Wanem Nao Future Bilong Disfala World?
Evriwea long world, olketa bigfala problem and olketa samting wea mekem man seke hem happen evriday! Diswan minim wanem?
WEI WEA MAN STAP SEF: Olketa bomb bosta long olketa market. Olketa sutim dae olketa teacher and student long skul. Olketa stealim baby taem parents luk difren. Nomata daylaet olketa attakim and steal from olketa woman and olo man.
OLKETA RELIGION: Church sapotim sekson wea faet insaed war. Bigman bilong church join insaed wei for killim dae pipol from nara tribe or kantri. Priest spoelem olketa young wan saed long sex; church trae for haedem. Pipol les for go long church; olketa mas sellim olketa church haos.
ENVIRONMENT: Olketa bigfala bisnis katemaot evri tree from bush. Poor pipol katem evri tree for firewood. Wata insaed graon kamap dirty, man no fit for drinkim. Pollution and olketa niu kaen wei for fishing mekem namba bilong olketa fish barava katdaon. Air kamap dirty mekem man no savve brith gud.
WAKA FOR SELEN: Long samfala part long Africa pei bilong wanfala man hem samting olsem $480 (U.S.) insaed wan year. From olketa man wea ranem bisnis greedy fogud and tekem tumas selen from company, staka company klos daon wea mekem planti thousand pipol lusim waka bilong olketa. Raverave fasin mekem pipol lusim evri selen bilong olketa.
NO INAF KAIKAI: Samting olsem 800,000,000 pipol evriwea long world no garem inaf kaikai.
WAR: Insaed mek-20 century, winim 100,000,000 pipol dae from war. Olketa nuclear weapon stap wea fit for killim dae planti moa pipol winim evriwan long full world. Olketa war savve kamap midolwan pipol long sem kantri. Terrorism gohed for spred kasem full world.
SIK WEA ISI FOR SPRED AND OLKETA NARAKAEN SIK: Start long 1918, datfala Spanish flu killim dae 21,000,000 pipol. Distaem AIDS kamap “barava nogud sik winim eni nara sik long full history bilong olketa man.” Cancer and sik bilong heart mekem bigfala sorre kamap evriwea long world.
Taem iu herem olketa nius olsem, ting raonem go moa. Waswe, olketa samting hia wea happen, olketa didifren samting? Or waswe, olketa part long samting wea happen evriwea long world wea barava important for iumi minim?
[Box/Piksa long page 5]
Waswe, God Barava Tingim Iumi?
From olketa barava feelim hevi from nogud samting wea happen or from samwan wea olketa lovem hem dae, planti pipol maet ting why nao God letem olketa samting olsem happen.
God barava tingim iumi. Hem showim iumi stretfala wei for followim and givim iumi help wea iumi needim distaem. (Matthew 11:28-30; 2 Timothy 3:16, 17) Hem duim samting finis for aotem evribit raf fasin, sik, and dae. Olketa samting wea hem givim showimaot hem barava tingim pipol, no pipol bilong wanfala kantri nomoa bat from evri kantri, tribe, and languis.—Acts 10:34, 35.
Waswe, iumi tingim God? Waswe, iu savve hu nao Creator bilong universe and earth? Hu nao nem bilong hem? Wanem nao hem planim? Hem ansarem olketa kwestin hia insaed Bible. Hem talem iumi wanem nao hem duim for finisim raf fasin, sik and dae. For kasem gud samting from diswan, wanem nao iumi need for duim? Iumi need for lane abaotem hem and olketa purpose bilong hem. Iumi hard for kasem eni gud samting from wanem hem givim sapos iumi no showimaot faith long hem. (John 3:16; Hebrews 11:6) And tu, iumi need for obeyim evriting hem askem iumi for duim. (1 John 5:3) Waswe, iu barava tingim God dastawe iu want for obeyim hem?
For minim why God letem olketa samting wea happen distaem for gohed, iumi mas minim wanfala important kwestin. Bible explainim diswan. Iu savve readim moa samting abaotem diswan long page 15 bilong disfala brochure.