Wakabaot Olsem Man wea Wise
1 Taem Jesus askem fofala fisherman for kamap olketa follower bilong hem, olketa no weit for narataem bat “stretawe olketa . . . followim hem.” (Matt. 4:18-22) Taem Saul from Tarsus kamap disaepol and eye bilong hem kamap gud moa, hem no rest firstaem bat “stretawe insaed olketa synagogue hem start for preach abaotem Jesus.” (Acts 9:20) No eniwan savve stopem gogo bilong taem; sapos hem go finis, hem no savve kam bak moa. Dastawe hem important for iumi ‘wakabaot olsem man wea wise’ long hao iumi iusim taem bilong iumi.—Eph. 5:15, 16.
2 Wei wea Seknomoa Samting Hem Happen: Olketa chance wea iumi garem distaem for servem Jehovah maet no kamap long narafala taem. (Jas. 4:14) No eniwan free from “wei wea seknomoa samting hem happen.” (Eccl. 9:11) And tu, long disfala world iumi no savve missim “olketa day bilong trabol” wea iumi kasem taem iumi gogo for olo and wea mekem iumi no fit for duim staka samting for servem Jehovah. (Eccl. 12:1) Dastawe hem no wise for delay for dedicate long God or weit for kasem gudfala living bifor iumi mekem ministry kamap moa big. (Luke 9:59-62) Abraham kasem peace taem hem olo. Taem hem dae hem “olo and satisfae” from hem iusim laef bilong hem long wisefala wei, and hem faithful evribit long Jehovah.—Gen. 25:8.
3 Taem Hem Short: Iumi tu mas iusim taem bilong iumi long wisefala wei bikos “taem wea stap yet hem short.” (1 Cor. 7:29-31) Klosap nao disfala nogud world bae finis. Olketa chance wea iumi garem for share insaed bigfala waka for hipimap olketa sheepsheep long taem bilong “harvest bilong earth” bae finis. (Rev. 14:15) Iumi mas careful for no letem olketa wari and olketa samting wea savve pullim tingting bilong iumi for spoelem taem bilong iumi for duim preaching. (Luke 21:34, 35) Bae iumi barava satisfae taem iumi tingting bak long wei wea iumi share evribit insaed long harvest waka!
4 Iumi mas gohed for lukaot gud distaem mekem iumi share insaed long disfala nambawan waka wea iumi kasem. Iumi mas disaed strong for duim evri samting wea iumi savve duim for servem Jehovah “taem hem ‘Tuday’ yet.” (Heb. 3:13) Taem iumi duim olsem, hem showimaot iumi barava wise, bikos “man wea duim will bilong God bae stap for olowe.”—1 John 2:17.