Wanfala Nambawan Waka
1. Wanem nao gohed distaem wea helpem pipol changem laef bilong olketa?
1 Olketa long first century barava hapi for lukim pipol wea sik kamap gud. (Luke 5:24-26) Distaem tu, iumi hapi for helpem pipol savve abaotem Jehovah. (Rev. 22:1, 2, 17) Iumi hapi for readim wei wea toktok bilong God and holy spirit helpem pipol changem laef bilong olketa! And iumi hapi go moa taem iumi share long disfala waka for duim olketa Bible study wea gohed gud.
2. Wanem hapi nao iumi savve kasem taem iumi lanem samwan abaotem truth?
2 Hu nao nem bilong God? Why nao hem letem wei for safa? Wanem nao Kingdom bilong God bae duim for olketa man? Iumi hapi taem iumi ansarem olketa kwestin hia, bat iumi hapi tu taem iumi lukim olketa wea iumi study witim olketa hapi for lanem truth. (Prov. 15:23; Luke 24:32) Taem Bible study gohed, maet hem start for iusim nem bilong Jehovah, kaleko and lukluk bilong hem start for kamap gud, hem no duim moa olketa rabis samting, and hem start for preach long olketa narawan. Sapos gogo hem dedicate and baptaes, hem bae kamap brata and samwan wea iumi savve waka tugeta witim. Olketa samting hia savve mekem man for hapi.—1 Thess. 2:19, 20.
3. Wanem nao iumi savve duim for startim wanfala Bible study?
3 Waswe, Iu Laek for Duim? Sapos iu laek for duim disfala nambawan waka, prea long Jehovah for garem wanfala Bible study, and duim samting followim wanem iu prea abaotem. (1 John 5:14) Preach long ples and taem wea iu savve meetim pipol. Evritaem wea fitim, offerim Bible study. (Eccl. 11:6) Taem iumi meetim man wea interest and iu story abaotem truth, go bak for helpem hem.—1 Cor. 3:6-9.
4. Why nao iumi barava laek for offerim olketa Bible study?
4 Staka pipol stap wea hangre and laek for duim samting wea stret. Hu nao bae helpem olketa for luksavve olketa needim God and for studyim Bible witim olketa? (Matt. 5:3, 6) Hem gud for iumi willing for finisim disfala waka for preach and helpem pipol for kamap disaepol bifor disfala waka hem finis.—Isa. 6:8.