Preach Abaotem Kingdom—Wanfala Spesol Privilege

¹ Staka billion pipol long earth kasem gud samting evriday from staka samting wea Jehovah givim for mekem iumi gohed laef. (Matt. 5:45) Nomata olsem, tu-thri nomoa garem disfala spesol privilege for showim long Creator wei wea olketa tinghae long datwan long wei for preachim gud nius abaotem Kingdom bilong God. (Matt. 24:14) Hao nao tingting bilong iu abaotem disfala spesol privilege?

² Wei for preach abaotem Kingdom givim honor long God and givim hope and peace long pipol wea safa from olketa hard taem distaem. (Heb. 13:15) Olketa wea acceptim datfala message bae garem hope for kasem laef olowe. (John 17:3) No eni nara waka savve givim gud samting olsem! Wei wea aposol Paul duim ministry bilong hem showimaot hem tinghae long datwan. Hem ting long ministry bilong hem olsem wanfala samting wea garem hae price.—Acts 20:20, 21, 24; 2 Cor. 4:1, 7.

³ Barava Tinghae Long Spesol Privilege Bilong Iumi: Wanfala wei iumi savve showimaot iumi tinghae long privilege for preach hem long wei for mekem ministry bilong iumi kamap moabeta. Waswe, iumi waka hard and givim taem for preparem story wea bae muvim heart bilong olketa wea lisin long iumi? Waswe, iumi savve duim samting for kamap moabeta long wei wea iumi iusim Bible and story witim pipol? Waswe, iumi duim evribit territory wea olketa markem for iumi duim? Waswe, iumi savve hao for startim and conductim wanfala Bible study? Olsem olketa faithful Christian bifor, and long distaem tu, samting wea muvim iumi nao hem stretfala tingting abaotem disfala waka, and wei for barava tinghae long privilege wea iumi garem.—Matt. 25:14-23.

⁴ Taem iumi waka hard for tekpart long ministry hem barava big samting sapos wei for olo, nogud health, and olketa nara hard samting affectim iumi. Word bilong God comfortim iumi taem hem strongim hao Jehovah tinghae long olketa wea duim hard waka olsem, nomata maet nara pipol no tinghae long datwan.—Luke 21:1-4.

⁵ Wei for preach abaotem Kingdom hem barava mekem man satisfae. Wanfala sista wea 92 year, hem sei: “Hem nambawan privilege for ting go bak long 80 year wea mi servem God and mi nating sorre hao mi duim datwan! Sapos mi savve young bak moa, bae mi duim olketa sem samting wea mi duim finis bikos, tru nao, ‘loving-kaeness bilong God hem moabeta winim laef.’” (Ps. 63:3) Iumi tu mas barava tinghae long disfala spesol privilege wea kam from God for preach abaotem Kingdom.

Part 12​—Conductim Olketa Bible Study wea Muv Ahed

Helpem Olketa Student for Startim and Conductim Olketa Bible Study

¹ Taem olketa Bible student start for go aot long field ministry, maet olketa hol bak for startim and conductim olketa Bible study. Hao nao iumi savve helpem olketa for mekem grow stretfala tingting abaotem disfala waka wea hem important part long ministry?—Matt. 24:14; 28:19, 20.

² Taem Bible student fit for kamap anbaptaes pablisa, maet hem joinim finis Theocratic Ministry Skul. Training wea hem kasem for redim and givim tok bae helpem hem for mekem grow savve for teach wea “wanfala wakman wea no garem reason for feel shame, wea iusim word bilong truth long stretfala wei” mas garem.—2 Tim. 2:15.

³ Teach Thru Long Example Bilong Iu: Jesus trainim olketa disaepol long wei for talem kliafala instruction and showimaot gudfala example. Hem sei: “Evriwan wea garem gudfala training bae kamap olsem teacher bilong hem.” (Luke 6:40) Hem barava important for followim Jesus long wei wea iuseleva showimaot gudfala example long ministry. Taem student lukim example bilong iu, bae hem minim hao goal for duim olketa return visit hem for startim olketa Bible study.

⁴ Explainim hao taem iumi askem haosholder sapos hem laek for study, iumi no need for talem evri samting abaotem datwan. Plande taem hem gud for showim hao for duim study long wei for duim wan or tufala paragraf from pablikeson for studyim. Olketa gudfala idea long hao for duim diswan hem stap long page 6 bilong January 2002 Kingdom Ministry Bilong Iumi.

⁵ Long taem wea fitim, invaetem student for go witim iu or witim nara pablisa wea garem savve long olketa nara Bible study. Maet hem tekpart for koment long wanfala paragraf or wanfala main scripture. So, thru long wei for student lukluk, hem bae lanem staka samting abaotem hao for conductim olketa Bible study wea muv ahed. (Prov. 27:17; 2 Tim. 2:2) Praisem hem and talem samting wea hem savve duim for kamap moabeta.

⁶ Wei for trainim olketa niu pablisa for kamap olketa wea teachim Word bilong God bae redim olketa for startim and conductim olketa Bible study bilong olketa seleva, wea datwan nao hem “gudfala waka.” (2 Tim. 3:17) Hem mekem iumi hapi for waka tugeta witim olketa student for talemaot disfala loving invitation: “Letem eniwan wea laekem for tekem wata bilong laef free”!—Rev. 22:17.