Waswe, Iu Savve Go Preaching Long Olketa Sunday?
1. Wanem nao iumi savve lanem from wanem Paul and olketa wea waka witim hem duim long Philippi?
1 Tingim wanem nao Paul and olketa wea waka witim hem duim long Sabbath, wea hem nao day wea staka Jew long Philippi rest. Olketa visitim datfala taon long wanfala missionary gogo bilong olketa. Long tingting bilong olketa Jew, bae hem stret nomoa for Paul and olketa wea waka witim hem for rest from ministry bilong olketa long datfala day tu. Bat Paul and olketa brata hia savve olketa Jew hipap aotsaed long taon for prea, so olketa iusim datfala chance for preach long olketa. Paul and olketa brata hia hapi tumas taem Lydia lisin and evriwan long haos bilong hem olketa baptaes! (Acts 16:13-15) From staka pipol distaem savve rest long Sunday, hem gud tumas for iumi preach long olketa long datfala day!
2. Olketa wanem kaen hard taem nao pipol bilong Jehovah winim mekem olketa savve preach long Sunday?
2 Olketa No Givap for Preach Long Sunday: Long 1927, pipol bilong Jehovah kasem encouragement for iusim samfala taem long Sunday for duim ministry. Staka pipol againstim waka wea olketa duim. Police arrestim plande brata and sista long America bikos olketa duim datfala waka long Sunday wea hem Sabbath. Olketa sei iumi spoelem peace and iumi no garem license for salem samting. Bat pipol bilong Jehovah no givap. Long olketa year bihaen 1930, olketa organizem samfala big grup for hipap tugeta for duim preaching waka. Olketa pablisa from olketa kongregeson hipap tugeta and duim preaching waka. Long samfala taem, police arrestim olketa pablisa bat hem hard for olketa arrestim evriwan bikos olketa pablisa staka tumas. Waswe, iu tinghae long wanem olketa brata hia duim mekem iumi savve gohed for preach long Sunday?
3. Why nao Sunday hem gudfala day for duim preaching waka?
3 Nambawan Day for Preach: Staka pipol stap long haos long Sunday bikos olketa no waka. Plande taem olketa no busy tumas long Sunday. Samfala wea go long church savve laek for story abaotem God long datfala day. Sapos iumi garem kongregeson meeting long Sunday, iumi werem finis kaleko wea fitim for iumi duim ministry, so waswe sapos iumi plan for duim preaching waka bifor meeting or bihaen meeting? Iumi savve redyim lelebet kaikai for tekem witim iumi.
4. Wanem gud samting nao iumi savve happen sapos iumi iusim samfala taem long Sunday for duim preaching waka?
4 Sapos iumi iusim samfala taem long Sunday for duim preaching waka, iumi bae garem taem for rest tu. And taem iumi rest, iumi bae hapi bikos iumi duim waka wea Jehovah hapi long hem. (Prov. 19:23) Maet iumi meetim samwan olsem Lydia wea interest tumas for lisin!