Simpol Wei for Givim Literature
1. Why nao simpol wei for givimaot literature hem fitim principle wea stap long Revelation 22:17?
1 For faevfala year finis iumi iusim disfala simpol wei for givimaot literature and no askem pipol for peim. Waswe, disfala wei hem win? Olketa field service report showimaot hao namba bilong evri difren kaen literature wea iumi givimaot hem kamap moa big. Diswan givim chance for plande million pipol for “kam . . . tekem free wata bilong laef.”—Rev. 22:17.
2. Hu nao fit for kasem literature bilong iumi, and why nao olsem?
2 Nomata olsem, diswan no minim iumi mas givimaot literature long eniwan nomoa wea willing for acceptim. Iumiseleva savve iusim olketa material samting bilong iumi long wisefala wei. So long sem wei, each pablisa garem responsibility tu for iusim long wisefala wei literature wea hem tekem long kongregeson wea hem no peim from organization bilong Jehovah. Nomata organization bilong Jehovah mekem wei kamap for olketa pablisa tekem literature and no peim, olketa literature hia garem kost tu, from organization mas spendem selen for wakem and sendem kam. Iumi evriwan shud barava tinghae long wei wea literature bilong iumi savve helpem pipol wea garem honest heart for kasem stretfala savve abaotem God and Son bilong hem, Jesus Christ.—John 17:3.
3. Hao nao organization bilong Jehovah fit for provaedem literature, and hu nao olketa main wan for sapotim disfala waka?
3 Hao nao organization bilong Jehovah fit for provaedem literature nomata olketa no talem haomas nao for peim? Olketa donation wea pipol givim nao olketa iusim for wakem and sendem kam olketa literature. Olketa servant bilong Jehovah wea dedicate finis nao main wan for sapotim diswan. Olketa Jehovah’s Witness no expectim olketa difren pipol nao for sapotim disfala barava important waka for talemaot Kingdom. Iumi no enitaem savve gogo raon long pipol for kolektem selen. Bat, iumi hapi for acceptim eni smol donation wea pipol long field willing for givim from olketa barava interest and tinghae long waka bilong iumi.
4. Saed long wei for givim selen, wanem nao samfala disaed for duim, and waswe, selen hia hem for literature nomoa?
4 Wei wea Iumi Savve Help: Iumi savve followim kaonsel bilong Paul for sharem samting witim olketa narawan “fitim need wea olketa garem.” (Rom. 12:13) Taem iumi givim selen for disfala waka evriwea long world, hem minim iumi sharem samting wea iumi garem witim olketa brata bilong iumi. Long sem wei wea samfala markem selen for givim for olketa Kingdom Hall expenses, olketa disaed tu for markem selen for givim each month for disfala waka evriwea long world. Olketa luksavve hao selen hia hem no for wakem literature nomoa, bat hem for evri difren samting saed long disfala waka. Tingim plande gud samting wea olketa brata bae kasem sapos plande moa long iumi share for give evritaem.
5. Taem iumi orderim literature, wanem tingting nao iumi shud garem?
5 Nara wei wea iumi savve sharem samting witim olketa brata, hem thru long wei for no ova tumas for tekem olketa literature. Wei for orderim nomoa samting wea iumi really needim bae mekem olketa nara brata long difren ples fit for kasem olketa spiritual samting wea olketa needim for strongim olketa and mekem disfala waka for preachim gud nius hem muv ahed long ples wea olketa stap.—Heb. 13:16.
6. Hao nao iumi savve followim Philippians 2:4, taem iumi orderim olketa expensive buk or video?
6 Iumi shud barava tingim diswan taem iumi orderim olketa samting wea kostim staka selen for wakem, wea hem nao olketa samting olsem video, CD-ROM, olketa bigfala reference buk, olketa volume, and kaset. Winim wei for evriwan insaed famili tekem samting olsem for each wan, maet hem gud sapos full famili sharem wanfala nomoa. Sapos iumi markem nomoa samting wea iumi tekem, diswan bae mekem olketa narawan tu fit for kasem sem gud samting wea iumi kasem.—Phil. 2:4.
7. Hao nao disfala information abaotem kost saed long wei for wakem literature helpem iumi for garem stretfala tingting abaotem datwan?
7 Selen wea iumiseleva givim for disfala waka evriwea long world and selen wea iumi kasem from olketa wea interest long field nao help for peim kost bilong olketa literature wea iumi givimaot long field service. Bat, iumi no fit for expectim selen from olketa man aotsaed for kavarem kost bilong olketa literature wea iumi seleva iusim, olsem songbuk, Yearbook, deluxe Bible, and kaen samting olsem. Olketa servant bilong Jehovah wea dedicate finis nao main wan for givim sapot saed long selen. From plande pablisa ting olsem, olketa savve tingim haomas nao olketa samting hia kostim sapos olketa peim long stoa, and then olketa givim selen fitim samting wea olketa tingim. Olsem example, wanfala deluxe Bible wea garem gold raonem olketa page, hem savve kostim samting olsem $160 or winim, olketa bigfala reference buk savve samting olsem $320 and go ap, kalenda hem samting olsem $40, olketa encyclopedia long CD-ROM hem savve kostim samting olsem $400 go kasem $800 or maet winim datwan, music CD savve kost samting olsem $160, and kost bilong samfala video savve winim datwan tu. Wei for no givim inaf selen for kavarem kost bae mekem organization hard for duim plande moa samting wea olketa need for duim for mekem disfala waka evriwea long world for gohed.
8. Wanem nao wanfala wei wea iumi showimaot iumi olketa tru Christian?
8 Jesus hem sei pipol bae luksavve long olketa trufala disaepol bilong hem from olketa showimaot love long each other. (John 13:34, 35) For iumi give saed long olketa material samting and no selfish and willing for sharem samting witim olketa narawan fitim need bilong olketa, hem wanfala nambawan wei for pruvim hao iumi olketa tru Christian.