Redyim Olketa Pikinini Bilong Iufala
1. Wanem nao olketa pikinini wea go long skul mas redi for hem?
1 Taem olketa pikinini bilong iufala go long skul bae olketa feisim samfala hard taem. Olketa bae garem chance tu for talemaot “olketa tru samting.” (John 18:37) Waswe, olketa redi?
2. For olketa pikinini bilong iufala redi, wanem nao olketa shud savve?
2 Waswe, pikinini bilong iufala minim why hem no stret for salutim flag, singsing for mekhae long kantri and mekhae long olketa heathen holiday? Waswe, olketa redi for deal witim hevi wea olketa bae kasem for go long big skul, frenim eniwan, and iusim alcohol or olketa drug? Waswe, olketa savve hao for explainim biliv bilong olketa or olketa just talem nomoa olketa samting hia hem againstim religion bilong olketa?—1 Pet. 3:15.
3. Wanem nao mami and dadi savve duim long taem bilong Famili Worship for redyim pikinini bilong olketa?
3 Taem Bilong Famili Worship: Maet samfala taem famili savve story tugeta long samfala problem wea olketa pikinini feisim long skul. Wei wea iufala storyim firstaem olketa problem wea savve happen long skul savve helpem olketa pikinini for redi. Iufala savve duim diswan long taem bilong Famili Worship. Maet iufala savve askem pikinini for talem wanem nao samfala samting wea olketa wari long hem taem olketa go long skul. Taem olketa pikinini big lelebet and minim samting moa, iufala savve storyim samfala samting wea iufala storyim finis. (Ps. 119:95) Maet iufala savve practice tu for act olsem teacher or nara student long skul. Lanem olketa pikinini bilong iufala hao for iusim Bible for givim ansa and for iusim olketa nara tul olsem Reasoning buk and tufala Young People Ask buk. Wanfala mami practice witim olketa pikinini long hao for story witim eni niu teacher wea olketa garem long skul for letem olketa teacher savve hao Olketa Jehovah’s Witness.—Lukim Wastaoa, December 15, 2010, page 3-5.
4. Wanem nao olketa mami and dadi wea wise bae duim?
4 Olketa hevi wea olketa Christian pikinini mas feisim long olketa last day distaem hem “hard tumas.” (2 Tim. 3:1) Dadi and mami wea wise bae trae for tingim olketa problem wea olketa pikinini savve feisim and redyim olketa for winim olketa problem hia. (Prov. 22:3) Olketa mami and dadi, waka hard for redyim pikinini bilong iufala for taem olketa go long skul.