Wanfala Celebration wea Affectim Iu

TAEM hem long earth, Jesus Christ startim wanfala celebration wea honorim God. Diswan nomoa wanfala ceremony bilong religion wea hem komandim olketa wea followim hem for keepim. Hem nao datfala Evening Kaikai Bilong Lord, wea planti kolem Last Supper.

Ting long iuseleva olsem wanfala man wea stap and lukluk long olketa samting wea happen long datfala taem. Jesus and olketa aposol hipap tugeta long wanfala rum long Jerusalem for celebratem Passover bilong olketa Jew. Olketa finis for kaikaim datfala spesol Passover kaikai, wea olketa kaikaim young sheep, olketa saoa kabis, bred wea no garem yeast, and red wine. Datfala aposol Judas Iscariot wea no loyal hem go aot finis and hem klosap bae givim go Masta bilong hem. (Matthew 26:17-25; John 13:21, 26-30) Jesus stap seleva witim 11-fala faithful aposol bilong hem. Matthew nao wanfala long olketa.

Long story bilong Matthew, man wea lukim samting wea happen, hem sei Jesus startim datfala Evening Kaikai Bilong Lord olsem: “Jesus hem tekem wanfala bred [wea no garem yeast] and, bihaen hem talem blessing, hem brekem and, taem hem givim long olketa disaepol, hem sei: ‘Tekem, kaikaim. Diswan minim body bilong mi.’ And tu, hem tekem wanfala kap [wine] and, bihaen hem prea for sei thankiu, hem givim long olketa, and sei: ‘Drink from diswan, iufala evriwan; from diswan minim “blood bilong covenant” bilong mi, wea mi bae pourimaot for planti pipol kasem forgiveness for sin.’”—Matthew 26:26-28.

Why nao Jesus startim datfala Evening Kaikai Bilong Lord? Taem hem duim datwan, why nao hem iusim bred wea no garem yeast and red wine? Waswe, evri follower bilong Christ mas kaikaim olketa samting hia? Haomas taem nao olketa mas duim diswan? And waswe, diswan garem eni mining for iu?

Evening Kaikai Bilong Lord​—Hao Nao for Celebratem?

FOR explainim klia datfala celebration bilong Evening Kaikai Bilong Lord, Christian aposol Paul raet olsem: “Mi kasem from Lord samting wea mi givim long iufala, hem wei wea Lord Jesus tekem wanfala bred long naet wea olketa givim hem go and, bihaen hem prea for sei thankiu, hem brekem and sei: ‘Diswan minim body bilong mi wea mi givim for iufala. Go ahed for duim diswan for rememberim mi.’ Hem duim sem samting witim kap tu, bihaen hem kaikaim evening kaikai, hem sei: ‘Disfala kap minim niu covenant wea kamap from blood bilong mi. Go ahed for duim diswan, long evritaem wea iufala drinkim, for rememberim mi.’ From evritaem iufala kaikaim disfala bred and drinkim disfala kap, iufala go ahed for talemaot dae bilong Lord, go kasem taem hem kam.”—1 Corinthians 11:23-26.

Olsem Paul talem, Jesus startim datfala Evening Kaikai Bilong Lord “long naet wea [Judas Iscariot] givim [Jesus] go” long olketa bigman bilong Jew religion wea forcem olketa bilong Rome for killim dae Christ. Datfala kaikai kamap long Thursday evening, March 31, 33 C.E. Jesus dae long torture stake long Friday aftanun, April 1. From wanfala day bilong olketa Jew hem start from evening go kasem evening long next day, datfala Evening Kaikai Bilong Lord and dae bilong Jesus Christ happen long sem day nomoa—Nisan 14, 33 C.E.

Olketa wea kaikaim bred and drinkim wine mas “go ahed for duim diswan” for rememberim Jesus. Long nara transleison, Jesus sei: “Duim diswan olsem wanfala memorial for mi.” (1 Corinthians 11:24, The Jerusalem Bible) Nara nem bilong datfala Evening Kaikai Bilong Lord hem Memorial bilong dae bilong Christ.

Why Nao Iumi Celebratem Dae Bilong Jesus?

Iumi savve kasem ansa taem iumi minim why nao dae bilong Jesus hem important. Jesus dae olsem main wan for sapotim sovereign rul bilong Jehovah. From diswan hem pruvim hao Satan hem laea for sei olketa man servem God from selfish reason. (Job 2:1-5; Proverbs 27:11) From hem wanfala perfect man taem hem dae, Jesus “givim soul bilong hem olsem ransom for baem bak planti pipol.” (Matthew 20:28) Taem Adam sin againstim God, hem lusim perfect human laef and chance for laef olowe wea hem savve garem sapos hem obeyim God. Bat “God lovem world [olketa man] tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) Barava nao, “pei bilong sin hem dae, bat present wea God givim hem laef olowe thru long Christ Jesus Lord bilong iumi.”—Romans 6:23.

So dae bilong Jesus Christ hem join witim tufala wei for showimaot barava bigfala love—bigfala love wea Jehovah showim long olketa man taem hem givim Son bilong hem and love bilong Jesus wea muvim hem for sakrifaesim hemseleva taem hem willing for givim laef bilong hem for olketa man. Memorial bilong dae bilong Jesus mekhae long tufala wei hia for showimaot love. From iumi nao kasem disfala love, iumi shud showimaot iumi tinghae long diswan. Wanfala wei for duim diswan hem for attendim datfala celebration bilong Evening Kaikai Bilong Lord.

Mining Bilong Bred and Wine

Taem hem startim datfala Evening Kaikai Bilong Lord, Jesus iusim bred and kap red wine olsem tokpiksa. Jesus tekem bred, and “bihaen hem prea, hem brekem and sei: ‘Diswan [bred] minim body bilong mi wea mi givim for iufala.’ ” (1 Corinthians 11:24) Hem mas brekem datfala bred mekem hem savve sharem and olketa kaikaim bikos hem kaen bred wea lelebet strong wea olketa wakem from flaoa and wata bat no garem yeast. Long Bible, yeast piksarem sin. (Matthew 16:11, 12; 1 Corinthians 5:6, 7) Jesus no garem sin. So perfect body bilong hem barava fitim nao wanfala ransom sakrifaes for olketa man. (1 John 2:1, 2) Datfala bred wea no garem yeast wea olketa iusim hem barava fit for piksarem body bilong Christ wea no garem sin!

Jesus prea tu for datfala kap red wine wea no mix witim eni samting and sei: “Disfala kap minim niu covenant wea kamap from blood bilong mi.” (1 Corinthians 11:25) Red wine insaed datfala kap piksarem blood bilong Jesus. Olsem wei wea blood bilong olketa buluka and goat wea olketa sakrifaesim bifor hem mekem legal datfala Law covenant midolwan God and nation bilong Israel long 1513 B.C.E., blood wea Jesus pourimaot taem hem dae tu hem mekem legal datfala niu covenant.

Hu Nao Kaikaim and Drinkim?

For luksavve hu nao savve kaikaim bred and drinkim wine long Memorial, iumi need for minim wanem nao datfala niufala covenant and hu nao insaed. Bible sei: “ ‘Lukim! Taem bae kam,’ hem toktok bilong Jehovah, ‘and mi bae mekem wanfala niufala covenant witim haos bilong Israel and witim haos bilong Judah. . . Mi bae putim law bilong mi insaed long olketa, and insaed heart bilong olketa mi bae raetem. And mi bae kamap God bilong olketa, and olketa nao bae kamap pipol bilong mi. . . . Mi bae forgivim mistek bilong olketa, and sin bilong olketa mi bae no tingim moa.’ ”—Jeremiah 31:31-34.

Datfala niu covenant mekem kamap wanfala spesol wei for fren witim Jehovah God. Thru long disfala covenant, wanfala grup kamap pipol bilong hem and hem kamap God bilong olketa. Jehovah raetem law bilong hem insaed olketa, insaed heart bilong olketa, and nomata olketa wea no Jew and wea no circumcise olketa tu kam insaed datfala niu covenant witim God. (Romans 2:29) Man wea raetem Bible, Luke, hem raet abaotem purpose bilong God for “lukluk kam long olketa nation for chusim wanfala pipol for nem bilong hem.” (Acts 15:14) Wan Peter chapter 2 verse 10, sei hao olketa bifor ‘no wanfala pipol, bat distaem olketa kamap pipol bilong God.’ Bible kolem olketa “datfala Israel bilong God,” wea hem nao spiritual Israel. (Galatians 6:16; 2 Corinthians 1:21) So, datfala niufala covenant, hem wanfala covenant midolwan Jehovah God and spiritual Israel.

Long lastfala naet wea hem stap witim olketa disaepol, Jesus seleva mekem wanfala difren covenant witim olketa tu. “Mi mekem wanfala covenant witim iufala,” hem sei, “olsem Dadi bilong mi hem mekem wanfala covenant witim mi, for wanfala kingdom.” (Luke 22:29) Diswan nao hem Kingdom covenant. Namba bilong olketa man wea no perfect wea bae join insaed disfala Kingdom covenant hem 144,000. Bihaen olketa resurrect long heven, olketa bae rul olsem king and priest witim Christ. (Revelation 5:9, 10; 14:1-4) So, olketa wea insaed niufala covenant witim Jehovah God olketa sem wan wea insaed Kingdom covenant witim Jesus Christ. Olketa hia nomoa fit for kaikaim bred and drinkim wine long Evening Kaikai Bilong Lord.

Hao nao olketa hia wea fit for kaikaim bred and drinkim wine long Memorial savve olketa insaed disfala spesol covenant witim God and olketa garem right wea semsem witim Christ? Paul explainim olsem: “Datfala [holy] spirit seleva givim witness witim spirit bilong iumi [tingting bilong iumi] hao iumi nao olketa pikinini bilong God. So, sapos iumi olketa pikinini, iumi garem right olsem son tu: right wea kam from God, bat right wea semsem witim Christ, sapos iumi safa tugeta mekem iumi savve kasem glory tugeta.”—Romans 8:16, 17.

Thru long holy spirit bilong hem, wea hem nao active force, God anointim olketa hia wea garem right wea semsem witim Christ. Diswan mekem olketa barava sure olketa bae kasem datfala Kingdom. Diswan mekem wanfala hope for go long heven kamap insaed long olketa anointed Christian. Olketa ting evri toktok long Bible abaotem laef long heven hem for olketa. And tu, olketa willing for mekem sakrifaes saed long evriting long earth, insaed diswan hem wei for laef long earth and stap witim olketa wea olketa lovem. Nomata olketa Christian wea spirit anointim savve hao laef long Paradaes earth bae nambawan, olketa no hope for kasem diswan. (Luke 23:43) Hem no teaching bilong religion nao mekem olketa ting olsem, bat spirit bilong God wea waka long olketa nao mekem olketa garem hope for go long heven wea no savve change and datwan mekem olketa fit for kaikaim bred and drinkim wine long Memorial.

Waswe, sapos wanfala man no barava sure hem insaed datfala niu covenant and Kingdom covenant? Waswe, sapos spirit bilong God no showimaot long hem hao hem bae rul witim Christ? Sapos olsem bae hem rong for hem kaikaim bred and drinkim wine long Memorial. Tru nao, God bae no hapi long man wea savve hem no garem datfala koling bat wea go ahed for sei hem wanfala long olketa wea bae rul olsem king and priest long heven.—Romans 9:16; Revelation 22:5.

Celebratem Haomas Taem?

Waswe, dae bilong Jesus hem samting for celebratem evri week or evri day? For tok stret, Christ startim datfala Evening Kaikai Bilong Lord and hem dae long wei wea no fitim justice long Passover Day. Passover hem kamap wanfala taem nomoa insaed long year, long Nisan 14 and hem celebration for tingim taem wea Israel kamap free from wei for slave long Egypt. (Exodus 12:6, 14; Leviticus 23:5) So wei for rememberim dae bilong Christ “passover bilong iumi” shud kamap nomoa wanfala taem each year, no evri week or evri day. (1 Corinthians 5:7) Taem olketa Christian celebratem datfala Evening Kaikai Bilong Lord, olketa followim sem wei wea Jesus duim taem hem startim datwan.

So wanem nao Paul minim taem hem sei: “Evritaem iufala kaikaim disfala bred and drinkim disfala kap, iufala go ahed for talemaot dae bilong Lord, go kasem taem hem kam”? (1 Corinthians 11:26) Long disfala scripture Paul iusim wanfala word wea minim “evritaem wea,” or “enitaem wea.” So, hem really sei enitaem wea olketa anointed Christian kaikaim bred and wine hia, olketa showimaot faith long ransom sakrifaes bilong Jesus.

Olketa anointed Christian mas celebratem dae bilong Christ “go kasem taem hem kam.” Disfala celebration hem bae go ahed kasem taem wea Jesus kam for tekem olketa anointed follower bilong hem go long heven taem hem resurrectim olketa for kasem wanfala laef olsem spirit insaed long taem wea hem “stap moa.” (1 Thessalonians 4:14-17) Diswan hem barava join witim toktok bilong Christ long 11-fala loyal aposol bilong hem: “Sapos mi go and redyim wanfala ples for iufala, mi bae kam bak moa and tekem iufala kam long mi, mekem ples wea mi stap iufala tu bae stap.”—John 14:3.

Wanem Nao Mining Bilong Memorial for Iu?

Waswe, man mas kaikaim bred and drinkim wine long Memorial for kasem gud samting from sakrifaes bilong Jesus and for kasem laef olowe long earth? Nomoa. No eniwea long Bible hem talem hao bihaen olketa resurrect long earth, olketa wea fraet long God olsem Noah, Abraham, Sarah, Isaac, Rebekah, Joseph, Moses, and David, bae kaikaim bred and drinkim wine hia. Bat, bae olketa and evriwan wea laek for laef olowe long earth mas showimaot faith long God and Christ and long ransom sakrifaes bilong Jesus wea Jehovah provaedem. (John 3:36; 14:1) For kasem laef olowe, iu tu mas showimaot kaen faith olsem. Wei wea iu attendim datfala celebration bilong dae bilong Christ wea kamap wantaem long year hem for remindim iu long datfala bigfala sakrifaes and shud mekem iu tinghae go moa long datwan.

Aposol John strongim wei wea sakrifaes bilong Jesus hem barava important taem hem sei: “Mi raetem evri samting hia long iufala [olketa anointed wan] mekem iufala no duim eni sin. Bat, sapos eniwan duim wanfala sin, iumi garem wanfala helper witim Dadi, Jesus Christ, datwan wea raeteous. And hem wanfala sakrifaes wea kavarem sin bilong iumi, no for iumi nomoa bat for full world tu.” (1 John 2:1, 2) Olketa anointed wan fit for sei sakrifaes bilong Jesus wea kavarem sin hem for olketa. Bathem wanfala sakrifaes tu for sin bilong evriwan long full world, wea mekem olketa man wea obey fit for kasem laef olowe!

Waswe, bae iu celebratem dae bilong Jesus long April 4, 2004? Evriwea long world Olketa Jehovah’s Witness bae hipap for diswan long olketa ples bilong olketa for meeting. Sapos iu attend, iu bae kasem gud samting taem iu lisin long wanfala important Bible tok. Tok hia bae remindim iu hao Jehovah God and Jesus Christ duim staka samting for iumi. Hem bae barava strongim iu long spiritual wei taem iu hipap witim olketa wea barava tinghae long God and Christ and long ransom sakrifaes bilong Jesus. Maet datfala meeting savve strongim feeling bilong iu for kamap wanfala wea kasem kaeness bilong God wea iumi no fit for kasem, wea bae lead go long laef olowe. No letem eniting for stopem iu. Stap long there for lukim disfala celebration wea barava muvim heart wea bae givim honor long Jehovah God, Dadi bilong iumi long heven and wea bae mekem hem hapi.