Kamap Gud Long Ministry​—Story Witim Pipol Mekem Iu Garem Chance for Preach Long Olketa

From Jesus story witim wanfala Samaritan woman, diswan givim hem chance for preach long datfala woman. Wanem nao savve helpem iumi for kamap gud long wei for startim story witim pipol?

• Story gud witim pipol wea iu meetim. Nomata Jesus taed, hem startim story taem hem askem wata for drink. So iumi savve startim story witim wei for sei hello, and maet iu savve talem samting abaotem weather, or eni samting wea happen long community. First samting iumi laek for duim hem for startim story, so storyim eni samting wea maet narawan hem interest long hem. Sapos hem no laek for story, no wari, bat trae story witim narawan moa. Askem Jehovah for helpem iu for no fraet.—Nehemaea 2:4; Ac 4:29.

• Lukaotem chance for storyim gud nius, bat no tingse iu mas stretawe storyim datwan. Just gohed for story firstaem. Sapos iu stretawe storyim Bible, maet hem no laekem and hem no story nao. No feel nogud sapos story bilong iutufala finis, bat iu nating preach long hem. Sapos iu fraet for storyim gud nius, lane firstaem for startim story bat no tingse iu mas preach long olketa. [Pleim video 1 and storyim datwan witim kongregeson.]

• Trae for mekem chance for preach long wei for talem eni samting abaotem wanem iu bilivim, wea maet mekem hem laek savve moa abaotem datwan. Jesus talem samfala interesting samting wea muvim datfala woman for askem samfala kwestin. Taem Jesus ansarem olketa kwestin bilong datfala woman, hem iusim datfala chance for storyim gud nius. [Pleim video 2 and storyim datwan witim kongregeson, then pleim video 3 and storyim datwan witim kongregeson.]