-
Iumi Garem Kaon Long Nara PipolKingdom Ministry—2005 | July
-
-
Iumi Garem Kaon Long Nara Pipol
1 Aposol Paul feel hem garem responsibility for preach long pipol. Hem savve hao Jehovah mekem wei for evri difren kaen man kasem salvation thru long blood bilong Son bilong Hem. (1 Tim. 2:3-6) Dastawe, Paul sei: “Mi garem kaon long olketa Greek and long olketa Heathen, long olketa wise man and long olketa man wea no tingting gud.” Hem waka hard and no hol bak for peim bak kaon wea hem garem long nara pipol long wei for sharem gud nius long olketa.—Rom. 1:14, 15.
2 Olsem Paul, olketa Christian distaem luk aotem evri chance for sharem gud nius long neiba bilong olketa. Hem important tumas for iumi luk aotem olketa wea garem honest heart from datfala “bigfala trabol” hem klosap tumas for kam. Love for pipol mas muvim iumi for waka hard long disfala waka for sevem laef.—Matt. 24:21; Ezek. 33:8.
3 Peim Kaon Bilong Iumi: Main wei wea iumi savve meetim pipol hem thru long wei for preach long haos tu haos. Long olketa territory wea staka no savve stap long haos, wei for keepim stretfala record and for go bak long olketa difren taem bae mekem iumi fit for meetim staka pipol. (1 Cor. 10:33) Iumi savve meetim samfala pipol tu taem iumi witness long olketa bisnis territory, long street, long olketa ples wea pipol sisidaon for rest, and long telephone. Iumi savve askem iumiseleva olsem: ‘Waswe, mi duim best for preach long evri difren kaen wei olsem mekem mi sharem disfala message bilong laef?’—Matt. 10:11.
4 Wanfala pioneer barava luksavve hem garem responsibility for mas visitim evri pipol long territory bilong hem. Long wanfala haos, window bilong hem sat evritaem and haos hem emti olowe. Bat, wanfala day datfala pioneer go pas and lukim wanfala trak front long datfala haos taem hem no go preaching. From hem no laek missim datfala chance, hem go noknok long datfala haos. Hem meetim wanfala man, and datwan lead go for hem and hasband bilong hem duim samfala return visit long datfala man. Gogo, datfala man acceptim Bible study, and distaem hem wanfala baptaes brata. Datfala man barava tinghae long wei wea disfala sista tingim tumas responsibility wea hem garem for mas preach long nara pipol.
5 From end barava klosap tumas, distaem hem taem for peim kaon bilong iumi long nara pipol long wei for barava waka hard long preaching waka.—2 Cor. 6:1, 2.
-
-
Part 11—Conductim Olketa Bible Study wea Muv AhedKingdom Ministry—2005 | July
-
-
Part 11—Conductim Olketa Bible Study wea Muv Ahed
Helpem Olketa Student for Duim Return Visit
1 Taem Bible student start for share long preaching waka, bae hem meetim pipol wea interest long gud nius. Hao nao iumi savve helpem disfala niu pablisa for duim return visit long gudfala wei and for mekem interest bilong man grow?
2 Wei for prepare for duim wanfala return visit hem start long fasfala kol. Encouragem student for barava interest long olketa wea hem story witim olketa. (Phil. 2:4) Gohed for trainim student for askem kwestin wea bae mekem haosholder talem tingting bilong hem. Trainim hem tu for lisin, and for luksavve long olketa samting wea haosholder wari long hem. Taem samwan interest, talem niu pablisa hia for raetem olketa main information abaotem datfala haosholder. Iusim information hia for helpem hem preparem story for next visit.
3 Prepare for Go Bak: Reviewim moa fasfala story bilong iutufala witim haosholder, and showim student hao for chusim samfala information saed long message bilong Kingdom wea bae mekem haosholder interest. (1 Cor. 9:19-23) Preparem wanfala short story witim student for hem iusim wanfala scripture and wanfala paragraf insaed pablikeson wea iumi iusim for study witim pipol. Witim datwan, redim kwestin for askem long end bilong story wea bae lead go long next visit. Showim niufala pablisa hao for mekem grow savve wea datfala haosholder garem saed long Word bilong God, each taem hem visitim hem.
4 Wei for teachim student wanfala simpol wei for startim story wea bae hem iusim taem hem duim return visit bae helpem hem. Bihaen hem sei hello long haosholder, maet hem savve sei: “Mi enjoyim story bilong iumi lastaem, and mi kam bak for sharem nara information from Bible abaotem [talem datfala samting].” Maet iu need for showim disfala niu pablisa tu wanem for talem sapos difren man nao stap long haos.
5 Mas Go Bak: Encouragem student for showimaot gudfala example for go bak kwiktaem long evriwan wea interest. For kasem pipol long haos bae needim man for go bak evritaem and no givap. Teachim student hao for mekem arrangement for go bak and helpem hem for luksavve hao hem important for followim promis bilong hem for go bak. (Matt. 5:37) Trainim student for kaen, and for showim respect taem hem luk aotem pipol wea olsem sheep and mekem interest bilong olketa grow.—Titus 3:2.
-