Keakea Long Spiritism and Olketa Kastom Biliv
1 Spiritism and olketa kastom biliv savve kontrolem man long barava nogud wei. Tingim samfala example. Pipol bilivim hao no eniwan dae bikos hem garem sik cancer, TB, or eni nara sik. Olketa ting samwan nao iusim kastom long man for mekem hem sik or dae. Kastom nem wea olketa iusim for storyim diskaen paoa hem kelema, vele, meibok, and aru’a. From olketa relative fraet olketa go lukim wanfala kastom man wea iusim olketa narakaen magic olsem lilifono, or fa’agwari for protectim pipol. From pipol bilivim hao olketa samting olsem skin bilong samfala tree, olketa kastom ston, ginger plant, olketa narakaen leaf and stik savve helpem or spoelem man, maet wanfala kastom man redyim medicine from samfala long olketa samting hia. Maet pipol savve werem ginger olsem nekles, or plantim raonem haos, and raonem ples for worship tu for protectim olketa!
2 Maet pipol fraet taem olketa herem krae bilong korokoro, kwaiara, and ko’a bird hem change, from olketa tingse nogud samting bae happen. Taem man lukim wanfala white cockatoo long dream bilong hem bihaen samwan long famili dae or kasem bigfala sik, hem iusim datwan for savve long hu nao mekem datwan happen. Samting wea maet kamaot from diswan nao hem wei for askem compensation or fasin for pei bak, nomata sapos datfala man hem no guilty.
3 Bifor olketa famili lusim garden bilong olketa, olketa savve singaotem nem bilong wanfala relative wea dae finis mekem hem savve protectim olketa taem olketa wakabaot go bak long vilij bilong olketa. Taem olketa wakabaot go pas long area bilong wanfala stranger, bae olketa singaot olsem: “Mifala nomoa ia!” Olketa hope olketa demon wea protectim datfala area bae no attakim olketa.
TINGTING BILONG GOD HEM NATING CHANGE
4 From pipol followim diskaen wei from taem olketa smol yet, olketa barava biliv strong long datwan. From iumi laek for mekem Jehovah hapi, iumi mas savve long tingting bilong God abaotem olketa samting hia. Tingting bilong God, wea hem talem klosap 3,500 year go finis, hem nating change. God hem givim disfala komand long olketa Israelite wea hem mekem covenant witim olketa: “Taem iufala go insaed long ples wea God bilong iufala Jehovah hem givim long iufala, iufala mas no lanem olketa nogud samting wea pipol long olketa nation hia duim. No eniwan wea bonem son or dota bilong hem long fire, eniwan wea duim divination, or man wea iusim magic or eniwan wea lukaotem saen or iusim demon paoa, or man wea iusim kastom long nara pipol or eniwan wea go lukim man wea story witim olketa spirit or wea talem future or eniwan wea laek story witim olketa wea dae finis, shud stap midolwan long iufala. From Jehovah barava heitim evriwan wea duim olketa samting hia, and from olketa nogud samting hia nao God bilong iufala Jehovah hem raosem pipol hia from datfala ples wea iufala bae go long hem. Iufala mas showimaot long God bilong iufala Jehovah hao iufala no garem blame.”—Deuteronomy 18:9-13.
5 Nomata man tingse hem garem gudfala reason for askem help from samwan wea iusim kelema, vele, meibok, and aru’a, or so’ofia, lilifono, and fa’agwari, really, samting hem duim nao hem for go lukim man wea story witim olketa spirit. Olketa man olsem duim magic and iusim kastom long man. Wei for tingse olketa bird olsem korokoro, kwaiara, and ko’a givim wanfala saen abaotem nogud samting wea happen or wea bae happen, or for iusim wanfala white cockatoo wea man lukim insaed dream for faendaot hu nao poisonim samwan, hem wei for “lukaotem saen.” Waswe for singaotem nem bilong famili member wea dae finis or for sei: “Mifala nomoa ia!”? Datwan hem wei for askem man wea dae finis for protection. God hem sei olsem: “Jehovah barava heitim evriwan wea duim olketa samting hia.”
TINGIM OLKETA WARNING BILONG GOD
6 Wanem nao iu shud duim sapos tribe, relative, or maet wanfala Christian brata tu hem trae switim iu for duim spiritism or followim olketa kastom biliv? Wei for tingim olketa warning bilong God, olsem datwan long 1 Corinthians 10:20-22, bae givim iu strong for againstim olketa. Datfala scripture hem sei olsem: “Samting wea mi talem nao hem hao samting wea olketa nation sakrifaesim, olketa sakrifaesim long olketa demon, no long God; and mi no laekem iufala for share witim olketa demon. Iufala kanduit drink long kap bilong Jehovah and kap bilong olketa demon; iufala kanduit kaikai long ‘tebol bilong Jehovah’ and tebol bilong olketa demon. Or waswe, ‘iu mekem Jehovah for jealous’?” Man wea bihaenem spiritism and kastom biliv hem Satan and olketa demon bilong hem. Olketa laekem tumas for trikim pipol witim olketa laea and for mekem olketa fraet. Goal bilong olketa hem for laea tu long pipol bilong God wea faithful, wea diswan bae mekem God rejectim and judgem olketa. Olketa tru Christian no savve duim olketa samting wea join witim spiritism and olketa kastom biliv olsem and long semtaem servem Jehovah!—Readim 1 Kings 18:21.
7 Satan bae no givap for trae mekem iu foldaon insaed trap bilong spiritism and olketa kastom biliv wea join witim datwan. Aposol Paul hem talem disfala warning for iumi: ‘Iumi insaed wanfala faet againstim olketa wicked spirit.’ (Ephesians 6:12) Nomata olsem, iu savve winim disfala faet. Aposol Paul hem showim wanem savve helpem iumi taem hem sei: “Winim evri samting, karem bigfala shield bilong faith mekem iufala savve stopem olketa arrow bilong fire bilong [Satan].” (Ephesians 6:16) Taem iu mekem faith bilong iu kamap moa strong, bae iu win for stopem samfala long “olketa arrow bilong fire” hia, wea hem nao spiritism and olketa kastom biliv.
STRONGIM FAITH BILONG IU EVRIDAY
8 Wei for studyim Bible savve strongim faith bilong iu. Sapos wanfala tree hem garem strongfala rut, datfala tree bae strong tu. Olsem tu, wei wea faith bilong iu strong hem barava depend long faondeson bilong hem, wea hem nao stretfala savve abaotem Word bilong God insaed long Bible. Sapos iu readim and studyim Bible evriday, and traem best for ting raonem samting wea iu readim, faith bilong iu bae kamap strong. Olsem wanfala strong tree, faith olsem bae protectim iu from olketa samting wea join witim spiritism and kastom biliv.—1 John 5:5.
9 Wanem nao nara samting wea iu savve duim? Aposol Paul hem raet olsem: “Gohed evritaem for prea long God thru long spirit for askem and talem olketa difren samting, and tu, prea strong from heart.” (Ephesians 6:18) From iu stap long ples wea spiritism and kastom biliv hem big tumas, hem barava important for prea strong long Jehovah for helpem iu againstim olketa samting hia. Hem important tu for iusim nem bilong Jehovah taem iu prea. (Proverbs 18:10) So iu shud gohed prea long God for ‘sevem iu from datfala wicked wan,’ wea hem nao Satan. (Matthew 6:13) Jehovah bae ansarem prea bilong iu wea kam from heart.—Psalm 145:19.
10 Nomata Satan and olketa demon bilong hem strong, Jehovah nao Olmaeti God. From hem Nambawan God wea garem love for iumi, bae hem protectim iu sapos iu trustim hem evribit. (Hebrews 13:5b, 6) Long taem wea God markem, hem bae distroem Satan and olketa demon bilong hem. Go kasem datfala taem, keakea long spiritism and olketa kastom biliv. Luksavve long hu nao startim olketa kaen kastom olsem and no fraet for talem disfala toktok wea Jesus tu talem: “Satan, iu go nao! From olketa scripture talem finis, ‘Iu mas worshipim God bilong iu, Jehovah, and iu mas servem hem nomoa.’”—Matthew 4:10.