Redi Gud for Duim Return Visit

1. Hao nao Christian ministry long bifor bae kamap big?

¹ Jesus hem redyim gud olketa disaepol for preachim “gud nius bilong kingdom” long gudfala wei. (Matt. 4:​23; 9:​35) Jesus preach long Palestine nomoa taem hem lanem olketa hia. Bat bifor Jesus go long heven hem talem olketa hao Christian ministry bae kamap big, and ‘pipol long evri kantri bae kamap disaepol.’​—Matt. 28:19, 20.

2. Wanem nao iumi mas duim for obeyim toktok bilong Jesus ‘for mekem disaepol’?

² For duim datfala waka iumi mas go bak long pipol wea laek for lanem gud nius abaotem Kingdom bilong God and lanem olketa for obeyim evri samting wea Jesus talem. For duim gudfala return visit, iumi mas redi gud.

3. Wanem nao iu savve duim for garem return visit?

³ Hao for Duim: Samfala pablisa bihaen olketa story witim haosholder olketa askem wanfala kwestin and promis for go bak and storyim ansa. Olketa iusim toktok long Wanem Bible Teachim buk taem olketa duim datfala return visit wea diswan mekem wei for startim Bible study.

4. Why nao iumi no weitim olketa niu magasin bifor iumi duim wanfala return visit?

⁴ No weit go kasem taem olketa niu magasin kam bifor iumi go bak. Iumi savve storyim olketa magasin wea hem garem finis for mekem hem interest go moa.

5. Why nao hem gud for savve wanem for duim?

⁵ Savve Wanem for Duim: Bifor iu go bak, ting raonem samting wea iu storyim finis mekem iu tingim wanem moa iu laek for storyim. Maet iu laek storyim wanfala point long buk wea iu givim finis long datfala man. Or maet iu laek givim narafala buk wea storyim go moa samting wea iutufala storyim finis. Sapos iu askem finis wanfala kwestin, iu bae ansarem nao datfala kwestin. Trae for readim wanfala scripture long Bible wea strongim samting wea iutufala storyim.

6. Wanem nao iumi laekem olketa return visit for duim?

⁶ Samting wea Iumi Laek Duim: Iumi laek startim Bible study. Wanfala brata askem return visit sapos hem laek for studyim Bible, bat datfala man no laekem. Brata hia go bak witim olketa niu magasin and talem olsem, “Taem mifala kam, mifala laek for ansarem wanfala Bible kwestin for pipol.” Brata herem toktok wea man hia talem, and then hem readim wanfala scripture and wanfala paragraf long buk wea iumi iusim for duim Bible study. Gogo man hia kamap wanfala Bible study.

7. Hao nao wei for redi gud helpem iu finis for startim wanfala Bible study?

⁷ Iumi bae kasem gudfala samting sapos iumi redi gud for olketa return visit. Iumi bae barava hapi, and iumi savve helpem man wea “laek savve” for kasem laef olowe.​—Acts 13:48.

Wanem for Talem Abaotem Olketa Magasin

Wastoa Apr-June

“Waswe, iu tingse God hapi long evri religion? [Weit for hem ansa.] Hem gud for savve wanem nao God duim taem olketa Israelite followim religion bilong pipol wea stap raonem olketa. [Readim Ezekiel 6:6.] Page 9 long disfala magasin storyim disfala kwestin, ‘Waswe, Iumi Savve Worshipim God Long Eni Wei Nomoa?’” Lukim story long page 9.

Awake! June

“Maet iu agree hao taem olketa pikinini start for big hem barava hard for pikinini, dadi and mami. Waswe, iu ting disfala toktok long hia savve helpem olketa mami and dadi? [Readim James 1:​19. Weit for hem ansa.] Iu bae hapi for readim toktok wea kam from Bible wea disfala magasin storyim.”

The Watchtower July 1

“Iumi evriwan sorre taem wanfala wea iumi lovem hem dae. Waswe, iu tingse Bible savve helpem iumi long taem olsem? [Weit for hem ansa. Readim Psalm 55:22.] Disfala magasin storyim samfala samting wea Bible talem iumi for duim long taem olsem.”

Awake! July

“Olketa wea marit kasem bigfala hevi distaem, and gogo staka divorce tu. Waswe, iu ting marit savve gohed gud sapos tufala followim disfala advaes? [Readim Proverbs 12:18. Weit for hem ansa.] Disfala magasin storyim samfala nara toktok long Bible wea savve helpem olketa wea marit for strongim wei wea tufala fren gud.”