Showimaot Iu Interest—Long Wei for Praisem Man
1 Trufala praise savve encouragem pipol, muvim olketa for duim samting, and mekem olketa hapi. Staka pablisa savve hao plande taem, wei for talem trufala praise hem mekem pipol willing for lisin long ministry. Hao nao iumi savve praisem pipol taem iumi storyim gud nius long olketa?
2 Lukluk Gud Long Olketa Samting: Bihaen Jesus Christ go bak long heven, hem lukim olketa gud samting wea sevenfala kongregeson long Asia Minor duim. (Rev. 2:2, 3, 13, 19; 3:8) Long sem wei tu, wei for showimaot iumi barava interest long pipol wea iumi meetim long ministry bae mekem iumi lukaotem olketa chance for praisem olketa. Olsem example, area raonem haos hem klin, dadi or mami showimaot hem lovem olketa pikinini, or iumi meetim man wea smile and sei hello. Evri samting hia mekem iumi garem olketa chance for talem praise. Waswe, iu luksavve and mekius long olketa chance olsem?
3 Lisin Gud: Taem iumi preach long pipol, encouragem olketa for talem tingting bilong olketa long wei for askem olketa kwestin wea fitim. Showimaot respect long wei for lisin gud long wanem olketa talem. (Rom. 12:10) Maet bae iu herem samting wea bae givim iu chance for praisem hem, and wea bae mekem iu fit for storyim go moa datfala samting wea iutufala evriwan agree long hem.
4 Garem Fasin for Luksavve: Wanem nao iumi shud duim sapos man iumi story witim talem samting wea no followim wanem Bible talem? No talem hem datwan hem rong, bat sei thankiu for wei wea hem talem tingting bilong hem, and iu savve sei: “Mi lukim hao iu barava interest long disfala subject.” (Col. 4:6) Nomata sapos man hem argue, iumi savve praisem hem for wei wea hem barava interest long datfala subject. Gudfala wei for deal witim datwan maet muvim heart bilong man wea luk olsem hem strong for againstim gud nius.—Prov. 25:15.
5 For encouragem man, iumi mas talem trufala praise. Toktok olsem wea buildimap man hem mekhae long Jehovah, and maet mekem olketa narawan interest for herem message abaotem Kingdom.