Waka for Preach Helpem Iumi for Gohed Strong

¹ Word bilong God encouragem iumi for “gohed strong long datfala resis wea stap front long iumi.” (Heb. 12:1) Long sem wei wea wanfala man wea ran long resis mas gohed ran strong for win, iumi tu mas gohed strong for kasem prize for laef olowe. (Heb. 10:36) Hao nao Christian ministry savve helpem iumi for gohed strong kasem end?—Matt. 24:13.

² Kasem Strong Long Spiritual Wei: For gohed talemaot nambawan promis long Bible abaotem niu world wea raeteous fasin bae stap long hem savve helpem iumi for tingim klia long mind bilong iumi datfala hope. (1 Thess. 5:8) Taem iumi share evritaem long field ministry, iumi garem chance for talem pipol truth wea iumi lanem from Bible. Iumi garem chance for defendim samting iumi bilivim, and taem iumi duim olsem diswan strongim iumi long spiritual wei.

³ For teachim gud nara pipol, iumiseleva mas minim gud fastaem olketa truth insaed Bible. Iumi need for duim research and ting raonem datfala information. Taem iumi waka hard for duim datwan, savve bilong iumi bae kamap big, faith bilong iumi bae kamap strong, and diswan hem strongim iumi long spiritual wei. (Prov. 2:3-5) So taem iumi helpem nara pipol iumiseleva tu kasem strong.—1 Tim. 4:15, 16.

⁴ For strong for tekpart long ministry hem wanfala barava important part bilong “full kaleko for faet wea kam from God.” Iumi needim diswan mekem iumi savve stand strong for againstim Devil and olketa demon bilong hem. (Eph. 6:10-13, 15) Wei wea iumi busy long olketa theocratic waka bae helpem iumi for tingim nomoa olketa gud samting and stap klia long olketa samting long world bilong Satan wea savve spoelem iumi. (Col. 3:2) Taem iumi teachim nara pipol abaotem olketa wei bilong Jehovah, diswan remindim iumi evritaem for gohed for showimaot holy fasin.—1 Pet. 2:12.

⁵ Kasem Strong From God: Last samting, waka for preach teachim iumi for depend long Jehovah. (2 Cor. 4:1, 7) Datwan hem wanfala blessing! Wei wea iumi mekem grow diskaen trust helpem iumi for duim evribit ministry, and tu, for deal witim eni samting iumi kasem long laef bilong iumi. (Phil. 4:11-13) Tru nao, for man gohed strong hem barava important for depend evribit long Jehovah. (Ps. 55:22) Waka for preach helpem iumi for gohed strong long staka difren wei.

Part 10—Conductim Olketa Bible Study wea Muv Ahed

Trainim Student for Duim Haos-tu-Haos Ministry

¹ Taem olketa elder disaedem finis wanfala Bible student hem fit for kamap anbaptaes pablisa, hem savve tekpart long waka for preach witim kongregeson. (Lukim Organize for Duim Ministry Bilong Yumi, pp. 97-99.) Hao nao iumi savve helpem student for kasem goal for preach long haos tu haos?

² Prepare Tugeta: Hem barava important for prepare fastaem. Showim student wea long Kingdom Ministry Bilong Iumi and Hao for Startim and Go Ahed for Story Abaotem Bible buklet hem savve faendem olketa idea for startim story, and helpem hem for chusim wanfala isi idea wea fitim territory. Stretawe encouragem hem for evritaem iusim Bible long ministry.—2 Tim. 4:2.

³ For practice fastaem bae barava helpem niu pablisa. Taem student practice, storyim hao hem savve ansarem long gudfala wei kaen toktok wea plande taem pipol savve talem long territory. (Col. 4:6) Talem hem hao hem olraet nomoa sapos wanfala Christian no savve ansarem evri kwestin wea haosholder askem. Plande taem best wei for ansarem kwestin olsem hem for talem haosholder hao bae iu duim research fastaem and kam bak for story raonem ansa bilong datfala kwestin witim hem.—Prov. 15:28.

⁴ Preach Tugeta: Long fastaem wea student share long haos-tu-haos ministry, letem hem lukluk taem iu storyim subject wea iufala preparem tugeta. Mekem wei for hem savve join insaed datfala story. Samfala taem maet hem gud for niu pablisa readim and storyim wanfala scripture. Tingim tu fasin and savve bilong student. (Phil. 4:5) Praisem hem taem iu gohed teachim hem olketa difren part long waka for preach.

⁵ Hem important for helpem niu pablisa garem schedule for share long ministry evri week sapos hem fit for duim. (Phil. 3:16) Markem taem for iutufala waka tugeta long ministry, and encouragem hem for waka tu witim olketa narawan wea strong for duim ministry. Example wea olketa hia showimaot and wei for kaban witim olketa bae helpem hem for savve hao for duim gud disfala waka for preach long haos tu haos and for hapi taem hem duim datwan.