Kamap Gud Long Ministry—Trainim Olketa Niu Pablisa

Why Hem Important: Olketa niu disaepol bilong Jesus mas lane for followim “evri samting” hem laekem olketa for duim. Insaed diswan hem for teachim truth long olketa narawan. (Matt. 28:19, 20) Plande niu wan kasem mark finis for joinim Theocratic Ministry Skul, and maet olketa preach finis long samfala long famili or long fren bilong olketa. Bat taem olketa start for tinghae long wanem olketa lanem and luksavve Jehovah laekem evri pipol for herem gud nius, maet olketa laek for join insaed preaching waka. (Rome 10:13, 14) Taem olketa niu wan kamap anbaptaes pablisa, gudfala training wea olketa kasem bae helpem olketa for no fraet.—Luke 6:40.

Wanem for Duim:

Mek sure niu pablisa hem tekem olketa pablikeson wea hem bae needim long preaching waka and for teachim pipol. Showim hem wanem nao insaed basket bilong iu, and explainim why iu tekem olketa difren pablikeson.
Chusim tugeta wanfala idea from “Wanem for Talem” long Kingdom Ministry Bilong Iumi and practicem datfala story. Encouragem hem for storyim datwan long toktok bilong hemseleva. Chusim samfala setting from Ministry Skul buk, page 82, wea fitim territory bilong iu, and then practicem wanem for talem. Strongim long hem why hem important for kaleko and lukluk bilong iumi mas fitim.—2 Cor. 6:3, 4.
Gohed trainim datfala niu pablisa for kamap gud long ministry. Showim hem hao for iusim haos tu haos record pepa for raetem information abaotem olketa wea interest. Teachim hem hao for iusim jw.org long preaching waka and datfala buklet Gud Nius for Pipol Bilong Evri Nation.Trainim hem for helpem samwan wea interest.—1 Cor. 3:6.
Patient witim hem and praisem hem. (Prov. 25:11) Showimaot gudfala example. Wei wea iu strong for duim preaching waka and willing for trainim hem bae helpem hem for olowe.

Samting for Duim Disfala Month:

Preach from haos tu haos witim Bible study bilong iu sapos hem anbaptaes pablisa. Sapos hem no pablisa yet, askem wanfala pablisa wea niu for waka witim iu.