Young Pipol wea Shaen Olsem Laet
1. Hao nao Bible hem showimaot olketa Christian bae luk difren, and hao nao olketa toktok hia fitim olketa young Christian distaem?
1 Jesus talem olketa disaepol bilong hem: “Iufala nao laet bilong world.” (Matt. 5:14, 16) Pipol bae lukim olketa difren, olsem wanfala taon wea stap antap long hill wea luk braet taem sun shaen long hem. Distaem plande young Christian gohed for “shaen olsem laet insaed world” bikos long stretfala fasin bilong olketa and wei wea olketa strong for givim witness.—Phil. 2:15; Mal. 3:18.
2. Wanem nao samfala wei wea iu savve witness long olketa teacher and skulfren?
2 Long Skul: Hao nao maet iu savve givim witness long skul? Samfala young wan mekius long taem wea class story raonem olketa subject olsem olketa drug, evolution, and war. Wanfala sista kasem skul assignment for raet abaotem terrorism, so hem iusim chance hia for talem hao Kingdom bilong God hem wanfala tru hope for olketa man. Datfala teacher hem tinghae long wei wea sista hia barava redyim gud report bilong hem, and diswan openem wei for witness moa long teacher.
3. Hao nao iu savve letem laet bilong iu shaen thru long fasin bilong iu long skul?
3 Narafala wei for shaen olsem laet hem thru long fasin and lukluk bilong iumi and long wei for werem kaleko wea showimaot respect. (1 Cor. 4:9; 1 Tim. 2:9) Taem olketa student and teacher lukim hao fasin and lukluk bilong iu hem difren, maet diswan muvim samfala for interest long truth and diswan savve givim iu chance for sharem olketa truth from Bible. (1 Pet. 2:12; 3:1, 2) Maet hem no isi evritaem for showimaot fasin wea followim God, bat Jehovah bae barava blessim iu. (1 Pet. 3:16, 17; 4:14) For mekem man interest long gud nius, maet iu savve readim Bible literature taem iu spel or leavim literature long ples wea narawan bae lukim.
4. Wanem nao samfala gud samting wea kamaot from wei for witness long skul?
4 For letem laet bilong iu shaen long skul bae strongim faith bilong iu and mekem iu hapi and no shame for servem Jehovah. (Jer. 9:24) And tu, hem bae protectim iu. Wanfala sista hem sei: “Wanfala gud samting wea kamaot from wei wea mi storyim biliv bilong mi hem hao olketa student no trae for pullim mi for duim olketa samting wea no stret witim wanem Bible hem sei.”
5. (a) Hao nao samfala young wan mekem ministry bilong olketa kamap moa big? (b) Wanem nao olketa spiritual goal bilong iu?
5 Service wea Moa Big: Narafala wei wea staka young wan gohed for shaen olsem laet hem long wei for mekem ministry bilong olketa kamap moa big. Bihaen hem finisim hae skul, wanfala brata muv go long nara ples wea garem bigfala need for olketa Kingdom pablisa. Hem serve long wanfala smol kongregeson wea garem wanfala elder nomoa. Hem raet go long wanfala fren and hem sei: “Mi barava enjoyim assignment bilong mi long hia. Ministry long hia hem barava naes tumas! Mifala savve story witim pipol long evri haos for samting olsem 20 minute, from olketa laek herem evri samting wea mifala savve talem olketa. Bae hem gud tumas sapos evri young wan duim sem samting wea mi duim and kasem sem hapi feeling. No eni samting hem winim wei for iusim evri samting iumi garem for servem Jehovah.”
6. Wanem nao mekem iu barava tinghae long olketa young wan wea stap insaed kongregeson bilong iu?
6 Mifala barava tinghae long iufala olketa young wan wea gohed for shaen olsem laet insaed long world! (1 Thess. 2:20) Taem iu gohed for servem Jehovah witim full heart, soul, mind, and strong bilong iu, iu bae kasem “wan handred taems moa long disfala taem . . . and laef olowe long niu world wea bae kam.”—Mark 10:29, 30; 12:30.