Hao Datfala Carpenter Ant Klinim Antenna blo Hem

Hem important tumas for wanfala insect klin sapos hem laek flae, klaem, and savve wanem hem stap raonem hem. Olsem example, sapos tufala antenna blo ant hem no klin, hem bae no savve gud wea for go, story, and smelem olketa samting. Dastawe datfala zoologist Alexander Hackmann sei: “Bae iu nating savve faendem wanfala insect wea dirty. . . . Olketa savve hao for klinim olketa seleva from dirty samting wea pas lo body blo olketa.”

Samting for tingim: Alexander Hackmann and olketa wea waka witim hem studyim wanem datfala carpenter ant (Camponotus rufifemur) iusim for klinim tufala antenna blo hem. Olketa lukim datfala ant savve aotem olketa big and smol samting wea pas lo antenna lo wei for bendim leg blo hem olsem wanfala clamp raonem antenna and pullim antenna hia thru lo datfala clamp. Clamp hia hem garem thrifala kaen kom lo hem, first kom hem big and hem aotem olketa big samting from antenna. Then next kom wea hem smol, hem savve pikimap eni samting wea stap midolwan lo olketa hair lo antenna bikos each pis lo kom hem waed olsem olketa hair wea stap lo antenna. Then mek-thri kom hem barava smol and hem savve aotem olketa barava sismol samting.

Lukim hao wanfala carpenter ant klinim tufala antenna blo hem

Alexander Hackmann and olketa wea waka witim hem sei pipol savve copyim wanem olketa ant duim for designim olketa machine for klinim samting. Olsem example, pipol savve iusim semkaen wei for klinim olketa machine wea wakem olketa sismol electronic samting, bikos sapos nomoa, eni smol samting savve pas lo olketa electronic samting hia and mekem olketa no waka nao.

Wanem nao tingting blo iu: Taem iu lukim wei wea datfala carpenter ant klinim tufala antenna blo hem, waswe, iu tingse datwan kamap seleva nomoa or samwan nao designim?