Bible sei Jehovaha God wakem firstfala woman and hem “tekem go woman hia long datfala man.” Datwan hem firstfala marit. From Adam hapi tumas long woman hia hem sei: “Hem nao bon wea kam from bon bilong mi and body wea kam from body bilong mi.” (Genesis 2:22, 23) Nomata distaem tu, Jehovah laekem olketa wea marit for hapi.

Maet man hem tingse taem hem marit bae hem hapi and no garem eni problem. Bat hem no olsem bikos nomata hasband and waef barava lovem tufala, samfala problem bae kamap. (1 Corinth 7:28) Long disfala brochure, bae iu lukim samfala Bible principle wea sapos iu followim, datwan savve mekem famili bilong iu hapi.—Psalm 19:8-11.

1 JEHOVAH MARKEM HASBAND AND WAEF FOR DUIM DIFREN WAKA

BIBLE HEM SEI: Hasband hem hed bilong famili.—Ephesus 5:23.

Iufala olketa hasband, Jehovah sei iu mas lukaftarem gud waef bilong iu. (1 Peter 3:7) Jehovah wakem waef for barava fitim iu, and hem laekem iu for respectim and lovem hem. (Genesis 2:18) From iu barava lovem waef bilong iu, iu bae willing for duim olketa samting wea hem laekem and no evritaem duim nomoa wanem iuseleva laekem.—Ephesus 5:25-29.

Iufala olketa waef, Jehovah sei iu mas barava respectim hasband bilong iu and sapotim hem taem hem duim waka bilong hem long famili. (1 Corinth 11:3; Ephesus 5:33) Taem hem disaedem samting, sapotim hem and waka tugeta witim hem. (Colossae 3:18) Sapos iu duim olsem, hasband bilong iu and Jehovah bae tinghae long iu.—1 Peter 3:1-6.

SAMTING IU SAVVE DUIM:

• Askem marit partner bilong iu for storyim eni samting wea iu savve kamap gud long hem. Lisin long wanem hem talem, and traem best for followim datwan

• Iu mas patient bikos hem bae tek taem for lanem wanem iutufala savve duim for mekem iutufala hapi

2 TINGIM FEELING BILONG MARIT PARTNER BILONG IU

BIBLE HEM SEI: Iu mas tingim olketa samting wea marit partner bilong iu hem laekem and needim. (Philippi 2:3, 4) Duim samting wea showimaot iu tinghae long hem bikos Jehovah sei iumi mas “kaen long evriwan.” (2 Timothy 2:24) Bible sei tu: “Toktok wea man talem taem hem no tingting gud firstaem hem olsem sword wea katem man, bat toktok bilong olketa wea wise hem healim man.” So evritaem trae for talem gudfala toktok. (Proverbs 12:18) Holy spirit bilong Jehovah bae helpem iu for tok kaen and for showimaot love.—Galatia 5:22, 23; Colossae 4:6.

SAMTING IU SAVVE DUIM:

• Bifor iutufala story abaotem eni important samting, prea long Jehovah for helpem iu for no kros kwiktaem and for lisin gud taem iutufala storyim datwan

• Ting raonem gud wanem for talem and wei for talem datwan

3 WAKA TUGETA OLSEM WANFALA TEAM

BIBLE HEM SEI: Taem iu marit, hem olsem iutufala “kamap wanfala body nomoa.” (Matthew 19:5) Bat iutufala difren and samfala taem maet iutufala no garem sem tingting abaotem olketa samting. Nomata olsem, iutufala mas lane for agree long olketa samting. (Philippi 2:2) Hem important for iutufala wan mind taem iutufala disaedem olketa samting. Bible hem sei tu: “Taem pipol story tugeta, samting wea olketa planim bae gohed gud.” (Proverbs 20:18) Hem gud for followim olketa Bible principle taem iutufala disaedem olketa important samting.—Proverbs 8:32, 33.

SAMTING IU SAVVE DUIM:

• Taem iutufala story, no just talem nomoa samting wea iu savve long hem or tingting bilong iu, bat storyim tu feeling bilong iu abaotem datwan

• Story firstaem witim marit partner bilong iu bifor iu disaedem eni samting

Jehovah sei iumi mas “tinghae long wei for faithful.” (Micah 6:8) Hem barava important for faithful long marit partner bilong iu bikos taem man hem no faithful, hard for narawan trustim hem. And wei for trustim marit partner bilong iu savve helpem iutufala for barava lovem iutufala.

Distaem, staka no faithful long marit partner bilong olketa. Nomata olsem, hasband and waef savve stap gud tugeta taem tufala disaed strong for duim tufala samting.

1 WAKA HARD FOR GAREM GUDFALA MARIT

BIBLE HEM SEI: “Luksavve long olketa samting wea barava important.” (Philippi 1:10) Marit bilong iu hem wanfala barava important samting, so iu mas waka hard for garem gudfala marit.

Jehovah laekem iu for tingim hasband or waef bilong iu and for iutufala “hapi” tugeta. (Ecclesiastes 9:9) Hem talem klia iu mas no ting smol long marit partner bilong iu and mas evritaem tingim samting wea iu savve duim for mekem hem hapi. (1 Corinth 10:24) Hasband or waef bilong iu mas luksavve iu needim hem and iu tinghae long hem.

SAMTING IU SAVVE DUIM:

• Markem taem for iutufala spendem taem tugeta and iusim datfala taem for story gud tugeta

• Evritaem tingim iutufala, no iuseleva nomoa

2 PROTECTIM HEART BILONG IU

BIBLE HEM SEI: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” (Matthew 5:28) Sapos samwan gohed garem tingting for laek durong witim narawan, datwan showimaot hem no faithful long marit partner bilong hem.

Jehovah sei iumi mas ‘protectim heart bilong iumi.’ (Proverbs 4:23; Jeremiah 17:9) For duim datwan, iu mas no letem eye bilong iu for mekem iu sin. (Matthew 5:29, 30) Followim example bilong Job, wea disaed strong for no lukluk long eni gele long wei wea mekem hem tingting for laek durong witim hem. (Job 31:1) Disaed strong for no lukluk long olketa rabis piksa. And no frenim samwan wea hem no marit partner bilong iu.

SAMTING IU SAVVE DUIM:

• Mek sure olketa narawan luksavve iu barava faithful long marit partner bilong iu

• Sapos iu start for klos tumas long samwan wea no hasband or waef bilong iu, tingim feeling bilong marit partner and stop for duim datwan