Lo Ministry, Storyim Samting wea Happen lo Ples blo Iu

Taem Jesus teach, hem iusim olketa samting wea gohed happen lo datfala taem. (Lu 13:1-5) Iu tu savve storyim samting wea happen lo ples blo iu for mekem pipol interest lo message abaotem Kingdom. Bihaen iu storyim hao selen hem hard, natural disaster, faet wea kamap lo kantri, wei for addict lo drug, or eni nara samting, then askem wanfala kwestin wea bae mekem hem ting raonem. Olsem example: “Hao, iu tingse enitaem disfala problem bae finis?” or “Waswe, iu tingse eniwan savve stretem disfala problem?” Then, showim Scripture wea storyim datfala topic. Sapos hem interest, showim wanfala video or eni pablikeson lo Teaching Toolbox. Iumi gohed “sharem gud nius witim nara pipol” taem iumi traem best for storyim samting wea pipol lo territory interest lo hem.​—1Co 9:22, 23.

Wat nao olketa topic wea pipol lo territory blo iu interest lo hem?