TAEM iu story witim pipol abaotem olketa purpose bilong God, nomata witim man wanwan or from platform, Word bilong God nao shud main samting long story bilong iu. Insaed diswan hem wei for readim olketa scripture from Bible, wea iu shud duim gud.

Stretfala Wei for Strongim Word Needim Feeling. Mas readim olketa scripture witim feeling. Tingim samfala example. Taem iu readim big Psalm 37:11, voice bilong iu shud showimaot hapi from iu luk forward long peace wea datfala verse promisim. Taem iu readim hao wei wea safa and dae bae finis long Revelation 21:4, voice bilong iu shud showimaot feeling for tinghae long datfala nambawan profesi. Iu shud readim Revelation 18:2, 4, 5, wea garem strongfala toktok for muvim pipol for go aot from “Bigfala Babylon,” witim feeling for hariap. Feeling wea iumi showimaot mas kam from heart bat no ova tumas. Scripture wea iumi readim and reason why iumi readim bae helpem iumi disaed haomas feeling iumi shud showimaot.

Strongim Olketa Stretfala Word. Sapos olketa koment bilong iu storyim wanfala part long wanfala verse, iu shud mekhae long datfala part taem iu readim scripture. Olsem example, taem iu readim Matthew 6:33, bae iu no strongim “raeteous fasin bilong hem” or “olketa narafala samting hia” sapos goal bilong iu hem for lukluk gud long wanem nao hem minim for “lukaotem firstaem kingdom.”

Long wanfala tok long Service Meeting, maet iu plan for readim Matthew 28:19. Olketa wanem word nao iu shud strongim? Sapos iu want for encouragem audience for waka hard for startim olketa hom Bible study, strongim “mek-disaepol.” Long narasaed, sapos iu plan for storyim responsibility bilong olketa Christian for sharem Bible truth long pipol from nara kantri or iu want for encouragem samfala pablisa for serve long ples wea garem bigfala need, maet iu strongim “pipol bilong evri nation.”

Planti taem, iumi iusim wanfala scripture for ansarem kwestin or for pruvim wanfala samting wea nara pipol maet no agree long hem. Sapos iu strongim evri point long datfala scripture, audience bilong iu bae no luksavve hao diswan join witim ansa. Maet hem klia long iu bat no long olketa.

Olsem example, taem iu readim Psalm 83:18 from wanfala Bible wea garem nem bilong God, sapos iu strongim datfala toktok “Most Hae,” haosholder maet fail for luksavve long wei wea God garem nem bilong hemseleva. Iu shud strongim datfala nem “Jehovah.” Bat, taem iu iusim datfala sem scripture for storyim olmaeti rul bilong Jehovah, main toktok wea iu shud strongim hem nao “Most Hae.” Long sem wei, taem iu iusim James 2:24 for showimaot why nao faith mas join witim wei for duim samting, sapos iu strongim “kolem wanfala man raeteous” and no “olketa waka,” datwan maet mekem samfala wea lisin long iu for missim point.

Narafala example wea savve helpem iumi hem long Romans 15:7-13. Diswan hem part long wanfala leta wea aposol Paul raetem long wanfala kongregeson wea garem olketa Gentile and olketa Jew. Datfala aposol storyim wei wea ministry bilong Christ givim gud samting no long olketa Jew wea circumcise nomoa, bat tu long pipol bilong olketa nation mekem “olketa nation maet givim glory long God for mercy bilong hem.” Then Paul talem toktok bilong fofala scripture, for showimaot klia datfala chance for olketa nation. Long wanem wei nao iu shud readim olketa toktok hia for strongim point wea Paul tingim? Sapos iu putim mark long toktok wea iu laek for strongim, maet iu putim mark long “olketa nation” long verse 9, “iufala olketa nation” long verse 10, “iufala evri nation” and “evri pipol” long verse 11, and “olketa nation” long verse 12. Trae for readim Romans 15:7-13 and strongim olketa toktok hia. Taem iu duim, main point bilong Paul bae kamap moa klia and moa isi for minim.

Olketa Wei for Strongim. Samfala difren wei stap for strongim olketa main word. Wei wea iu duim shud fitim datfala scripture and setting long tok bilong iu. Samfala idea stap long hia.

Strongim voice. Insaed diswan hem eni wei for changem voice wea mekem toktok wea talem main point for showaot klia from olketa nara part long datfala sentence. Iu savve duim diswan long wei for changem laod bilong voice—long wei for moa laod or moa kwaet. Long planti languis, wei for changem voice savve strongim toktok. Bat, long samfala languis, for duim olsem maet changem mining bilong datwan evribit. Taem iu talem olketa main toktok moa slow, hem savve strongim datfala toktok. Long olketa languis wea iu kanduit strongim voice for strongim samfala word, iu bae need for duim samting followim wei bilong datfala languis.

Stop lelebet. Iu savve duim diswan bifor or bihaen iu readim datfala main part bilong wanfala scripture—or tufala evriwan. Taem iu stop lelebet bifor iu readim wanfala main point hem mekem audience luk forward long hem; wei for stop lelebet bihaen hem strongim moa datfala point. Bat, sapos iu ova tumas for duim diswan, evri point bae here semsem nomoa.

Talem moa. Iu savve strongim wanfala point long wei for stop and readim moa datfala word or toktok. Wanfala wei wea maet moabeta hem for readim datfala full scripture and then talem moa datfala main toktok.

Olketa akson. Wei for muvim body and feis tu savve addim feeling long wanfala word or toktok.

Saond bilong voice. Long samfala languis, man savve readim olketa word witim saond wea affectim mining bilong olketa and mekem hem difren from olketa nara word. Long languis olsem, man mas iusim gudfala tingting, especially taem hem talem fani samting.

Taem Narafala Man Readim Scripture. Taem wanfala haosholder readim scripture, hem maet no strongim eni word or maet strongim olketa rong word. Sapos olsem, wanem nao iu savve duim? Planti taem hem moabeta for mekem mining hem klia long wei for storyim hao for followim. Bihaen iu duim datwan finis, iu maet barava mekhae long olketa word long Bible wea talem datfala point.

TAEM iumi teachim narawan, iumi mas duim moa samting winim wei for readim olketa verse from Bible nomoa. Aposol Paul hem raet go long fren bilong hem Timothy: “Duim best bilong iu for mekem God acceptim iu, wanfala wakman wea no shame long eni samting, wea iusim word bilong truth long stretfala wei.”—2 Tim. 2:15.

For duim diswan minim wei wea iumi explainim olketa scripture mas semsem witim wanem Bible hem teachim. Diswan minim iumi mas tingim olketa verse wea stap raonem, winim wei for chusim samfala toktok wea iumi laekem and addim go tingting bilong iumiseleva. Thru long profet Jeremiah, Jehovah givim warning abaotem olketa profet wea sei olketa tokaot from mouth bilong Jehovah bat wea really talemaot “vision bilong heart bilong olketa seleva.” (Jer. 23:16) Aposol Paul warnim olketa Christian for no spoelem Word bilong God witim tingting bilong olketa man taem hem raet: “Iumi rejectim finis olketa samting wea no honest wea mekem iumi shame, no followim giaman wei, and no spoelem word bilong God tu.” Long datfala taem olketa bisnisman wea no honest mixim wata insaed long wine for mekem hem staka and for kasem moa selen. Iumi no spoelem word bilong God long wei for mixim witim tingting bilong olketa man. Paul talem hao, “iumi no man for sellim word bilong God olsem planti man duim, bat from trufala feeling, yes, olsem God nao sendem iumi, front long eye bilong God, tugeta witim Christ, iumi go ahed for tokaot.”—2 Cor. 2:17; 4:2.

Samfala taem, maet iu talem toktok bilong wanfala scripture for mekhae long wanfala principle. Bible hem fulap long olketa principle wea givim iumi gudfala kaonsel for deal witim planti difren samting wea savve kamap. (2 Tim. 3:16, 17) Bat iu shud mek sure iu storyim mining bilong datwan long stretfala wei and no iusim long rong wei, mekem hem luk olsem hem talem samting wea iu wantem hem for talem. (Ps. 91:11, 12; Matt. 4:5, 6) Wei wea iu iusim mas join gud tugeta witim purpose bilong Jehovah, semsem witim full Word bilong God.

For “iusim word bilong truth long stretfala wei” hem minim tu iumi mas kasem trufala mining bilong samting wea Bible talem. Hem no wanfala “stik” for whipim narawan witim. Olketa teacher bilong religion wea againstim Jesus Christ talem toktok from Bible, bat olketa no laek for tingim olketa samting wea moa important—olketa samting saed long justice and mercy and faithful fasin—wea God askem. (Matt. 22:23, 24; 23:23, 24) Taem hem teachim Word bilong God, Jesus showimaot fasin bilong Dadi bilong hem. Wei wea Jesus hem strong for truth hem join witim deep love bilong hem for pipol wea hem teachim. Iumi shud trae followim example bilong hem.—Matt. 11:28.

Hao nao iumi savve sure iumi iusim wanfala scripture long stretfala wei? For readim Bible evritaem savve help. Iumi need for tinghae tu long “faithful and wise slave,” datfala sekson bilong olketa Christian wea spirit anointim, wea Jehovah iusim for provaedem spiritual kaikai for famili bilong faith. (Matt. 24:45) Wei for study seleva and evritaem attendim and tekpart long olketa meeting long kongregeson bae helpem iumi for kasem gud samting from instruction wea faithful and wise slave provaedem.

Sapos datfala buk Reasoning From the Scriptures hem long languis bilong iu and iu lane for iusim gud, iu bae garem instruction wea iu needim long hao for iusim long stretfala wei planti handred scripture wea evritaem kamap long ministry bilong iumi. Sapos iu plan for iusim wanfala scripture wea iu no savve long hem, hambol fasin bae muvim iu for duim research, mekem taem iu toktok, iu iusim word bilong truth long stretfala wei.—Prov. 11:2.

Mekem Mining Showaot Klia. Taem iu teachim nara pipol, mek sure olketa minim klia hao subject wea iu storyim and olketa scripture wea iu iusim join tugeta. Sapos iu askem wanfala kwestin and then readim wanfala scripture, olketa wea lisin mas fit for luksavve wei wea datfala scripture ansarem datfala kwestin. Sapos iu iusim datfala scripture olsem pruv for wanfala toktok, mek sure student hem lukim klia wei wea scripture pruvim datfala point.

Planti taem wei for readim scripture—nomata witim strong—hem no inaf. Remember, staka pipol no savve long Bible and maet no kasem point sapos iu readim wantaem nomoa. Mekhae long part bilong text wea barava fitim story bilong iu.

Diswan minim iu mas chusim samfala main word, olketa wea barava join witim datfala point wea iu storyim. Isi wei nao hem for talem moa olketa word hia. Sapos iu story witim man wanwan, maet iu askem samfala kwestin wea savve helpem hem for luksavve long olketa main word. For kasem goal bilong olketa taem olketa story witim wanfala grup, samfala speaker laek for iusim samfala word wea garem sem mining or for talem moa datfala point. Bat, sapos iu disaed for duim diswan, mek sure hem klia long audience hao toktok bilong datfala scripture hem join witim story bilong iu.

From iu chusim finis olketa main word, iu putim gudfala faondeson. Then duim moa samting. Waswe, reason why iu iusim datfala scripture hem showaot klia taem iu introducem? Sapos olsem, showim hao olketa word wea iu mekhae long hem join witim reason wea iu talem firstaem. Talem klia hao olketa join tugeta. Nomata sapos iu no introducem scripture long wei olsem, iu mas showim why nao iu iusim.

Olketa Pharisee askem Jesus wanfala kwestin wea olketa tingse hem hard for ansarem, hem nao: “Waswe, hem fitim law for wanfala man divorcem waef bilong hem from eni samting nomoa?” Jesus iusim Genesis 2:24 for ansarem olketa. Lukim wei wea hem mekhae long wanfala part nomoa long datfala verse, and hao datwan fitim ansa for kwestin bilong olketa. Bihaen hem talem hao datfala man and waef bilong hem kamap “wanfala body,” Jesus hem sei: “Dastawe, samting wea God joinim tugeta no eni man mas divaedem.”—Matt. 19:3-6.

Haomas samting nao iu shud talem for mekem mining bilong wanfala scripture klia? Datwan bae depend long hu nao insaed audience bilong iu and hao important nao datfala point wea iu storyim. Goal bilong iu hem for iu mas simpol and klia.

Story Gud From Olketa Scripture. Abaotem ministry bilong aposol Paul long Thessalonica, Acts 17:2, 3 talem iumi hao hem ‘story gud from olketa Scripture.’ Evri servant bilong Jehovah shud trae for mekem grow savve for duim olsem. Olsem example, Paul storyim samfala samting saed long laef and ministry bilong Jesus, showimaot hao olketa profesi long Hebrew Scripture talemaot diswan and then, long end, hem strong for sei: “Diswan nao hem Christ, disfala Jesus wea mi talemaot long iufala.”

Taem hem raet long olketa Hebrew, Paul planti taem talem toktok bilong olketa Hebrew Scripture. For strongim or kliarem wanfala point, hem planti taem mekhae long wanfala word or shortfala toktok and then showimaot why nao datwan hem important. (Heb. 12:26, 27) Long story long mek-thri chapter bilong Hebrews, Paul talem toktok from Psalm 95:7-11. Lukim hao bihaen datwan, hem mekhae long thrifala part bilong hem: (1) wei wea hem storyim heart (Heb. 3:8-12), (2) reason why datfala toktok “Tuday” hem important (Heb. 3:7, 13-15; 4:6-11), and (3) mining bilong datfala toktok: “Olketa bae no go insaed long rest bilong mi” (Heb. 3:11, 18, 19; 4:1-11). Trae for followim datfala example taem iu iusim each scripture.

Lukim gudfala wei wea Jesus story from olketa Scripture long Luke 10:25-37. Wanfala man wea savve tumas long Law hem ask: “Teacher, wanem nao mi mas duim for kasem laef olowe?” Long ansa bilong Jesus hem firstaem askem datfala man for talem tingting bilong hemseleva abaotem datwan, and then Jesus mekhae long wei wea hem important for duim wanem Word bilong God hem talem. Taem hem showaot klia hao datfala man hem missim point, Jesus story raonem wanfala word nomoa from datfala scripture—“neiba.” Winim wei for talem mining bilong datwan nomoa, hem iusim wanfala tokpiksa for helpem datfala man for kasem stretfala ansa seleva.

Hem klia hao taem Jesus ansarem olketa kwestin, hem no talem nomoa toktok from olketa scripture wea givim ansa stret. Hem ting raonem wanem nao olketa scripture talem and then hem iusim for ansarem olketa kwestin wea kamap.

Taem olketa Sadducee challengem resurrection hope, Jesus mekhae long wanfala part bilong Exodus 3:6. Bat hem no talem toktok bilong datfala scripture and finis nao. Hem story gud abaotem datwan for showaot klia hao resurrection hem part long purpose bilong God.—Mark 12:24-27.

For lane for barava savve for story long gudfala and stretfala wei from olketa Scripture hem important tumas for helpem iu kamap wanfala gudfala teacher.

NOMATA sapos iu story long man wanwan or long wanfala grup, hem no wise for tingse olketa wea lisin long iu bae interest long datfala subject bikos iu interest long datwan. Message bilong iu hem important, bat sapos iu no showimaot klia hao hem bae helpem olketa wea lisin, olketa bae interest for shortfala taem nomoa.

Diswan hem tru nomata witim audience long Kingdom Hall. Olketa maet lisin taem iu storyim wanfala tokpiksa or experience wea olketa no herem yet. Bat olketa maet no lisin taem iu storyim subject wea olketa savve long hem finis, especially sapos iu no givim moa information abaotem olketa samting hia. Iu need for helpem olketa for minim why and long wanem wei nao samting wea iu talem hem savve barava helpem olketa.

Bible encouragem iumi for tingim wei wea samting savve helpem iumi. (Prov. 3:21) Jehovah iusim John datfala Baptaesa for leadim pipol long “wisdom wea fitim laef bilong olketa raeteous wan.” (Luke 1:17) Disfala wisdom garem faondeson long gudfala wei for fraet long Jehovah. (Ps. 111:10) Olketa wea tinghae long disfala wisdom kasem help for win long laef distaem and for kasem datfala really laef, laef olowe long future.—1 Tim. 4:8; 6:19.

Mekem Tok wea Savve Helpem Pipol. For mekem tok bilong iu helpem pipol, iu mas tingting gud no long information nomoa, bat long audience bilong iu tu. No tingim audience olsem wanfala grup nomoa. Insaed long datfala grup hem olketa famili and man wanwan. Samfala maet barava young, olketa teenager, full grown, and samfala olo. Maet samfala niu wan wea interest stap and tu olketa wea start for servem Jehovah bifor iu born kam. Samfala maet mature long spiritual wei; tingting and wei bilong world maet still barava affectim samfala narawan. Askem iuseleva: ‘Long wanem wei nao maet disfala information wea mi bae storyim helpem olketa long audience? Hao nao mi savve helpem olketa for minim gud?’ Maet iu disaed for story long wan or tufala long olketa grup hia. Nomata olsem, no forgetim olketa narawan.

Waswe sapos iu kasem assignment for storyim wanfala main Bible teaching? Hao nao iu savve mekem tok olsem samting wea helpem audience wea bilivim finis datfala teaching? Trae for strongim biliv bilong olketa long datwan. Hao nao olsem? Long wei for storyim gud olketa pruv from Bible wea saportim datwan. Iu savve mekem wei wea olketa tinghae long datfala Bible teaching hem moa deep tu. Iu savve duim diswan long wei for showimaot hao datfala teaching hem wan mind witim olketa narafala truth bilong Bible and witim fasin bilong Jehovah seleva. Storyim olketa example—really laef experience—bilong pipol wea kasem gud samting from olketa minim datfala subject and wei wea hem affectim tingting bilong man abaotem future.

No storyim wei wea diswan helpem pipol long tu-thri shortfala sentence long end bilong tok bilong iu nomoa. From barava start, evriwan long audience shud garem tingting, “diswan affectim mi.” Taem iu start long wei olsem, go ahed for showimaot hao diswan savve helpem olketa taem iu storyim olketa main point insaed full tok and long end bilong hem tu.

Taem iu storyim hao for followim datfala information, mek sure iu duim diswan long wei wea wan mind witim olketa Bible principle. Wanem nao diswan minim? Hem minim for duim long loving wei wea tingim feeling bilong narawan. (1 Pet. 3:8; 1 John 4:8) Nomata taem hem deal witim olketa hard problem long Thessalonica, aposol Paul mek sure hem storyim olketa gud saed bilong wei wea olketa Christian brata and sista long there muv ahed. Hem talemaot tu hao hem feel sure hao, saed long samting wea hem storyim long datfala taem, olketa bae want for duim wanem hem stret. (1 Thess. 4:1-12) Datwan hem barava gudfala example for followim!

Waswe, tok bilong iu hem for muvim audience for share insaed waka for preachim and teachim gud nius long olketa narawan? Buildimap strong and wei for tinghae long datfala privilege. Bat, taem iu duim olsem, no forget hao evri man hem difren saed long haomas hem savve duim insaed disfala waka, and Bible storyim diswan. (Matt. 13:23) No putim hevi long olketa brata long wei for mekem olketa feel guilty. Hebrews 10:24 encouragem iumi for “muvim narawan for showimaot love and gudfala waka.” Sapos iumi muvim narawan for showimaot love, gud samting nao bae muvim olketa for duim gudfala waka. Winim wei for trae forcem olketa for duim samting, luksavve hao samting wea Jehovah wantem, hem for iumi encouragem “wei for obey thru long faith.” (Rom. 16:26) So goal bilong iumi hem for strongim faith—bilong iumi and olketa brata bilong iumi.

Helpem Olketa Narawan for Kasem Point. Taem iu witness long narafala pipol, mek sure iu showimaot klia wei wea datfala gud nius savve helpem man. For duim olsem iu need for ting raonem wanem samting nao pipol long territory bilong iu ting abaotem. Hao nao iu savve faendaot? Lisin long nius long radio or television. Lukim front page bilong niuspepa. And tu, trae for pullim pipol for story witim iu, and lisin long samting olketa talem. Maet iu faendaot hao olketa stragol witim samfala hardfala problem—wei for lusim waka, stragol for peim rent, sik, famili member hem dae, danger from criminal fasin, wei for no kasem justice from samwan wea garem paoa, marit brekdaon, kanduit kontrolem olketa young pikinini, and samfala moa. Waswe, Bible savve helpem olketa? Barava nao.

Maet iu chusim finis wanfala subject bifor iu start for story witim samwan. Bat, sapos hem klia hao difren samting nao important tumas long hem, no hol bak for storyim datwan sapos iu fit, or talem hem iu bae tekem kam samfala information for helpem hem. Hem tru, iumi no ‘poke-nose long samting wea hem no bisnis bilong iumi,’ bat iumi hapi for sharem kaonsel from Bible wea savve helpem narafala pipol. (2 Thess. 3:11) Hem klia, samting wea bae barava muvim pipol hem kaonsel from Bible wea affectim laef bilong olketa wanwan.

Sapos pipol no lukim hao message bilong iumi affectim olketa wanwan, olketa maet kwiktaem finis for story witim iumi. Nomata sapos olketa letem iumi story, wei wea iumi fail for showimaot klia hao datfala subject savve helpem olketa, savve minim message bilong iumi bae no affectim laef bilong olketa. Long narasaed, sapos iumi showimaot klia hao datfala message savve helpem man, story bilong iumi maet start bilong bigfala change long laef bilong olketa.

Taem iu conductim olketa Bible study, evritaem mekhae long wei wea datfala information savve helpem olketa. (Prov. 4:7) Helpem olketa student for minim olketa principle, example, and kaonsel from Bible wea showim olketa hao for wakabaot long wei bilong Jehovah. Strongim olketa gud samting wea kamaot from wei for duim olsem. (Isa. 48:17, 18) Diswan bae muvim olketa student for mekem olketa change long laef wea olketa need for duim. Buildimap long olketa love for Jehovah and feeling for want for mekem hem hapi, and letem samting wea muvim olketa for followim kaonsel from Word bilong God hem kam from heart bilong olketa.