“LUKAOTEM WEI FOR MINIM SAMTING”

Clayton: Justin, mi hapi iu laek for studyim Biblea and mi laek helpem iu for kasem ansa long olketa kwestin bilong iu. Last week iu askem wanfala kwestin abaotem Kingdom bilong God. Iu laek for savve why nao mifala Jehovah’s Witness sei Kingdom bilong God hem start for rul long 1914.

Justin: Ia, mi readim wanfala magasin bilong iufala wea sei Kingdom bilong God hem start for rul long 1914. Mi lelebet sapraes long datwan bikos iu sei evri samting wea iufala bilivim hem followim wanem Bible talem.

Clayton: Ia, hem stret.

Justin: Iu savve, mi readim full Bible bat mi no lukim eni scripture wea storyim 1914. So mi go lukluk long wanfala Bible long Internet and duim search for “1914,” bat disfala year no stap long datfala Bible tu.

Clayton: Hem barava gud iu readim full Bible. Datwan showimaot iu tinghae long toktok bilong God.

Justin: Long tingting bilong mi, Bible hem winim eni nara buk.

Clayton: Datwan hem tru. Hem gud iu iusim Bible for chekim wanem iu readim. Bible hem sei iumi shud “lukaotem wei for minim samting.”b So hem gud iu willing for duim research.

Justin: Ia, mi laek gohed for lane. Iu savve, mi readim nara samting abaotem 1914 long buk wea iumi studyim distaem. Hem storyim dream bilong wanfala king. Hem dream abaotem wanfala mamaeti tree wea olketa katem and then datfala tree hem grow moa, or samting olsem.

Clayton: Oh datwan. Hem wanfala profesi long Daniel chapter 4. Hem dream bilong Nebuchadnezzar, King bilong Babylon.

Justin: Ia hem nao ia. Tu-thri taem nao mi gohed readim datfala profesi, bat mi no minim hao hem join witim Kingdom bilong God and disfala year 1914.

Clayton: Nomata profet Daniel tu, hem no minim evri samting wea hem raetem!

Justin: Oh ia?

Clayton: Ia, lukim wanem hem talem long Daniel 12:8. Hem sei: “Mi herem, bat miseleva, mi no minim tu.”

Justin: Diswan hem no isi subject, iaman?

Clayton: Ia, hem no isi for minim disfala profesi. Nomata olsem, Daniel no minim bikos hem no taem yet for eniwan savve long evri samting abaotem olketa profesi wea hem raetem. Bat distaem, iumi savve minim staka samting abaotem datwan.

Justin: Why nao olsem?

Clayton: Iumi lukim wanem Daniel 12:9 talem. Hem sei: “Buk hia hem sat finis and toktok insaed hem mas stap haed go kasem taem bilong end.” So pipol bae minim olketa profesi hia long “taem bilong end,” wea hem staka year bihaen Daniel hem dae finis. Gogo bae iumi studyim hao Bible showimaot klia iumi stap long datfala taem distaem.c

Justin: Iu savve explainim kam disfala profesi for mi?

Clayton: OK.

DREAM BILONG NEBUCHADNEZZAR

Clayton: Firstaem, bae mi storyim wanem King Nebuchadnezzar dream abaotem. Then bae iumi storyim mining bilong datfala dream.

Justin: OK.

Clayton: Long datfala dream, Nebuchadnezzar hem lukim wanfala mamaeti tree wea tol go kasem skae. Then hem herem wanfala angel givim komand for olketa katem nao datfala tree. Bat hem sei for no aotem rut bilong hem. Bihaen “sevenfala taem” datfala tree bae grow moa.d Disfala profesi bae kamap tru tufala taem. Firstaem hem for King Nebuchadnezzar. Nomata datfala king garem bigfala paoa, hem stop for rul for “sevenfala taem,” olsem datfala tree no savve grow for sevenfala year. Iu savve wanem moa hem happen?

Justin: Nomoa, mi no tingim.

Clayton: Hem olraet. Bible showimaot Nebuchadnezzar lusim stretfala tingting bilong hem for sevenfala year. Long datfala taem, hem no fit for rul. Bat bihaen sevenfala taem, Nebuchadnezzar garem bak stretfala tingting and start for rul moa.e

Justin: OK, mi minim evri samting iu storyim finis. Bat hao nao diswan join witim Kingdom bilong God and datfala year 1914?

Clayton: Olsem mi talem, disfala profesi bae kamap tru tufala taem. Long firstaem hem taem King Nebuchadnezzar hem stop for rul. Long mek-tu taem, hem join witim rul bilong God. So mek-tu taem hia nao hem join witim Kingdom bilong God.

Justin: Hao nao iu savve long datwan?

Clayton: Samting wea profesi storyim nao showimaot datwan. Daniel 4:17 showimaot datfala profesi bae “mekem pipol savve datfala Barava Haefala God hem rul long kingdom bilong olketa man and hem givim datwan long eniwan wea hem laekem.” Waswe, iu lukim disfala toktok “kingdom bilong olketa man”?

Justin: Ia, hem sei “datfala Barava Haefala God hem rul long kingdom bilong olketa man.”

Clayton: Ia, so datwan showimaot datfala profesi hem no abaotem Nebuchadnezzar nomoa. Hem abaotem tu taem wea God bae rulim olketa man wea hem nao datfala “kingdom bilong olketa man.” Datwan bae hem mek sense taem iumi minim samting abaotem olketa nara profesi long buk bilong Daniel.

Justin: Olketa wanem samting?

MAIN THEME LONG BOOK BILONG DANIEL

Clayton: Buk bilong Daniel garem wanfala main theme. Staka taem hem story abaotem Kingdom bilong God wea Son bilong God, Jesus, bae rul long hem. Olsem example, iumi lukim Daniel 2:44. Plis, iu readim kam.

Justin: OK. Hem sei: “Long taem bilong olketa king hia, God long heven bae startim wanfala kingdom wea bae nating savve finis. And bae no eni pipol moa tekova long datfala kingdom. Datfala kingdom bae smasem and finisim evri gavman hia, and hem nomoa bae stap for olowe.”

Clayton: Thankiu. Waswe, iu tingse disfala scripture story abaotem Kingdom bilong God?

Justin: Ahh. Mi no savve.

Clayton: Lukim, hem sei datfala Kingdom “bae stap for olowe.” Kingdom bilong God savve stap for olowe, bat hard for eni gavman bilong man stap for olowe, iaman?

Justin: Ia, iu tok tru.

Clayton: Iumi savve lukluk long nara profesi long buk bilong Daniel wea story abaotem Kingdom bilong God. Hem stap long Daniel 7:13, 14. Datfala profesi hem story abaotem man wea bae rul long future. Hem sei: “Man hia kasem paoa for rul, hem kasem glory, and hem kasem wanfala kingdom, and pipol from evri kantri and languis bae stap anda long hem. Hem bae rul for olowe, and no eniwan bae spoelem kingdom bilong hem.” Waswe, eni toktok long hia hem join witim wanem iumi storyim?

Justin: Ia, hem story abaotem wanfala kingdom.

Clayton: Hem stret. Bat hem no storyim eni kingdom nomoa. Lukim hao datfala scripture sei “pipol from evri kantri and languis” bae stap anda long datfala Kingdom. Diswan minim datfala Kingdom bae rulim full world.

Justin: OK, so hem nao mining bilong datfala scripture.

Clayton: Lukim tu, datfala profesi hem sei: “Hem bae rul for olowe, and no eniwan bae spoelem kingdom bilong hem.” Iu tingse disfala profesi hem klosap semsem olsem profesi iumi just readim long Daniel 2:44?

Justin: Ia.

Clayton: Hao sapos iumi lukluk bak moa long wanem iumi storyim finis? Profesi long Daniel chapter 4 hem mekem pipol savve “datfala Barava Haefala God hem rul long kingdom bilong olketa man.” Diswan showimaot disfala profesi kamap tru long taem bilong Nebuchadnezzar and hem bae kamap tru long nara taem tu. And long buk bilong Daniel iumi savve lukim olketa profesi abaotem Kingdom bilong God wea Son bilong God bae rul long hem. So, iu tingse profesi long Daniel chapter 4 hem join witim Kingdom bilong God?

Justin: Luk olsem. Bat mi no savve hao datwan hem join witim 1914.

“SEVENFALA TAEM GO PAS”

Clayton: OK, bae iumi story moa abaotem King Nebuchadnezzar. Long firstaem datfala profesi kamap tru, tree hem piksarem datfala King. Hem stop for rul for sevenfala taem and hem lusim stretfala tingting bilong hem insaed sevenfala taem hia. Bihaen datwan hem kasem bak gudfala tingting and hem start for rul moa. Long mek-tu taem wea datfala profesi hem kamap tru, hem join witim wei wea God no iusim eniwan for rul for longfala taem.

Justin: Wanem nao iu minim?

Clayton: Long Bible hem sei olketa king bilong Israel wea rul long Jerusalem sidaon long “throne bilong Jehovah,”f wea minim Jehovah iusim olketa king hia for rulim pipol bilong hem. So taem olketa king hia rul, hem olsem God nao hem rul. Bat gogo staka long olketa king hia no obeyim God and staka wea olketa rulim tu duim sem samting. From olketa Israelite no obeyim God, long 607 B.C.E. God letem olketa long Babylon for distroem Jerusalem and tekem olketa Israelite go long Babylon. Start long datfala taem, Jehovah no garem eni king long Jerusalem, so God no iusim eniwan for rul for longfala taem. Hem nao mek-tu wei wea datfala profesi bilong Daniel abaotem tree hem kamap tru. Waswe, diswan hem klia long iu?

Justin: Yes.

Clayton: So 607 B.C.E. hem start bilong sevenfala taem wea God no iusim eniwan for rul. Bihaen sevenfala taem, God bae iusim narawan for rul, bat disfala man bae rul from heven. Long datfala taem nao, olketa nara profesi long Daniel wea iumi storyim finis bae kamap tru. So hem important for savve: Wanem taem nao sevenfala taem hia hem finis? Sapos iumi savve long ansa bilong datwan, iumi bae savve long wanem taem nao Kingdom bilong God hem start for rul.

Justin: Nogud hem long 1914?

Clayton: Ia, hem nao ia!

Justin: Bat hao nao iumi savve pruvim datwan?

Clayton: Taem Jesus duim ministry bilong hem long earth, hem helpem olketa disaepol for luksavve sevenfala taem no finis yet.g So sevenfala taem hia mas longfala taem bikos hem start staka handred year bifor Jesus kam long earth and hem gohed for staka handred year bihaen hem go bak long heven. Tingim tu, no eniwan minim olketa profesi long Daniel go kasem “taem bilong end.”h Klosap long year 1900 nomoa olketa Bible Student trae for minim olketa profesi hia and olketa nara profesi. Long datfala taem olketa luksavve sevenfala taem bae finis long year 1914. Start long datfala year olketa bigfala samting wea happen long world showimaot klia Kingdom bilong God hem start for rul long heven. So taem bilong end hem start long year 1914. Iumi storyim staka samting, iaman?

Justin: Ia, bae mi mas readim moa olketa scripture hia for minim gud wanem iumi storyim.

Clayton: Iu no wari, hem savve tek taem for minim olketa profesi hia. Bat mi hope story bilong iumi tufala helpem iu for luksavve samting wea mifala Jehovah’s Witness bilivim abaotem Kingdom hem kam from Bible.

Justin: Ia, mi tinghae tumas long wei wea evri samting wea iufala bilivim hem followim wanem Bible talem.

Clayton: And mi luksavve iu tu laek for duim olsem. Olsem mi talem finis, iumi storyim staka samting, bat maet iu garem samfala kwestin yet. Olsem example, iumi storyim sevenfala taem hem join witim Kingdom bilong God and datfala taem hem start long 607 B.C.E. Bat hao nao iumi savve sevenfala taem hia hem finis long 1914?i

Justin: Iaman, mi laek savve long datwan.

Clayton: Bible helpem iumi for calculatem sevenfala taem. Waswe, iu laekem for iumi storyim diswan long next taem?

Justin: Ia, hem gud.

TUFALA STORYIM MOA DREAM BILONG NEBUCHADNEZZAR

Clayton: Justin, hem gud for lukim iu moa. Mi luk forward for Bible study bilong iumi tuday.a Iufala stap gud nomoa?

Justin: Ia, mifala stap olraet.

Clayton: Gud. Lastaem, iumi tufala story abaotem why mifala Jehovah’s Witness bilivim Kingdom bilong God hem start for rul long 1914.b Iumi storyim tu samting wea pruvim datwan, wea hem nao datfala profesi long Daniel chapter 4. Waswe, iu tingim wanem datfala profesi hem story abaotem?

Justin: Ia, hem dream bilong King Nebuchadnezzar abaotem wanfala mamaeti tree.

Clayton: Hem nao ia. Long datfala dream, Nebuchadnezzar lukim wanfala mamaeti tree wea tol go kasem skae. Then hem herem wanfala angel bilong God givim komand for olketa katem nao datfala tree, bat hem sei for no aotem rut bilong hem. Bihaen “sevenfala taem,” datfala tree bae grow moa.c Iumi storyim tu hao datfala profesi kamap tru long tufala taem. Long firstaem hem kamap tru long hu?

Justin: Hem samting wea happen long Nebuchadnezzar. Hem lusim stretfala tingting bilong hem for sevenfala year.

Clayton: Hem stret. Nebuchadnezzar no savve rul for sevenfala year bikos long datwan. Bat long mek-tu taem wea datfala profesi hem kamap tru, rul bilong God nao bae no gohed for sevenfala taem. Olsem iumi storyim finis, datfala sevenfala taem hem start taem Jerusalem hem distroe long 607 B.C.E. Long end bilong datfala sevenfala taem God bae garem samwan wea stap long heven for rulim pipol bilong hem long earth. Datwan minim long end bilong sevenfala taem, Kingdom bilong God wea stap long heven bae start for rul. Iumi storyim finis wanem taem nao sevenfala taem hem start. So sapos iumi savve long haomas year nao hem insaed long datfala sevenfala taem, then iumi bae savve wanem taem nao Kingdom bilong God hem start for rul. Waswe, hem klia long iu?

Justin: Ia, disfala review hem helpem mi for tingim moa olketa point hia.

Clayton: Gud tumas. Distaem bae iumi storyim haomas year nao hem insaed datfala sevenfala taem. Bifor mi kam, mi lukluk moa long diswan for helpem mi for tingim olketa main point. Mi bae traem best bilong mi for explainim gud diswan.

Justin: OK.

LONG END BILONG SEVENFALA TAEM, OLKETA LAST DAY HEM START

Clayton: Long firstaem datfala profesi kamap tru hem taem Nebuchadnezzar hem stop for rul for sevenfala taem wea datwan hem sevenfala year. Bat long mek-tu taem profesi hia hem join witim Kingdom bilong God, so datfala sevenfala taem hem mas staka year winim sevenfala year.

Justin: Why nao olsem?

Clayton: Tingim, sevenfala taem hem start long 607 B.C.E., taem Jerusalem hem distroe. So sapos iumi kaontem sevenfala year start long datfala year, iumi bae kasem year 600 B.C.E. Bat no eni important samting hem happen long datfala year wea join witim Kingdom bilong God. And tu, olsem iumi storyim last taem, staka handred year bihaen Jesus stap long earth, samting wea hem talem showimaot datfala sevenfala taem hem no finis yet.

Justin: Ia, mi just tingim nao.

Clayton: So long datfala profesi sevenfala taem hem no sevenfala year bat hem mas staka year winim sevenfala year.

Justin: Haomas year?

Clayton: Bible buk bilong Revelation helpem iumi for savve haomas year nao hem insaed long datfala sevenfala taem. Hem story abaotem thri and haf taem wea hem minim 1,260 day.d Sapos iumi addim thri and haf taem witim thri and haf taem iumi bae kasem sevenfala taem, so datfala sevenfala taem hem minim 2,520 day. Waswe, iu minim?

Justin: Ia mi minim, bat hao nao datwan showimaot Kingdom bilong God hem start for rul long 1914?

Clayton: OK, iumi storyim datwan. Long samfala Bible profesi, wanfala day hem piksarem wanfala year.e Sapos iumi followim wanem Bible talem hao wanfala day hem savve minim wanfala year, datfala sevenfala taem bae hem minim 2,520 year. So sapos iumi start kaontem 2,520 year start long 607 B.C.E., iumi bae kasem year 1914.f Hem nao hao iumi kasem 1914, datfala year wea sevenfala taem hem end and Jesus hem start for rul long Kingdom bilong God. And iu savve, start kam long 1914, plande big samting happen long world wea Bible sei bae happen long olketa last day.

Justin: Olketa wanem samting?

Clayton: Tingim wanem Jesus talem long Matthew 24:7. Long taem wea hem start for rul long heven, hem sei: “Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa taem bilong bigfala hangre bae kasem plande pipol, and olketa earthquake bae sekem staka ples.” Lukim Jesus hem sei long datfala taem bigfala hangre bae kasem plande pipol and olketa earthquake bae sekem staka ples. Insaed wan handred year wea go pas, olketa samting hia happen long world, iaman?

Justin: Ia.

Clayton: Long datfala scripture, Jesus sei tu war bae gohed taem hem start for rul long Kingdom bilong God. Revelation sei olketa war bae affectim full world long taem bilong end.g Waswe, iu savve long wanem taem nao World War I hem start?

Justin: Hem long 1914, datfala sem year wea iu sei Jesus hem start for rul, iaman? Mi no tingim datwan bifor.

Clayton: Datwan hem mek sense taem iumi minim profesi abaotem sevenfala taem and olketa nara profesi long Bible wea storyim taem bilong end. Dastawe mifala Jehovah’s Witness bilivim Jesus hem start for rul long Kingdom bilong God long 1914 and olketa last day hem start long datfala sem year.h

Justin: Staka point nao iumi storyim, so mi mas ting raonem gud.

Clayton: Hem olraet. Hem tek taem tu for mi minim gud diswan. Bat mi hope story bilong iumi tufala helpem iu for luksavve nomata no eni scripture storyim datfala year 1914, mifala Jehovah’s Witness iusim olketa scripture for pruvim Jesus start for rul long 1914.

Justin: Ia, mi barava tinghae long wei wea evri samting wea iufala bilivim hem followim wanem Bible hem talem, and no wanem iufala seleva tingim. Bat iumi storyim staka point for minim diswan. Why nao God no just talem stret long Bible Jesus bae start for rul long heven long 1914?

Clayton: Datwan hem gudfala kwestin. Iu savve, staka samting long Bible man mas barava studyim gud bifor hem savve minim datwan. So why nao Bible hem olsem? Waswe sapos iumi storyim datwan next taem?

Justin: Ia, bae hem gud.