Leta From Governing Body
Dear Olketa Witness Bilong Jehovah:
Iumi garem privilege for kamap pipol wea garem nem bilong Haefala Ruler bilong universe, Jehovah! Datfala nem hem stap for olowe, no savve finis, and hem difren from eni nara nem. Jehovah nao mekem iumi for garem nem bilong hem, and start long year 1931, pipol luksavve iumi garem datfala nambawan nem. (Isa. 43:10) Iumi hapi for talemaot iumi Olketa Jehovah’s Witness.
Satan evritaem trae for mekem pipol for no savve long nem bilong God. Satan mekem pipol long disfala world for no laekem datfala nem Jehovah. Bigfala Babylon wea hem nao evri false religion, heitim nem bilong God and aotem from staka Bible transleison. Bat Jesus mekhae long nem bilong Dadi bilong hem, taem hem iusim nem bilong dadi bilong hem long start bilong prea wea hem teachim long olketa wea followim hem. Hem sei: “Iufala mas prea long wei olsem: ‘Dadi bilong mifala long heven, mifala laekem nem bilong iu for stap holy.’” (Matt. 6:9) Bihaen, taem hem prea long Dadi bilong hem, hem sei: “Mi talemaot nem bilong iu long olketa man long world wea iu givim long mi.” (John 17:6) From iumi laek for followim example bilong Jesus, iumi disaed strong for gohed talemaot nem bilong Jehovah evriwea long world.
Yeartext long 2009 sei, “Duim gud disfala waka for talemaot gud nius,” datwan strongim iumi for barava duim gud ministry bilong iumi. (Acts 20:24) Iumi savve Jehovah barava blessim waka wea iumi duim long last service year. Iumi duim bigfala waka for givim glory and honor long nem bilong Jehovah evriwea long world. Niufala namba bilong 7,313,173 pablisa gohed for duim preaching waka, and tu for teachim olketa wea hambol wea laek for savve long ansa long olketa problem wea kamap evriday. Long Memorial long dae bilong Christ wea 18,168,323 nao hipap long hem, datwan showimaot maet staka million pipol stap yet wea laek savve long nem bilong Jehovah bifor disfala rabis world hem finis.
Sapos Jehovah letem preaching waka for gohed yet, iumi bae gohed strong for preachim gud nius abaotem Kingdom long eni ples wea iumi meetim pipol long territory bilong iumi. (Matt. 24:14; Mark 13:10) Hem gud for iumi traem best for talemaot nem bilong Jehovah and plan bilong hem long staka pipol taem iumi preach long haos tu haos, street witnessing, raetem leta, telephone witnessing, or enitaem witnessing.
Iumi savve, klosap nao Jehovah bae duim samting for mekhae long nem bilong hem. (Ezek. 36:23) Klosap nao olketa wea spoelem datfala nem bae no duim eni samting moa. Datwan bae hem wanfala nambawan taem for evri pipol bilong Jehovah wea faithful, wea talemaot nem bilong Jehovah and mekhae long wei wea hem fit for rul!
Love wea Jehovah garem for pipol bilong hem, hem barava showaot klia long “Gohed for Lukaot!” Distrik and International Convention wea kamap long 2009 long staka ples long world. Olketa convention hia, hem important samting long history bilong iumi Olketa Jehovah’s Witness, wea helpem iumi for luksavve hao iumi mas gohed lukaot for datfala day bilong Jehovah.—Mark 13:37; 1 Thess. 5:1, 2, 4.
Tru tumas, Jehovah hem kaen tumas long iumi and hem mekem iumi hapi. Hem mekem iumi leidaon long ples wea garem grass and hem showim iumi ples wea garem staka wata.—Ps. 23:1, 2; 100:2, 5.
Mifala savve Jehovah bae gohed blessim iufala taem iufala gohed for busy long waka bilong hem long olketa month wea bae kam!
Mifala sendem kam Christian love long iufala evri brata and sista evriwea long world,
Olketa brata bilong iufala,
Governing Body bilong Olketa Jehovah’s Witness