Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • kp pp. 9-11
  • Laef Bilong Iu Lead Go for Wanem?

Disfala sekson no garem eni video.

Sorre, disfala video no savve plei distaem.

  • Laef Bilong Iu Lead Go for Wanem?
  • Gohed for Luk Aot!
Gohed for Luk Aot!
kp pp. 9-11

Laef Bilong Iu Lead Go for Wanem?

• Staka pipol busy nomoa long olketa samting insaed evriday living, dastawe olketa no tingim wanem nao laef bilong olketa lead for hem.

• Bible helpem iumi for savve long olketa nambawan samting long future. Hem warnim iumi tu hao long future, evri samting long disfala earth bae change. For iumi kasem gud samting and for missim trabol, iumi need for duim samting kwiktaem.

• Samfala pipol savve wanem nao Bible hem talem and olketa trae for followim, bat olketa savve letem olketa wari long laef leadim olketa go difren.

• Waswe, iu hapi long wanem iu duim long laef bilong iu distaem? Taem iu planim olketa samting wea iu duim, waswe, iu tingim firstaem hao nao datwan bae affectim olketa goal bilong iu long laef?

[Box/Piksa long page 9]

Wanem Nao Barava Important Long Iu?

Which wan long olketa samting hia nao moa important long iu? Markem each wan for showimaot which wan hem moa important.

Staka long olketa samting hia hem important samting long laef, bat sapos iu mas chus, wanem nao bae iu putim olsem first wan? mek-tu wan? and samting olsem.

․․․ Hapitaem

․․․ Waka bilong mi for selen

․․․ Health bilong mi

․․․ Hapi bilong miseleva

․․․ Marit partner

․․․ Parents bilong mi

․․․ Olketa pikinini bilong mi

․․․ Naesfala haos, naesfala kaleko

․․․ Mi mas winim narawan long eni samting wea mi duim

․․․ Worship bilong mi for God

[Box long page 10, 11]

Waswe, Olketa Samting wea Iu Chusim Hem Mekem Iu Kasem Wanem Iu Laekem?

TING RAONEM OLKETA KWESTIN HIA

HAPITAEM: Waswe, hapitaem wea mi chusim hem mekem mi feel gud bihaen? Waswe, mi duim kaen hapitaem wea putim health bilong mi long danger or maet mekem mi cripple? Waswe, hem hapitaem wea mekem mi feel gud for lelebet taem nomoa bat bihaen hem savve mekem mi kasem bigfala hevi wea bae gohed for longfala taem? Nomata sapos hapitaem wea mi chusim hem gud nomoa, waswe, mi iusim tumas taem for datwan and gogo mi no duim samfala nara samting wea moa important?

WAKA BILONG MI FOR SELEN: Waswe, hem samting for provaedem olketa need bilong mi, or samting wea mi iusim evri strong bilong mi for hem? Waswe, hem mekem mi waka hard tumas gogo hem spoelem health bilong mi? Waswe, mi moa willing for waka ovataem winim wei for garem taem witim famili bilong mi? Sapos boss bilong mi askem mi for duim samting wea againstim wanem mi savve hem stret or for duim waka wea evritaem mekem mi no garem taem for olketa spiritual samting, waswe, bae mi duim datwan mekem mi no lusim datfala waka?

HEALTH BILONG MI: Waswe, mi no warim health bilong mi, or mi lukaftarem gud? Waswe, hem samting wea mi tok abaotem olowe? Waswe, wei wea mi lukaftarem health bilong mi showimaot mi tingim famili bilong mi?

HAPI BILONG MISELEVA: Waswe, hem nao first samting wea mi tingim? Waswe, hapi bilong mi kam first winim hapi bilong famili bilong mi? Waswe, wei wea mi aftarem hapi hem fitim man wea worshipim tru God?

MARIT PARTNER: Waswe, mi tingim marit partner bilong mi long taem wea hem fitim mi nomoa? Waswe, mi showimaot honor long marit partner bilong mi, from datwan hem samting wea hem fit for kasem? Waswe, wei wea mi biliv long God hem affectim hao mi ting long marit partner bilong mi?

PARENTS BILONG MI: Sapos mi pikinini, waswe, mi obeyim parents bilong mi—⁠ansarem olketa long wei wea showimaot respect, duim waka wea olketa givim mi for duim, kasem bak haos long taem olketa markem, no kaban witim pipol or duim samting wea olketa warnim mi finis for no duim? Sapos mi bigman finis, waswe, mi showimaot respect taem parents story long mi, mi givim help wea olketa needim? Waswe, wei wea mi deal witim tufala hem followim kaonsel long Word bilong God, or mi duim long wei and long taem wea fitim mi nomoa?

OLKETA PIKININI BILONG MI: Waswe, mi ting strong for teachim olketa pikinini bilong mi olketa stretfala fasin, or waswe, mi expectim skul nao for duim datwan? Waswe, mi savve spendem taem witim olketa pikinini bilong mi, or mi letem olketa toy, TV, or computer nao for olketa busy long hem? Waswe, mi disciplinem olketa pikinini bilong mi evritaem olketa no followim samting God teachim, or mi duim datwan nomoa long taem wea mi kros long olketa?

NAESFALA HAOS, NAESFALA KALEKO: Wanem nao muvim tingting bilong mi saed long lukluk bilong miseleva and olketa samting wea mi garem? Waswe, wei for mekem nara pipol tinghae long mi nao muvim mi? mi laek helpem famili? or hem from mi worshipim God?

MI MAS WINIM NARAWAN LONG ENI SAMTING WEA MI DUIM: Waswe, mi ting hem important for mi mas duim gud evriting? Waswe, mi laekem mi nao mas winim narawan long evriting? Waswe, mi feel nogud sapos narawan nao winim mi?

WORSHIP BILONG MI FOR GOD: Waswe, feeling for God acceptim mi hem moa important long mi winim for marit partner, pikinini, parents, or boss acceptim mi? For mekem mi kasem gud living, waswe, mi bae putim service bilong mi for God olsem mek-tu samting?

TINGTING GUD RAONEM KAONSEL BILONG BIBLE

Insaed laef bilong iu, wei for worshipim God hem hao important?

Ecclesiastes 12:13: “Fraet long trufala God and obeyim olketa komandment bilong hem. From diswan nao hem samting man mas duim.”

ASKEM IUSELEVA: Waswe, laef bilong mi showimaot mi garem datkaen tingting? Waswe, samting mi duim long haos, wakples, or skul hem followim olketa komandment bilong God? Or waswe, olketa nara samting wea mi interest long hem or olketa hevi bilong living nao mekem mi no garem taem for God?

Wanem kaen wei for fren nao iu garem witim God?

Proverbs 3:5, 6: “Trust long Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae stretem gogo bilong iu.”

Matthew 4:10: “Iu mas worshipim Jehovah, God bilong iu, and iu mas duim holy service long hem nomoa.”

ASKEM IUSELEVA: Waswe, mi garem kaen feeling olsem for God? Waswe, olketa samting wea mi duim evriday, and tu, wei wea mi deal witim olketa problem, hem showimaot mi garem kaen trust and love olsem?

Wei for readim and studyim Bible hem hao important long iu?

John 17:3: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.”

ASKEM IUSELEVA: Waswe, tingting bilong mi abaotem wei for readim and ting raonem Word bilong God hem showimaot mi really bilivim toktok insaed disfala scripture?

Wei for attendim olketa meeting bilong Christian kongregeson hem hao important long iu?

Hebrews 10:24, 25: “And iumi mas tingim and muvim each other for showimaot love and gudfala waka, no lusim wei for hipap tugeta, . . . and duim long bigfala wei moa taem iufala luksavve datfala day hem kam klosap.”

Psalm 122:1: “Mi hapi tumas taem olketa sei long mi: ‘Iumi go long haos bilong Jehovah.’”

ASKEM IUSELEVA: Waswe, laef bilong mi showimaot mi tinghae long disfala kaonsel wea stap insaed Word bilong God? Insaed month wea just go pas, waswe, mi missim eni Christian meeting bikos mi letem nara samting for kamap moa important?

Waswe, iu strong for tekpart insaed waka for talem nara pipol abaotem God and purpose bilong hem?

Matthew 24:14: “Olketa bae talemaot disfala gud nius bilong kingdom evriwea long earth for givim witness . . . , and then end bae kam.”

Matthew 28:19, 20: “So go and mek disaepol long pipol bilong evri nation, . . . teachim olketa for duim evri samting wea mi komandim long iufala.”

Psalm 96:2: “Singsing long Jehovah, blessim nem bilong hem. Long evriday talemaot gud nius bilong salvation wea kam from hem.”

ASKEM IUSELEVA: Waswe, disfala waka nao barava important insaed laef bilong mi? Waswe, wei wea mi tekpart long disfala waka hem showimaot mi really biliv iumi stap insaed wanfala barava important taem?

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem