Helpem Olketa for “Gohed for Garem Bigfala Faith”

Evri year winim 250,000 pipol olketa baptaes. Diswan mekem iumi hapi tumas and showimaot Jehovah blessim waka bilong iumi. (Deut. 28:2) Taem wanfala Bible study hem baptaes, maet pablisa no gohed for study witim hem moa bikos hem laek for helpem olketa narawan. Maet datfala Bible study tu ting for no gohed study mekem hem savve duim moa samting long ministry. Bat hem important for olketa Bible study minim gud olketa tru samting long Bible. Olketa mas “strong olsem wanfala tree wea rut bilong hem stap deep insaed long graon” and “mas gohed for garem bigfala faith” long Christ. (Col. 2:6, 7; 2 Tim. 3:12) So, bihaen wanfala Bible study hem baptaes, hem shud gohed for study go kasem taem wea hem finisim Wanem Bible Teachim and “Love Bilong God” buk.—Lukim April 2011 Kingdom Ministry Bilong Iumi, page 2.