Gohed for Buildimap Narawan
1 Aposol Paul duim best bilong hem for strongim olketa narawan wea olketa worship tugeta. (Acts 14:19-22) Long sem wei, iumi tingim and laek for helpem olketa brata bilong iumi taem olketa feisim hardfala taem. Bible showimaot hao no olketa elder nomoa shud interest long narawan bat evriwan nao shud duim datwan. (Rom. 15:1, 2) Tingim tufala wei wea iumi savve followim disfala loving kaonsel: “Gohed for comfortim narawan and buildimap narawan.”—1 Thess. 5:11.
2 Luksavve Long Need Bilong Narawan: Bible storyim hao Dorcas “duim plande gudfala samting for narawan and givim samting for olketa wea garem need.” (Acts 9:36, 39) Hem tingim need bilong narawan and hem duim samting wea hem fit for duim for helpem olketa. Hem showimaot barava nambawan example for iumi! Maet iu luksavve wanfala olo needim trak for tekem hem go long meeting. Or maet wanfala pioneer no garem eniwan for waka witim hem long wanfala aftanun long week. Sapos iu luksavve eniwan wea needim kaen help olsem and iu helpem hem, tingim hao datwan bae barava encouragem hem!
3 Storyim Spiritual Samting: Nara wei wea iumi savve buildimap narawan hem thru long toktok bilong iumi. (Eph. 4:29) Wanfala brata wea elder for longfala taem finis hem sei: “Sapos iu laek for encouragem narawan, tok abaotem olketa spiritual samting. For startim story wea savve buildimap narawan, maet iu savve askem wanfala simpol kwestin olsem, ‘Hao nao iu lanem truth?’” Showimaot interest long olketa young wan long kongregeson. Tingim olketa wea wikdaon and olketa wea savve shame. (Prov. 12:25) No letem enikaen story abaotem hapitaem bilong world mekem iumi no story abaotem spiritual samting witim olketa wea iumi worship tugeta.—Rom. 1:11, 12.
4 Wanem nao iu savve storyim wea savve buildimap narawan? Long Bible reading and study bilong iuseleva, waswe, iu lukim wanfala principle wea barava strongim go moa love bilong iu for Jehovah? Waswe, iu kasem wanfala samting wea iu herem long pablik tok or Wastaoa Study wea barava encouragem iu? Or waswe, wanfala experience wea strongim faith barava muvim heart bilong iu? Sapos iu barava tinghae long olketa nambawan spiritual samting olsem, bae iu evritaem garem samting for storyim long narawan wea bae encouragem hem.—Prov. 2:1; Luke 6:45.
5 Iumi gohed for buildimap narawan taem iumi givim eni help wea fitim and iusim tongue bilong iumi long wisefala wei.—Prov. 12:18.