chapter hia storyim tu plan bilong God for olketa samting wea hem wakem.

IUMI SAVVE MINIM BIBLE

Bible hem garem olketa advaes wea savve helpem iumi for deal witim olketa problem. Datfala advaes hem isi for minim. Bae iumi storyim tufala samting wea showimaot datwan.

First samting, message wea stap long Bible hem klia, simpol, and hem savve encouragem man. Bible hem no iusim olketa toktok wea hard for pipol minim, bat hem storyim olketa samting wea pipol savve gud long hem for helpem pipol minim datfala message.

Olsem example, Jesus storyim samting wea pipol lukim and duim evriday for helpem olketa minim wanem hem teachim long olketa. Iu savve read abaotem staka tokpiksa bilong Jesus long datfala Sermon long Maunten wea stap long Matthew chapter 5 go kasem 7. Wanfala man for raet hem sei datfala Sermon long Maunten hem “wanfala tok wea hem helpem pipol and hem no for mekem pipol konfius witim staka difren idea.” Iu savve readim olketa chapter hia maet insaed 15 or 20 minute nomoa, and bae iu lukim olketa toktok wea Jesus talem hem simpol bat hem savve barava helpem man.

Nara samting wea mekem hem isi for minim Bible hem olketa story wea stap insaed. Hem no buk wea storyim olketa kastom story. Bat olsem The World Book Encyclopedia talem, Bible hem storyim “olketa bigman and olketa man nating,” and tu, hem storyim “hard taem wea olketa kasem, goal bilong olketa, wik point bilong olketa, and gud samting wea olketa duim.” So hem isi for iumi minim olketa story hia bikos hem abaotem pipol wea laef bifor and olketa samting wea really happen. And tu, iumi savve lanem staka samting from olketa story hia.—Rome 15:4.

EVRIWAN SAVVE KASEM BIBLE

For iu minim samting wea wanfala buk storyim, datfala buk mas stap long languis wea iu savve long hem. Distaem klosap evriwan savve readim Bible long languis wea olketa savve minim, nomata wanem kantri nao olketa kam from and wea nao olketa stap. Tingim wanem samfala duim wea mekem iumi savve kasem Bible long staka difren languis.

Transleitim Bible. Firstaem olketa raetem Bible long Hebrew, Aramaic, and Greek languis. From datwan, no evriwan savve readim Bible. So olketa transleita barava waka hard mekem Bible hem stap long olketa nara languis. Distaem olketa transleitim full Bible or samfala part bilong hem long samting olsem 2,700 languis. Diswan minim winim 90 percent long olketa pipol long world savve readim samfala part long Bible long languis bilong olketa.

Pablisim Bible. Olketa man wea raetem olketa firstfala copy bilong olketa Bible, olketa raetem long leather and papyrus wea no savve stap longtaem. For mekem olketa narawan kasem message long Bible, pipol mas raetem staka copy. Olketa copy hia barava expensive, and samfala pipol nomoa fit for peim. Bat winim 550 year go finis, Johannes Gutenberg wakem wanfala printing machine wea mekem hem isi for wakem staka copy bilong Bible. Wanfala report hem sei, olketa givimaot winim faev billion copy long full Bible or samfala part bilong hem.

Bible hem winim evri nara buk bilong olketa religion. Hem buk wea iu savve minim, bat iu bae needim help for minim. Wea nao iu savve kasem help? And hao nao Bible savve helpem iu? Nextfala article bae storyim datwan.

Tingim sapos hem firstaem bilong iu for go long wanfala difren kantri. Iu meetim pipol wea garem difren kastom, kaikai bilong olketa hem difren, and olketa garem difren selen tu. Maet olketa samting olsem mekem iu konfius.

Maet firstaem wea iu readim Bible, iu feel olsem tu bikos iu read abaotem olketa samting wea iu no savve. Olsem example, iu read abaotem pipol long Philistine wea kastom bilong olketa hem barava difren olsem wei for ‘brekem kaleko,’ or iu read abaotem kaikai wea olketa kolem manna, and wanfala coin wea olketa kolem long drachma. (Exodus 16:31; Joshua 13:2; 2 Samuel 3:31; Luke 15:9) Maet iu no minim olketa samting hia. Olsem taem wea iu go long wanfala difren kantri, iu bae barava hapi taem samwan explainim olketa samting long iu.

HELP WEA OLKETA LONG BIFOR KASEM

Start long mek-16 century B.C.E., long taem wea olketa start for raetem olketa Holy Raeting, pipol kasem help for minim olketa raeting hia. Olsem example, Moses wea hem firstfala leader bilong nation bilong Israel, hem “explainim” Law long olketa Israelite.—Deuteronomy 1:5.

Nomata samting olsem wan thousand year bihaen, samfala man wea teachim olketa Holy Raeting stap. Long 455 B.C.E., bigfala sekson bilong olketa Jew, wea insaed diswan hem olketa pikinini tu, olketa hipap long wanfala pablik ples long Jerusalem. Long there nao olketa man hia readim big datfala sem buk bilong Law long olketa. Olketa no readim nomoa, bat “olketa gohed for helpem pipol for minim wanem olketa readim.”—Nehemiah 8:1-8.

Faev handred year bihaen datwan, Jesus Christ tu teachim pipol. Dastawe pipol kolem hem teacher. (John 13:13) Hem teachim staka pipol and man wanwan tu. Wanfala taem Jesus givim tok long wanfala big sekson, wea hem nao datfala Sermon long Maunten. Olketa “pipol wea lisin kam olketa barava sapraes nao long hao hem teach.” (Matthew 5:1, 2; 7:28) Long 33 C.E., Jesus hem ‘minim olketa Holy Raeting’ long tufala disaepol bilong hem taem tufala gogo for wanfala vilij klosap long Jerusalem.—Luke 24:13-15, 27, 32.

Olketa disaepol bilong Jesus tu teachim toktok bilong God long pipol. Wantaem wanfala bigman bilong Ethiopia readim wanfala profesi long olketa Holy Raeting. Wanfala disaepol wea nem bilong hem Philip askem hem: “Hao, iu minim samting wea iu readim?” Datfala bigman hem sei: “Hao nao bae mi savve sapos no eniwan minim kam long mi?” Then Philip explainim datfala profesi long hem.—Acts 8:27-35.

HELP WEA IUMI KASEM DISTAEM

Olketa Jehovah’s Witness distaem tu teachim Bible long pipol olsem olketa man bifor. Olketa duim datwan long 239 kantri. (Matthew 28:19, 20) Evri week olketa helpem winim naen million pipol for minim Bible. Staka long olketa hia no Christian. Disfala arrangement for studyim Bible hem free nomoa and iu savve study long haos bilong iu or long nara ples wea fitim iu. Samfala maet iusim tu computer or mobile phone taem olketa studyim Bible witim Olketa Jehovah’s Witness.

Iu savve story witim eni Jehovah’s Witness sapos iu laek for study. Iu bae luksavve Bible hem wanfala buk wea iu savve minim. Hem “savve teachim pipol, showim iumi samting wea no stret, stretem evri samting, and stretem tu tingting bilong pipol followim olketa raeteous mark bilong God” mekem iumi “barava fit and redi for duim evri gudfala waka.”—2 Timothy 3:16, 17.