Teachim Olketa wea No Savve Read Gud
1. Wanem samting wea no isi nao iumi kasem long preaching waka?
1 Taem iumi duim preaching waka, samfala taem iumi meetim pipol wea no savve read gud and hem no isi for teachim Bible long olketa. Wanem nao iumi savve duim?
2. Wanem nao iumi savve duim for showimaot iumi respectim man wea no savve read gud, and why nao hem important?
2 Showimaot Respect: Samting wea important long Jehovah nao hem wanem hem insaed long heart bilong man and no sapos hem skul gud or nomoa. (1 Sam. 16:7; Prov. 21:2) Dastawe, iumi no ting daonem man wea no savve read gud. Taem iumi showimaot respect and patient witim man olsem, maet hem willing for acceptim help bilong iumi. (1 Pet. 3:15) Diswan minim iumi mas no forcem hem for readim Bible scripture or paragraf. Taem datfala man lanem olketa tru samting long Bible, maet hem laekem tumas for kamap gud long wei for read mekem hem savve “readim and ting raonem” Bible.—Ps. 1:2, 3.
3. Olketa wanem teknik nao iumi savve iusim for teachim olketa wea no savve read gud?
3 Olketa Teknik for Teachim Bible Study: Olketa piksa hem gudfala tul for helpem pipol rememberim wanem olketa lanem. Iu savve askem Bible study for talem tingting bilong hem abaotem piksa wea hem lukim long pablikeson wea iutufala studyim. Then askem olketa kwestin wea bae helpem hem for minim datfala piksa. Readim olketa scripture wea join witim datfala piksa. Iu savve iusim tu olketa piksa for reviewim wanem iufala storyim. No studyim staka information tumas. Mekhae nomoa long theme and olketa main point. Readim olketa scripture, and askem olketa kwestin wea bae helpem Bible study for minim gud wanem iutufala readim. Diswan bae helpem hem for laek read gud mekem hem savve duim research seleva.
4. Wanem nao iumi savve duim for helpem Bible study bilong iumi for savve read gud?
4 Olketa Samting for Helpem Man Read Gud: Nomata samfala pipol no savve read gud or no skul gud, taem olketa lanem samting olketa savve minim and no forgetim datwan. Maet iu savve encouragem olketa for iusim audio recording bilong olketa pablikeson bilong iumi. Wei for lisin gud and maet for read smol followim datfala reading bae helpem olketa kamap gud long hao for read. Maet disfala brochure Waka Hard for Read and Raet savve helpem olketa tu. Long samfala ples, olketa elder savve mekem wanfala read and raet skul long kongregeson. Olketa idea hia savve mekem iumi fit for helpem olketa wea no savve read gud mekem olketa minim “olketa Holy Raeting,” wea savve mekem olketa wise and sevem olketa.—2 Tim. 3:15.