Waswe, Bae Iu Duim Wanem Jehovah Hem Laekem?

Thankiu nao iu readim disfala buk mekem iu savve abaotem mifala Olketa Jehovah’s Witness and waka wea organization bilong mifala duim. Mifala hope diswan helpem iu for luksavve mifala nao pipol wea duim wanem Jehovah hem laekem distaem. Mifala encouragem iu for kasem moa savve abaotem God and storyim samting wea iu lanem long famili and olketa fren bilong iu. Mifala hope tu iu bae kam hipap evritaem witim mifala long olketa meeting.—Hebrew 10:23-25.

Taem iu lanem moa samting abaotem Jehovah datwan bae helpem iu for luksavve long bigfala love wea hem garem for iu, wea bae mekem iu laek for duim samting for showimaot iu lovem hem tu. (1 John 4:8-10, 19) Bat wanem nao iu savve duim evriday for showimaot iu lovem God? Why nao wei for obeyim olketa law bilong hem bae mekem iu for kasem gud samting? And wanem samting nao bae helpem iu for duim wanem God hem laekem? Man wea teachim Bible long iu bae hapi for helpem iu savve long ansa for olketa kwestin hia mekem iu and famili bilong iu “gohed kasem gud samting from love bilong God, and garem hope for laef olowe.”—Jude 21.

Bihaen iu finisim buk wea iu studyim distaem, mifala invaetem iu for gohed lanem olketa tru samting and kamap strongfala Christian long wei for studyim buk “Gohed Kasem Gud Samting From Love Bilong God”.