Day Bilong Jehovah Hem Klosap

¹ Olketa Christian laekem tumas day bilong Jehovah for kam wea bae distroem disfala world, and bihaen datwan, wanfala niu world wea garem raeteous fasin bae kamap. (2 Pet. 3:12, 13) From iumi no savve long barava taem wea datwan bae kamap, iumi mas gohed for luk aot and helpem olketa narawan tu for duim sem samting. (Ezek. 33:7-9; Matt. 24:42-44) Wei for ting raonem profesi bilong God insaed Bible bae strongim tingting bilong iumi hao “bigfala day bilong Jehovah hem klosap.”—Zeph. 1:14.

² Olketa World Paoa wea Kamap: Long Revelation 17:9-11, aposol John storyim “sevenfala king,” wea stand for sevenfala world paoa wea kamap long olketa difren taem. John storyim tu “mek-eit king,” wea hem stand for United Nations distaem. Waswe, bae samfala world paoa moa kamap bihaen olketa hia? Nomoa. Profesi talem hao disfala mek-eit king “hem go for finis evribit,” and bihaen datwan hem no storyim moa eni nara king long earth. Disfala profesi helpem iumi for savve long taem wea iumi insaed distaem.

³ Daniel 2:31-45 helpem iumi for minim kakam bilong day bilong Jehovah. Long datfala profesi, Nebuchadnezzar lukim long dream wanfala mamaeti image wea stand for olketa world paoa. Each wan long olketa world paoa hia olketa kamap finis. Wanem world paoa nao rul long taem wea iumi insaed distaem? Distaem iumi insaed long taem wea leg bilong datfala image nao stand for hem. Datfala profesi barava storyim gud samting wea bae kamap bihaen. Jehovah bae distroem evribit rul bilong man, datwan bae mekwe for “wanfala kingdom wea bae nating savve finis.” Waswe, iu lukim hao diswan showimaot day bilong Jehovah hem klosap?

⁴ Nara Pruv: Iumi lukim tu olketa nara pruv wea showimaot day bilong Jehovah hem klosap. Iumi lukim hao samting wea aposol Paul storyim saed long fasin bilong pipol “insaed long olketa last day” hem fulfill distaem. (2 Tim. 3:1-5) And iumi share insaed datfala waka for witness evriwea long world bifor end hem kam. (Matt. 24:14) So iumi mas mekem ministry bilong iumi showimaot hao iumi ting strong long disfala toktok bilong angel for hariap: “Fraet long God and givim glory long hem, from hour bilong judgment bilong hem kam finis nao.”—Rev. 14:6, 7.

Part 9—Conductim Olketa Bible Study wea Muv Ahed

Redim Student for Duim Enitaem Witnessing

¹ Taem Andrew and Philip luksavve hao Jesus nao datfala Messiah, tufala no savve hol bak for talem nara pipol datfala hapi nius. (John 1:40-45) Long sem wei distaem, taem olketa Bible student start for showimaot faith long samting olketa lanem, olketa barava laek for story abaotem datwan. (2 Cor. 4:13) Hao nao iumi savve encouragem olketa for duim enitaem witnessing and for redim olketa for duim long gudfala wei?

² Maet iumi savve askem student sapos hem story long nara pipol finis abaotem samting wea hem lanem from Bible. Maet hem savve invaetem samfala famili member or fren for kam join long study. Askem hem sapos eni wakfren, skulfren or eniwan hem savve long hem interest long gud nius. Taem hem invaetem narawan for joinim study and story witim olketa wea interest long gud nius, datwan bae helpem hem for start for givim witness. Helpem hem for minim hao taem iumi story long nara pipol abaotem Jehovah God and olketa plan bilong hem, iumi need for showimaot fasin for luksavve, respect, and kaenfala fasin.—Col. 4:6; 2 Tim. 2:24, 25.

³ Storyim Biliv Bilong Olketa: Hem barava important for trainim olketa Bible student for iusim Word bilong God taem olketa storyim biliv bilong olketa. Long taem bilong study, askem student: “Hao nao bae iu iusim Bible for explainim long famili bilong iu disfala Bible truth?” or “Wanem scripture nao bae iu iusim for pruvim diswan long wanfala fren bilong iu?” Lisin long ansa bilong hem, and showim hem hao for iusim Bible taem hem teachim narawan. (2 Tim. 2:15) Taem iu duim olsem, iu redim student for duim enitaem witnessing, and tu, iu redim hem for join long preaching waka witim kongregeson taem hem kamap fit.

⁴ Hem barava wise for redim Bible student for taem hem kasem persecution. (Matt. 10:36; Luke 8:13; 2 Tim. 3:12) Taem nara pipol askem kwestin or talem samfala samting abaotem Olketa Jehovah’s Witness, diswan savve openem wei for student givim witness. Datfala tract Wanem Nao Olketa Jehovah’s Witness They Believim, and datfala brochure, Olketa Witness Bilong Jehovah—Wan Mind for Duim Will Bilong God, bae helpem olketa for “redi for givim ansa.” (1 Pet. 3:15) Hem garem stretfala information wea olketa niu wan savve iusim for explainim biliv bilong iumi and waka bilong iumi long olketa fren and famili member wea maet againstim olketa.