Leta From Governing Body—2017

Dear Olketa Brata and Sista:

Long mek-7 century B.C.E., profet Ezekiel lukim wanfala nambawan vision. Hem lukim wanfala maeti chariot long heven, wea Ruler bilong universe nao kontrolem. Wanfala barava spesol samting abaotem datfala chariot nao hem wei wea hem muv. Datfala chariot savve muv kwiktaem tumas olsem laetning, and hem no need for slow or tane taem hem changem gogo bilong hem!—Ezek. 1:4, 9, 12, 14, 16-27.

Datfala vision helpem iumi for luksavve organization bilong Jehovah long heven hem gohed for muv. Waswe, long organization bilong God long earth? Olketa gudfala samting wea happen long last service year showimaot organization bilong Jehovah long earth tu gohed for muv kwiktaem!

Long last service year, olketa Bethelite long United States busy for muv from Brooklyn go long niu world hedquarter long Warwick, New York, and long olketa Bethel building long samfala nara ples. Samfala kasem niu assignment for duim pioneer waka. Long staka branch office raonem world olketa busy for wakem niu building, repairim olketa building, and samfala Bethelite muv go long nara ples. Waswe long iu? Maet iu no muv go long nara ples long last service year, bat masbi iu busy long staka samting.

Governing Body barava tinghae long wei wea pipol bilong God evriwea raonem world waka hard tumas for sapotim organization bilong Jehovah and duim wanem God talem. Staka pablisa muv go long ples wea needim samfala pablisa moa. Samfala kasem niu assignment or lanem niu languis. Staka traem olketa difren wei for preach wea olketa no duim bifor. Staka narawan duim nara samting mekem olketa savve duim moa samting long waka bilong Jehovah. And evriwan wea gohed faithful, wea minim tu olketa wea olo and sik, olketa gohed ranran long disfala resis for kasem laef. Olketa waka hard for duim wanem Jehovah laekem and for showimaot Satan hem man for laea!—1 Cor. 9:24.

Jehovah lukim olketa gudfala samting wea iufala duim. (Heb. 6:10) Wei wea iufala willing for obeyim God mekem mifala tingim example bilong Abraham and Sarah. Taem Abraham hem 70 year, hem and famili bilong hem lusim datfala taon Ur long Chaldea, and olketa muv go long Canaan. Long Canaan hem stap long olketa tent for 100 year go kasem taem hem dae. Abraham and waef bilong hem showimaot nambawan example for iumi!—Gen. 11:31; Acts 7:2, 3.

Waswe, iu followim example bilong tufala? Iufala evriwan wea gohed faithful and no givap nomata iufala kasem hard taem, iufala followim wanem Jesus talem. Jesus sei: “So iufala go and teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit.”—Matt. 28:19.

Long datfala scripture, Jesus iusim disfala word “go.” Diswan showimaot iumi mas duim samting. Taem mifala tingim staka samting wea olketa wea faithful for obeyim Christ duim long last service year, mifala hapi tumas! Mifala luksavve Jehovah barava blessim waka bilong iumi for talemaot gud nius abaotem Kingdom long pipol long evri kantri.—Mark 13:10.

Staka pipol acceptim gud nius. Long last service year namba bilong olketa pablisa hem kasem 8,340,847, and namba bilong olketa Bible study wea iumi duim evri month hem 10,115,264. Datfala chariot bilong Jehovah hem gohed for muv distaem, and iufala tu muv witim organization bilong God! Gohed for duim olketa gudfala waka hia insaed lelebet taem wea stap bifor end hem kam.

Yeartext bilong iumi for 2017 hem sei: “Trust long Jehovah and duim gudfala samting”! (Ps. 37:3) Datwan hem barava fitim. Taem iumi obeyim datfala toktok long wei for duim waka bilong Jehovah, iumi duim gudfala samting, and iumi showimaot iumi trustim God. Plis tingim, iu no stap seleva taem iu duim datfala waka. Jesus talem disfala tru samting: “Bae mi stap witim iufala go kasem taem wea world hem finis.”—Matt. 28:20.

Jehovah bae gohed for blessim iufala from iufala faithful for duim waka bilong hem. Nomata iu savve duim staka samting or lelebet samting nomoa long waka bilong God, Jehovah tinghae long wanem iu duim taem iu duim best bilong iu. Hem ting long datwan olsem samting iu givim long hem, and datwan mekem hem barava hapi. (2 Cor. 9:6, 7) Gohed fren gud witim Dadi bilong iu long heven long wei for gohed for prea, studyim Bible, attendim olketa meeting, and duim preaching waka.

Satan waka hard tumas distaem for trae mekem iumi no faithful long Jehovah, bikos hem savve hem “garem lelebet taem nomoa.” (Rev. 12:12) Sapos iu gohed fren gud witim Jehovah, Satan no savve spoelem iu. (Ps. 16:8) Mifala barava lovem iufala and tinghae long evri samting wea iufala duim for sapotim waka bilong Kingdom long olketa last day distaem.

Olketa brata bilong iufala,

Governing Body Bilong Olketa Jehovah’s Witness