God laekem iumi for garem peace and for hapi long paradaes long earth for olowe!

Maet iu ask olsem: “Waswe, bae datwan kamap tu?” Bible sei Kingdom bilong God bae mekem datwan for happen, and God laekem evri pipol for lane abaotem datfala Kingdom and plan bilong hem for iumi.—Psalm 37:11, 29; Isaiah 9:7.

God laekem iumi for kasem gudfala samting.

Dadi bilong iumi long heven hem olsem wanfala gud dadi wea laekem olketa pikinini bilong hem for kasem gud samting. Hem laekem iumi for hapi for olowe. (Isaiah 48:17, 18) God hem promis olsem: “Man wea duim wanem [mi] laekem bae stap for olowe.”—1 John 2:17.

God laekem iumi for followim olketa wei bilong hem.

Bible sei Creator bilong iumi laek for “teachim iumi olketa wei bilong hem” and for iumi “followim olketa wei hia.” (Isaiah 2:2, 3) Hem organizem “pipol wea . . . garem nem bilong hem” for talem long olketa man evriwea long earth samting wea hem laekem olketa for duim.—Acts 15:14.

God laekem iumi for wan mind for worshipim hem.

Taem pipol worshipim Jehovah long stretfala wei, diswan mekem olketa garem wan mind and barava lovem each other. (John 13:35) Hu nao teachim pipol evriwea long earth for worshipim God witim wan mind long distaem? Taem iu readim disfala brochure bae iu savve long ansa.

Waswe, iu savve long eni Jehovah’s Witness? Maet wanfala long mifala hem stap long area bilong iu, waka witim iu, or skul witim iu. Or maet enitaem mifala kam story witim iu abaotem Bible. Why nao mifala kam storyim biliv bilong mifala long nara pipol? Mifala Olketa Jehovah’s Witness wanem kaen pipol?

Mifala semsem nomoa olsem nara pipol. Mifala kam from olketa difren ples and garem difren kaen living. Taem mifala no kamap Witness yet, samfala long mifala bilong difren religion and samfala no biliv long God. Bat mifala evriwan spendem taem for lukluk gud long olketa teaching bilong Bible bifor mifala kamap Witness. (Acts 17:11) Mifala bilivim wanem mifala lanem and disaed seleva for worshipim Jehovah God.

Wei for studyim Bible hem helpem mifala. Mifala tu feisim olketa problem and garem olketa wik point olsem nara pipol. Bat from mifala traem best for followim wanem Bible talem evriday, mifala lukim living bilong mifala hem kamap gud. (Psalm 128:1, 2) Diswan nao wanfala reason for mifala storyim long pipol olketa gud samting wea mifala lanem long Bible.

Mifala traem best for followim wanem Bible talem. Bible helpem mifala for stap gud and hapi, respectim nara pipol, honest, and kaen long pipol tu. Wei for followim wanem Bible talem helpem mifala for garem gudfala health, duim gud samting long laef, garem gudfala wei, and hem helpem olketa famili bilong mifala for stap gud. From mifala savve “God hem no favorim eniwan,” datwan mekem mifala kamap wanfala spiritual famili evriwea long world, nomata wanem nao kala skin bilong mifala or kantri wea mifala kam from. Nomata mifala semsem nomoa olsem nara pipol, organization bilong mifala barava difren from eni nara organization.—Acts 4:13; 10:34, 35.

• Wanem kaen pipol nao Olketa Jehovah’s Witness?

• Hao nao wei for studyim Bible helpem Olketa Jehovah’s Witness?

Staka pipol tingse Olketa Jehovah’s Witness hem nem bilong wanfala niu religion. Bat winim 2,700 year go finis, profet Isaiah hem sei pipol wea worshipim trufala God olketa “witness” bilong God. (Isaiah 43:10-12) Bifor long 1931, nem bilong mifala hem olketa Bible Student. Why nao mifala changem datfala nem for kamap Olketa Jehovah’s Witness?

Nem hia showimaot hu nao God bilong mifala. Nem bilong God, Jehovah, hem stap staka thousand taem insaed long olketa oldfala copy bilong Bible. Staka Bible transleison aotem datfala nem Jehovah and changem witim olketa title olsem Lord or God. Bat trufala God hem talem Moses nem bilong hem nao Jehovah. Hem sei: “Diswan nao hem nem bilong mi for olowe.” (Exodus 3:15) Taem hem talem datwan, hem showimaot hem difren from evri nara laea god. Mifala hapi tumas for garem nem bilong God wea holy.

Nem hia showimaot waka bilong mifala. Abel nao firstfala witness bilong Jehovah. Bihaen long hem, samfala narawan wea insaed long bigfala “sekson bilong olketa witness” hem Noah, Abraham, Sarah, Moses, David and samfala moa. (Hebrew 11:4–12:1) Olsem samwan wea witness long wanfala kot case, mifala barava laek for talemaot tru samting abaotem God bilong mifala.

Mifala followim example bilong Jesus. Bible sei Jesus hem “datfala faithful and tru witness.” (Revelation 3:14) Jesus sei ‘hem talemaot nem bilong God long olketa pipol long world,’ and hem “talem olketa tru samting” abaotem God. (John 17:26; 18:37) Dastawe hem fitim for olketa trufala disaepol bilong Christ for garem nem bilong Jehovah, and story abaotem hem long nara pipol. Diswan nao hem samting wea Olketa Jehovah’s Witness waka hard for duim.

• Why nao olketa Bible Student changem nem bilong olketa for kamap Olketa Jehovah’s Witness?

• Start long wanem taem nao Jehovah garem olketa witness long earth?

• Hu nao nambawan Witness bilong Jehovah?