“Kasem Strong From Toktok Bilong Faith”

¹ Man need for barava waka hard for gohed keepim fasin for lovem God. (1 Tim. 4:7-10) Iumi bae kwiktaem wik and foldaon sapos iumi duim diswan long strong bilong iumiseleva. (Isa. 40:29-31) Wanfala wei wea iumi savve kasem strong from Jehovah hem for herem “toktok bilong faith.”—1 Tim. 4:6.

² Staka Gudfala Spiritual Kaikai: Jehovah provaedem staka gudfala spiritual kaikai long Bible and from “faithful and wise slave.” (Matt. 24:45) Waswe, iumi duim part bilong iumi for kasem gud samting from datwan? Waswe, iumi readim Bible evriday? Waswe, iumi markem taem for study seleva and ting raonem wanem iumi studyim? (Ps. 1:2, 3) Healthy spiritual kaikai olsem strongim and protectim iumi from olketa samting bilong Satan wea savve mekem iumi wikdaon. (1 John 5:19) Sapos iumi fulimap mind witim olketa gudfala samting and followim evri samting hia, Jehovah bae stap witim iumi.—Phil. 4:8, 9.

³ Nara samting Jehovah iusim for strongim iumi nao hem olketa kongregeson meeting. (Heb. 10:24, 25) Spiritual instruction and gudfala wei for kaban long olketa meeting strongim iumi for deal witim olketa test. (1 Pet. 5:9, 10) Wanfala young Christian sei: “Full day mi stap long skul and diswan savve barava mekem mi feel wikdaon. Bat olketa meeting hem olsem wata long drae ples, wea helpem mi for luksavve wanem mi need for duim long skul long next day.” Iumi barava kasem blessing taem iumi duim best for attendim olketa meeting!

⁴ Talemaot Truth: Jesus markem waka for preach olsem kaikai bilong hem. Waka hia strongim hem. (John 4:32-34) Long sem wei tu, taem iumi storyim olketa nambawan promis bilong God long nara pipol, diswan strongim iumi. Wei for busy for preach and teach tu savve helpem iumi tingim evritaem Kingdom and olketa blessing wea iumi klosap for kasem. Datwan barava strongim iumi.—Matt. 11:28-30.

⁵ Iumi garem nambawan privilege for kasem gud samting from staka spiritual kaikai wea Jehovah provaedem for pipol bilong hem distaem! Iumi laek gohed for singaot witim hapi wea bae givim praise long hem.—Isa. 65:13, 14.

Part 5​—Conductim Olketa Bible Study wea Muv Ahed

Disaedem Fastaem Haomas Information for Studyim

¹ Jesus tingim need bilong olketa disaepol taem hem teachim olketa. Hem storyim nomoa “wanem olketa fit for minim.” (Mark 4:33; John 16:12) Long sem wei tu, olketa wea teachim Word bilong God distaem need for disaedem fastaem haomas information nao fitim for olketa studyim insaed taem wea olketa markem for duim datfala study. Haomas information for studyim bae depend long savve and living bilong teacher and student.

² Strongim Faith: Maet samfala student needim iu for divaedem datfala information fitim tu or thri study. Bat olketa nara student savve minim datfala sem information insaed wanfala study nomoa. Hem barava important for iumi helpem student minim gud wanem hem lanem winim wei for storyim tumas samting insaed shortfala taem. Evri student needim strong faondeson for faith wea olketa just kasem long Word bilong God.—Prov. 4:7; Rom. 12:2.

³ Taem iu conductim study evri week, iusim taem iu needim for helpem student minim and acceptim wanem hem lanem from Word bilong God. Stap klia long wei for no explainim gud wanfala paragraf and then kwiktaem muv go long next paragraf. Diswan bae mekem student no minim gud truth wea iu teachim hem. Iusim inaf taem for story raonem gud olketa main point and scripture wea olketa nao faondeson for samting iumi teachim.—2 Tim. 3:16, 17.

⁴ No Storyim Difren Samting: Iumi laek stap klia long wei for no explainim gud wanfala paragraf and then kwiktaem muv go long next paragraf, bat long narasaed, iumi no laek tu for storyim difren samting long taem for study wea mekem study no muv ahed gud. Sapos hem wei bilong student for storyim olketa samting bilong hemseleva, iumi savve talem hem hao iumi bae storyim datwan bihaen study hem finis.—Eccl. 3:1.

⁵ Long narasaed, sapos iumi no careful, wei wea iumi tinghae tumas long truth savve mekem iumi story tumas long taem for study. (Ps. 145:6, 7) Student kasem gud samting for herem samfala taem wanfala difren point or experience, bat diswan shud no ova tumas gogo student no kasem stretfala savve abaotem olketa main teaching bilong Bible.

⁶ Wei for no trae studyim tumas information long each taem for study bae helpem olketa Bible student for “wakabaot long laet bilong Jehovah.”—Isa. 2:5.