Why Iumi Evritaem Go Bak
1. Wanem kwestin nao kamap saed long preaching waka bilong iumi?
1 Long plande ples, iumi duim evritaem nomoa olketa territory bilong iumi. Iumi evritaem gohed for duim olketa sem haos, nomata haosholder hem talem iumi hao hem no interest. Why nao iumi gohed nomoa for visitim olketa wea bifor no acceptim iumi?
2. Wanem nao main reason why iumi gohed long ministry and no givap?
2 Love wea Iumi Garem for Jehovah and for Pipol: Main reason why iumi gohed long ministry and no givap hem bikos iumi garem love for Jehovah. Heart bilong iumi hem muvim iumi for gohed talem olketa narawan abaotem nambawan God bilong iumi. (Luke 6:45) Love wea iumi garem for Jehovah barava muvim iumi for obeyim olketa komand bilong hem and helpem olketa narawan for duim sem samting. (Prov. 27:11; 1 John 5:3) Wei wea iumi faithful for gohed strong long preaching waka hem no depend long wei wea pipol interest or nomoa. Nomata olketa aposol bifor kasem persecution, olketa gohed and “nating givap” for preach. (Acts 5:42) Taem pipol no willing for lisin, winim wei for letem datwan mekem iumi wikdaon, iumi gohed strong, and showimaot barava strongfala love bilong iumi long Jehovah.
3. Long wanem wei nao love wea iumi garem for pipol hem helpem iumi for gohed preach?
3 Iumi gohed long ministry tu bikos iumi lovem neiba bilong iumi. (Luke 10:27) Jehovah hem no laekem eniwan for dae. (2 Pet. 3:9) Nomata long olketa territory wea evritaem iumi duim, iumi still faendem olketa wea laek for servem Jehovah. Olsem example, long Guadeloupe, 1-fala long evri 56-fala pipol hem wanfala Jehovah’s Witness. Last year 214 nao baptaes. Klosap 20,000 nao attendim Memorial, wea datwan hem samting olsem 1-fala for evri 22 pipol long Guadeloupe!
4. Long wanem wei nao olketa territory hem change?
4 Wei wea Territory Change: Evritaem olketa difren pipol kam for stap long territory bilong iumi. Long next taem wea iumi visitim haos wea bifor no eniwan interest, wanfala difren member long famili, wea maet hem samwan wea no enitaem hem herem message bilong iumi bifor, hem openem door and lisin. Or maet iumi faendem difren pipol nao stap long datfala haos, and olketa interest. Olketa pikinini wea dadi and mami les for herem message abaotem Kingdom savve lusim famili taem olketa growap and stap long difren haos. Olketa hia maet willing for herem Kingdom message.
5. Maet wanem nao savve mekem pipol for interest?
5 Pipol tu savve change. Aposol Paul bifor hem ‘man for againstim God and persecutim pipol and hem man wea bighed.’ (1 Tim. 1:13) Long sem wei, plande wea distaem servem Jehovah nating interest long truth bifor. Maet samfala barava againstim datfala gud nius tu. Taem living bilong disfala world hem gohed for change, maet samfala pipol wea bifor olketa againstim iumi or no interest, bae laek for lisin. Olketa narawan maet moa willing for lisin bihaen bigfala trabol kasem olketa, olsem samwan long famili hem dae, lusim waka for selen, problem saed long selen, or maet problem saed long health.
6. Why nao iumi mas gohed for preach witim strong?
6 Evri samting long world hem gogo daon, bat preaching and teaching waka bilong iumi hem gohed for kamap moa big. (Isa. 60:22) Dastawe, iumi gohed for preach witim strong and waka hard for keepim gudfala tingting. Maet next man wea iumi story long hem bae lisin. Iumi need for gohed for preach! ‘Wei for duim olsem bae sevem iumiseleva and olketa wea lisin long iumi.’—1 Tim. 4:16.