Hao for Helpem Olketa wea No Savve Read Gud
1. Why nao hem no isi for studyim Bible witim olketa wea no savve read gud?
1 Olketa haosholder wea no savve read gud maet interest for lanem truth, bat maet olketa tingse olketa no fit for duim datwan from olketa tingse olketa mas readim Bible and olketa nara buk bilong iumi. Sapos iumi offerim Wanem Bible Teachim buk long kaen pipol olsem, maet olketa no acceptim datfala buk. Wanem nao iumi savve duim for helpem olketa for lanem truth? Iumi bae storyim samfala naes idea wea olketa pablisa from winim 20-fala kantri olketa traem finis for helpem olketa wea no savve read gud.
2. Wanem nao samfala buk wea iumi savve iusim for helpem olketa wea no savve read gud?
2 Sapos Bible student hem savve read lelebet or hem no savve read, maet firstaem iu savve iusim wanfala long tufala brochure hia, Followim Toktok Bilong God or Followim Toktok Bilong God Mekem Iu Laef Olowe. Wanfala pioneer long United States hem showim tufala brochure hia long haosholder and askem hem for chusim brochure wea hem laekem. Wanfala report from branch office long Kenya hem sei olketa brochure hia hem helpem pipol long Africa, bikos hem no wei bilong pipol long there for askem kwestin then story raonem samting bat olketa savve lanem samting from olketa story. Man wea skul gud maet hapi for read and ansarem olketa kwestin, bat man wea no skul gud maet hol bak for duim olsem. Sapos student savve read lelebet, staka pablisa laek for iusim wanfala long tufala brochure hia, Gud Nius From God! or Iu Savve Kamap Fren Bilong God! or maet datfala buk, Bible Story Buk Bilong Mi.
3. Taem iumi minim tingting bilong olketa wea no savve read, hao nao datwan savve helpem iumi for teachim olketa?
3 Praisem Olketa: Plande wea no savve read savve shame and maet ting daonem olketa seleva. Wanfala wei for helpem olketa for laek lanem truth hem for kaen and praisem olketa. Nomata pipol no savve read olketa savve lanem olketa samting tu. Hem important for showimaot respect long olketa. (1 Pet. 3:15) Olketa bae hapi for gohed lanem truth sapos olketa luksavve olketa start for fren witim God and kasem gud samting from datfala study. So hem gud for evritaem praisem olketa.
Olketa wea no savve read savve shame and maet ting daonem olketa seleva. Wanfala wei for helpem olketa for laek lanem truth hem for kaen and praisem olketa
4. Wanem nao iumi savve duim for encouragem olketa wea no savve read gud for prepare for study?
4 Encouragem Bible student for prepare nomata hem no savve read gud. Samfala pablisa long South Africa encouragem olketa student bilong olketa for askem fren or eniwan long famili wea savve read for helpem olketa for prepare. Wanfala pablisa long Britain helpem olketa student bilong hem for prepare. Hem savve givim buk bilong hem long student taem tufala studyim tu-thri paragraf for hem lukim seleva wei for markem olketa ansa bae mekem hem isi for talem ansa. Wanfala brata long India encouragem olketa student bilong hem for prepare long wei for lukluk gud long olketa piksa and ting raonem wanem olketa lukim bifor tufala duim next study.
5. Wanem nao iumi savve duim for showimaot iumi patient witim student wea no savve read gud?
5 Mas Patient: Nomata wanem pablikeson nao iu iusim, helpem Bible student for minim gud olketa main point. Taem iu start for study witim hem, maet hem gud for study for 10 go kasem 15 minute nomoa. Hem gud for no studyim staka paragraf. Sapos student hem read slow, iu mas patient witim hem. Taem hem start for tinghae long Jehovah datwan savve helpem hem for traem best bilong hem for read gud. For helpem student for fren gud witim Jehovah, hem gud for iu invaetem hem for attendim olketa meeting start long firstaem wea iu study witim hem.
6. Wanem nao iumi savve duim for helpem man lane for read?
6 Sapos olketa Bible student lane for read, datwan bae helpem olketa for fren witim God. (Ps. 1:1-3) Staka pablisa iusim datfala buk, Waka Hard for Read and Raet for helpem student for lane for read. Olketa savve duim olsem for tu-thri minute bihaen each study. Sapos student hem laek for givap, iu savve storyim olketa samting wea hem savve finis hao for duim for encouragem hem. Talem hem Jehovah bae blessim hard waka bilong hem, and encouragem hem for prea long Jehovah for helpem hem. (Prov. 16:3; 1 John 5:14, 15) Samfala pablisa long Britain encouragem olketa Bible student bilong olketa for markem olketa goal wea fitim olketa. Maet firstaem olketa savve markem goal for savve gud long alphabet, then for lukaotem and readim samfala scripture, and gogo for readim olketa simpol Bible pablikeson. Taem iumi teachim pipol for read, hem important for encouragem olketa for tinghae long wei for read and for barava laek for duim datwan.
7. Why nao iumi mas no hol bak for storyim truth long olketa wea no savve read gud?
7 Jehovah no ting daonem olketa wea no skul gud. (Job 34:19) Jehovah lukaotem man wea garem gudfala heart. (1 Chron. 28:9) So no hol bak for storyim truth long olketa wea no savve read gud. Staka buk hem stap wea iumi savve iusim for startim Bible study. Then gogo, iumi savve iusim Wanem Bible Teachim buk, wea bae helpem Bible study for savve moa abaotem Bible.