“Faetem Nambawan Faet Bilong Faith”
1 Aposol Paul encouragem Timothy for “faetem nambawan faet bilong faith.” (1 Tim. 6: 12) Datwan nao samting wea Paul hem duim. Taem hem olo, hem talem hao hem faetem finis wanfala nambawan faet. (2 Tim. 4: 6-8) Hem barava strong for duim ministry, no fraet, and nating givap. Taem iumi followim example bilong hem, iumi savve feel sure tu hao iumi duim best bilong iumi long faet for Christian faith.
2 Iusim Strong wea Fitim: Paul waka hard long ministry. (1 Cor. 15:10) Iumi tu duim datwan long wei for lukaotem evriwan wea fit long territory bilong iumi. (Matt. 10:11) For mekem iumi fit for story witim samfala, maet iumi need for wekap early mekem iumi savve preach long olketa wea iumi meetim long road. Or maet iumi need for preach long aftanun or evening for meetim pipol bihaen olketa kasem bak long haos.
3 Iumi need for bossim iumiseleva and garem gudfala schedule for mekem iumi no leit taem iumi hipap witim buk study grup bilong iumi for field service. Olsem example, long samfala Bethel, samfala mas draev long trak for klosap 1 hour for share long ministry witim kongregeson bilong olketa long weekend. And tu, iumi tinghae long samfala pablisa and famili long kongregeson wea mas travel farawe bat evritaem olketa no leit. Hem barava fitim for iumi followim example bilong olketa hia wea waka hard and organize gud.
4 Iumi mas willing for go bak long eniwan wea interest. Nomata sapos man tekem buk or magasin long street or taem iumi duim enitaem witnessing, iumi need for raetem address bilong hem. Long wei olsem, iumi savve visitim hem moa for mekem kamap big interest bilong hem and trae for startim Bible study.
5 Evritaem Go Long Field Service: Paul hem duim evribit waka bilong hem for preach, and hem duim evritaem. (Rom. 15:19) Waswe long iu, iu evritaem share long ministry? Waswe, iu go preach finis long disfala month? Olketa Kongregeson Buk Study Overseer interest for lukim evriwan insaed long grup share long ministry evri month. Olketa bae helpem iu for duim datwan.
6 Taem iumi followim example bilong Paul for sapotim evribit gud nius, iumi bae gohed for “faetem nambawan faet bilong faith.”