Fulfillim Dedication Bilong Iumi
1 Nomata iu baptaes no longtaem go nomoa or plande year finis, for sure iu rememberim datfala important samting long laef bilong iu. Baptism bilong iumi hem no end, bat hem start bilong wei for serve for full laef wea savve gohed for olowe. (1 John 2:17) Wanem nao insaed long wei for fulfillim dedication bilong iumi?
2 Followim Example Bilong Christ: Taem hem baptaes, Jesus “startim waka bilong hem,” long wei for talemaot “gud nius bilong kingdom bilong God.” (Luke 3:23; 4:43) Olsem tu, taem iumi showimaot dedication bilong iumi long Jehovah thru long wei for baptaes, iumi kasem appointment olsem minister bilong gud nius. Nomata iumi mas iusim moa taem and strong for kasem olketa material need bilong living, main waka bilong iumi nao hem Christian ministry. (Matt. 6:33) Olketa wea dedicate long God no aftarem riches or bigfala nem bat olketa ‘mekem ministry bilong olketa kasem glory,’ olsem aposol Paul duim. (Rom. 11:13) Waswe, iu barava tinghae long privilege bilong iu for servem Jehovah and duim best bilong iu long datwan?
3 Olsem Jesus, iumi tu mas “againstim Devil.” (Jas. 4:7) Satan testim Jesus bihaen Hem baptaes, and long sem wei hem targetim olketa servant bilong Jehovah distaem wea dedicate tu. (Luke 4:1-13) From world bilong Satan hem stap raonem iumi, iumi mas kontrolem seleva, stap klia long eni samting wea savve mekem mind bilong iumi dirty and spoelem heart bilong iumi. (Prov. 4:23; Matt. 5:29, 30) Olketa Christian kasem kaonsel hao olketa “kanduit kaikai long ‘tebol bilong Jehovah’ and tebol bilong olketa demon.” (1 Cor. 10:21) Diswan minim iumi lukaot long nogud hapitaem, wei for kaban witim nogud pipol, and olketa danger bilong Internet. Hem minim for stap klia tu long information bilong olketa apostate. Wei for luksavve long olketa samting hia and olketa nara plan bilong Satan bae helpem iumi for fulfillim dedication bilong iumi.
4 Iusim Wanem God Provaedem: For helpem iumi fulfillim dedication bilong iumi, Jehovah givim help thru long Word bilong hem and Christian kongregeson. Mekem wei for readim Bible and prea long Jehovah olsem part bilong samting iumi duim evriday. (Josh. 1:8; 1 Thess. 5:17) Enjoyim olketa kongregeson meeting. (Ps. 122:1) Kaban witim olketa wea fraet long Jehovah and keepim olketa order bilong hem.—Ps. 119:63.
5 Witim help bilong God, iu savve fulfillim dedication bilong iu and kasem hapi for servem Jehovah for olowe.—Ps. 22:26, 27; Phil. 4:13.